កោះដ៏ស្រស់ស្អាត គេបោះបង់ចោល៧៥ឆ្នាំ គ្មានអ្នកហ៊ានចូល ព្រោះប្រវត្តិសាស្ត្រ និងអាថ៌កំបាំងដ៏ខ្មៅងងឹត
- 2017-07-17 09:16:57
- ចំនួនមតិ 0 | ចំនួនចែករំលែក 0
កោះដ៏ស្រស់ស្អាត គេបោះបង់ចោល៧៥ឆ្នាំ គ្មានអ្នកហ៊ានចូល ព្រោះប្រវត្តិសាស្ត្រ និងអាថ៌កំបាំងដ៏ខ្មៅងងឹត
ចន្លោះមិនឃើញ
នៅលើពិភពលោកយើងនេះ មានកោះជាច្រើនដែលគ្មានមនុស្សរស់នៅ។ កោះមួយចំនួនមិនអាចរស់នៅបាន ដោយសារតែស្ថិតនៅដាច់ស្រយាលពេក ខណៈខ្លះទៀត មកពីហេតុផលបរិស្ថាន។
ប៉ុន្តែ មានកោះមួយពោរពេញទៅដោយប្រវត្តិសាស្ត្រ និងអាថ៌កំបាំងខ្មៅងងឹត ធ្វើឲ្យមនុស្សមិនហ៊ានចូលទៅលើកោះនោះឡើយ។ វាមានឈ្មោះ Gruinard Island គឺកោះតូចមួយ ស្ថិតនៅប្រហែល ០,៦ គីឡូម៉ែត្រពីភាគពាយព្យ នៃប្រទេសស្កុតឡែន។
នៅក្នុងអំឡុងសង្គ្រាមលោកលើកទី ២ ចក្រភពអង់គ្លេស បានភ័យខ្លាចការវាយប្រហារដោយសារធាតុគីមី។ ដូច្នេះហើយ ពួកគេបានសម្រេចចិត្តធ្វើការសាកល្បង អាវុធគីមីរបស់ពួកគេ ដែលមានឈ្មោះថា «Anthrax»។ នៅក្នុងឆ្នាំ ១៩៤២ កោះដែលមានសន្តិភាពខាងលើ បានក្លាយជាទីតាំងធ្វើតេស្តសង្គ្រាមជីវសាស្ត្រ ដោយកងកម្លាំងអង់គ្លេស។
ក្រុមអ្នកស្រាវជ្រាវ បាននាំយកសត្វចៀម ចំនួន ៨០ ក្បាលទៅលើកោះ Gruinard Island រួចសាកល្បងធ្វើតេស្តសារធាតុគីមីម្យ៉ាងហៅថា «Vollum 14578»។ រយៈពេលប៉ុន្មានថ្ងៃក្រោយមក សត្វចៀមទាំងអស់ ដែលប៉ះពាល់នឹងសារធាតុគីមី បានចាប់ផ្ដើមងាប់ដោយសារតែការឆ្លងមេរោគ។
យោងតាមក្រុមអ្នកវិទ្យាសាស្ត្រ បានឲ្យដឹងថា ការបញ្ចេញសារធាតុគីមីខាងលើ មិនត្រឹមតែអាចសម្លាប់ប្រជាជនអាល្លឺម៉ង់ទាំងអស់នោះទេ ប៉ុន្តែថែមទាំងធ្វើឲ្យពួកគេ មិនអាចរស់នៅបានជាច្រើនទសវត្សទៀតផង។
ក្រោយពេលសង្គ្រាមបានបញ្ចប់ នៅឆ្នាំ ១៩៤៥ ម្ចាស់ដើម ចង់ទិញកោះនោះត្រលប់មកវិញ ប៉ុន្តែរដ្ឋាភិបាលបាននិយាយថា វាមានភាពកខ្វក់ពេក (ចម្លងមេរោគ)។ កោះនោះត្រូវតែសម្អាត និងប្រកាសថាមានសុវត្ថិភាពជាមុនសិន មុនពេលមនុស្ស និងសត្វរស់នៅ។
ទោះបីជាយ៉ាងណា ដោយសារតែវាមានគ្រោះថ្នាក់ខ្លាំងពេក ហើយត្រូវចំណាយច្រើនក្នុងការកម្ចាត់សារធាតុគីមី ដែលអាចចម្លងរោគចេញ ដូច្នេះកោះនោះត្រូវបានរដ្ឋាភិបាលបិទចោល និងហាមមិនឲ្យសាធារណជនចូល អស់រយៈពេលជាង ៥០ ឆ្នាំ។ ប៉ុន្តែនៅឆ្នាំ ១៩៨១ ក្រុមសកម្មជនផ្នែកជីវសាស្ត្រមួយក្រុម មកពីសកលវិទ្យាល័យចំនួន ២ បានចាប់ផ្ដើមបេសកកម្មមួយហៅថា «Operation Dark Harvest» ដើម្បីទាមទារឲ្យរដ្ឋាភិបាល កម្ចាត់សារធាតុគីមីនៅលើកោះនោះចោលភ្លាមៗ។
នៅទីបំផុត កោះ Gruinard Island ត្រូវបានគេបន្សាប និងបានប្រកាសថាគ្មានសារធាតុគីមី នៅថ្ងៃទី ២៤ ខែ មេសា ឆ្នាំ ១៩៩០។ ចំណែកឯ អ្នកស្នងដំណែងនៃម្ចាស់ដើម ក៏អាចទិញកោះនោះមកវិញ ក្នុងតម្លៃដើម ចំនួន ៥០០ ផោន នៅថ្ងៃទី ១ ខែ ឧសភា ឆ្នាំ ១៩៩០ ផងដែរ។
យ៉ាងណាក៏ដោយ អ្នកបុរាណវិទូ លោកវេជ្ជបណ្ឌិត Brian Moffat មិនបានជឿជាក់ថា កោះនោះគ្មានសារធាតុគីមីទាំងស្រុង និងអាចរស់នៅបានឡើយ។ «ខ្ញុំនឹងមិនដើរលើកោះ Gruinard ឡើយ»។ លោកវេជ្ជបណ្ឌិតបានប្រាប់ឲ្យដឹងយ៉ាងដូច្នេះ៕