រើសមែកស្នួលបាក់ បម្រុងយកទៅទុកដុត បែរជួបរឿងចម្លែកភ័យមិនស្ទើរ

2017-07-18 01:53:54
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកភូមិពីរគ្រួសាររស់នៅក្បែរវិទ្យាល័យប៊ុនរ៉ានីហ៊ុនសែនស្លារម បានជួបប្រទះរឿងរ៉ាវចម្លែកភ័យមិនស្ទើរទេ បន្ទាប់ពីបានរើសយកមែកស្នួល ដែលត្រូវខ្យល់បោកបក់បាក់ បម្រុងយកទៅទុកដុត សម្រាប់ចម្អិនអាហារផ្សេងៗ។

រឿងរ៉ាវដំបូងកើតលើគ្រួសារ លោក ណុប ណែត វ័យ៤៦ឆ្នាំ អ្នកយាមសាលា ដែលបានរើសយកមែកស្នួលនោះទៅទុកដុត តាមការប្រាប់ពីលោកនាយកសាលា ក្រោយភ្លៀងខ្យល់បោកបាក់។ ក្រោយរើសទៅទុកនៅផ្ទះមិនទាន់បានប៉ុន្មានម៉ោងផង កូនរបស់លោកបានធ្លាក់ពីលើផ្ទះ ដោយឥតហេតុ ឃើញដូច្នេះលោកពូក៏បានរកលោកអាចារ្យគុណគូរមើលឃើញថា តម្រូវឱ្យយកមែកស្នួលនោះទៅទុកវិញទើបលែងមានបញ្ហា។

លោក ណុប ណែត អ្នកយាយាមសាលា

មួយករណីទៀតកើតលើ អ៊ុំស្រី គង់ លី ដែលជាអ្នកបានរើសយកមែកស្នួលខាងលើបន្តបម្រុងយកទៅទុកប្រើប្រាស់ដូចគ្នា។ បន្ទាប់ពីយកទៅដល់ផ្ទះ អ៊ុំស្រីចាប់ផ្ដើមក្ដៅក ដោយឥតមូលហេតុស្ទើរទ្រាំលែងបាន ទើបនឹកឃើញដល់រឿងរើសមែកស្នួលមកទុក។ អ៊ុំស្រីក៏បន់ថ្វាយបាយកកនិងប្រហុកដុត បន្តិចក្រោយមកក៏បានធូរស្បើយ ដោយឥតបានប្រើប្រាស់ថ្នាំពេទ្យអ្វីឡើយ។

តាំងពីពេលនោះមកពុំដែលមាននរណាម្នាក់ហ៊ានកាប់ឆ្ការ ឬរើសយកមែកស្នួលដែលបាក់នោះទៅទុកប្រើប្រាស់ទៀតនោះទេ ព្រោះខ្លាចជួបហេតុមិនល្អដូចគ្រួសារខាងលើ ហើយគេជឿថាដើមស្នួលនោះពិតជាមានបារមីកាន់ខ្លាំង។ ដើមស្នួលខាងលើ ស្ថិតនៅក្នុងបរិវេណវិទ្យាល័យប៊ុនរ៉ានីហ៊ុនសែនស្លារម ភូមិត្រពាំងទ្រា ឃុំរវៀង ស្រុកសំរោង ខេត្តតាកែវ៕