ផល សោភ័ណ្ឌ៖ ដៃគូគ្រប់ប្រទេសសុទ្ធជាឧបសគ្គធំនៅស៊ីហ្គេម

2017-07-20 08:29:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ល្បីឈ្មោះរបស់កម្ពុជាដែលកម្រនិងចាញ់ ផល សោភ័ណ្ឌ ថាបើនិយាយពីប្រទេសដែលគិតថាជាឧបសគ្គធំសម្រាប់ខ្លួននៅក្នុងការប្រកួតដណ្ដើមមេដាយស៊ីហ្គេមនោះ គឺគេគិតថាទាំងអស់និងព្រោះ «យើងក៏ចង់បានមេដាយ គេក៏ចង់បានដូចគ្នា ហេតុនេះគេយកខ្លាំងៗមកដូចតែយើងដែរ»។

កីឡាករ ផល សោភ័ណ្ឌ អាវខ្មៅខាងស្ដាំគេ

កីឡាករ ផល សោភ័ណ្ឌ បានប្រាប់ឲ្យដឹងថា ធម្មតាព្រឹត្តិការធំនិងតំណាងឲ្យប្រទេសដូចនេះ ប្រទេសនិមួយៗតែងតែចង់បានមេដាយជូនប្រទេសជាតិរបស់ខ្លួន ដូច្នេះមុននិងគេដាក់កីឡាករមួយៗមកប្រកួតសុទ្ធតែជាជើងខ្លាំងហើយ។ សម្រាប់គេ( សោភ័ណ្ឌ)យល់ឃើញថា មានតែការខំប្រឹងហ្វឹកហាត់និងមិនធ្វេសប្រហែសនៅពេលប្រកួតនោះទេ ទើបអាចរកមេដាយបាន។

ប្រដាល់មកពីក្លឹប តាឡីដំរីមានរិទ្ធិ រូបនេះបន្តទៀតថា បើនិយាយពីក្ដីសង្ឃឹមគឺគេតែងតែមានសង្ឃឹមលើខ្លួនឯងជានិច្ចហ៊ានថាត្រឹម ៥០% នោះទេ ទុក ៥០% ទៀតលើស្ថានភាពជាក់ស្ដែងពេលប្រកួតនៅពេលខាងមុខ។ សម្រាប់ការចេញទៅហ្វឹកហាត់នៅប្រទេសថៃនេះគឺផ្ដោតលើតិចនិកប្រកួតខ្លាំងនិងហាត់យកស៊ុហ្វត្រៀមប្រកួតស៊ីហ្គេមតែម្ដង។ ការហ្វឹកហាត់នៅប្រទេសថៃ១ខែនេះ គេនឹងខិតខំរៀនតិចនិកល្អៗរបស់ប្រទេសគេ យកទៅប្រើនៅពេលប្រកួតនៅខែក្រោយនេះ។

កីឡាករ ផល សោភ័ណ្ឌ(ហ្វេសបុក)

កីឡាករ ផល សោភ័ណ្ឌ ជាអ្នកប្រដាល់ល្បីឈ្មោះខាងប្រដាល់គុនខ្មែររបស់កម្ពុជា ហើយបច្ចុប្បន្ននេះក៏ជាកីឡាករជម្រើសជាតិកីឡាប្រដាល់សកលផងដែរ គេនឹងប្រកួតក្នុងប្រភេទទម្ងន់ ៦៤គីឡូក្រាម នៅស៊ីហ្គេម ខែសីហា ២០១៧ នៅប្រទេសម៉ាឡេស៊ីខាងមុខនេះ។ បច្ចុប្បន្ននេះ ផល សោភ័ណ្ឌ ពេជ្រ ម្ទេសខ្មាំង និង ហ្វីលីក កំពុងហ្វឹកហាត់នៅប្រទេសថៃ ១ខែ៕

អត្ថបទ៖ នួន ស៊ីណា