របរងាយៗ ចំណាយទុនតិច ចំណេញច្រើន សម្រាប់រកស៊ីរដូវភ្លៀង

2017-07-19 10:30:46
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវវស្សាចូលមកដល់ ការរកស៊ីសម្រាប់អាជីវកម្មមួយចំនួនអាចនឹងមិនសូវកាក់កប ខណៈរបរមួយចំនួនទៀត បែរជាមានម៉ូយមកឥតល្ហែរ បើទោះជាមេឃភ្លៀងធ្លាក់យ៉ាងណាក៏ដោយ។ រដូវវស្សាមានរយៈពេលកន្លះឆ្នាំ ចាប់ពីខែ ឧសភា ដល់ខែ តុលា ហើយនេះជាឱកាសរកស៊ីសំខាន់មួយ សម្រាប់អ្នកមានលុយតិចតួច គួរតែកុំមើលរំលង។

Sabay សូមណែនាំរបរងាយៗ ចំណាយដើមទុនតិច តែចំណេញច្រើន ចែករំលែកដល់ប្រិយមិត្ត ទុកជាចំណីគំនិតនារដូវនេះ៖

លក់ឆ័ត្រ និងអាវភ្លៀង

ឆ័ត្រ និងអាវភ្លៀង ជាសម្ភារៈតែងមានត្រូវការខ្ពស់ ពេលរដូវភ្លៀង ហើយអាជីវកម្មនេះ មានភាពងាយស្រួលបំផុត ដោយគ្រាន់តែដាក់លក់ឆ័ត្រ និងអាវភ្លៀង នៅតាមដងផ្លូវ មុខផ្ទះ ឬក៏លោកអ្នកអាចដឹកយកទៅលក់នៅតាមកន្លែង ដែលមានមនុស្សជ្រកភ្លៀងច្រើនកាន់តែលក់ដាច់ទៀត។

លក់អាហារចល័ត

អាជីវកម្មលក់អាហារចល័ត ដូចជាការលក់នំកញ្ចប់ អាហារសម្រន់ នំបុ័ង អាហារកំប៉ុង តាមផ្លូវជាដើម។ លោកអ្នកអាចពិចារណាលើអាជីវកម្មប្រភេទនេះ ព្រោះថាពេលមេឃភ្លៀង មនុស្សភាគច្រើនឃ្លាន តែពិបាកចេញក្រៅទៅរកអាហារញ៉ាំ។

លក់កាហ្វេ និងភេសជ្ជៈចល័ត

ស្រដៀងគ្នានឹងអាជីវកម្មលក់អាហារដែរ គ្រាន់តែអាជីវកម្មនេះ លោកអ្នកត្រូវចេះជំនាញឆុងកាហ្វេ ធ្វើភេសជ្ជៈផ្សេងៗ និងចេះរក្សាកម្តៅវាឲ្យបានល្អ ព្រោះពេលភ្លៀង អតិថិជនត្រូវការអាហារ ដែលអាចរក្សាកម្តៅក្នុងខ្លួនបានល្អ។

លក់បន្លែ ត្រី សាច់ចល័ត

សម្រាប់អាជីវកម្មប្រភេទនេះ ក៏ជាអាជីវកម្មមួយ ដែលមាននៅកម្ពុជារួចហើយដែរ ភាគច្រើនលក់នៅពេលព្រឹក ឬល្ងាច តែពុំសូវឃើញមានអ្នកលក់បន្លែ ត្រី សាច់ចល័ត ពេលមេឃកំពុងភ្លៀងនៅឡើយ ព្រោះថានៅពេលមេឃភ្លៀង ភាគច្រើនស្ត្រីមេផ្ទះច្រើនពិបាកទៅផ្សារដើម្បីទិញបន្លែ ត្រី សាច់ ដែលវាជាឱកាសរកស៊ីមួយផងដែរ។

ក្រៅពីរបរទាំង ៤ប្រភេទខាងលើ ក៏នៅមានរបរជាច្រើនទៀត ហើយនេះគ្រាន់ជាចំណីគំនិតជូនប្រិយមិត្តប៉ុណ្ណោះ តែបើអាចធ្វើបាន លោកអ្នកក៏អាចទទួលបានបទពិសោធន៍ នឹងស្គាល់ច្បាស់ពីអតិថិជនគោលដៅ ដែលអាចជាមេរៀន សម្រាប់ក្នុងការបង្កើតអាជីវកម្មនឹងនរមួយនាពេលអនាគត៕

អត្ថបទ៖ ស៊ិន សាវ៉េត