ឃើញនៅក្មេងអ៊ីចឹងទេ ដាវណ្ណ រីកគី ថតរឿងរាប់ភ្លេច
- 2017-07-21 07:42:57
- ចំនួនមតិ 0 | ចំនួនចែករំលែក 0
ឃើញនៅក្មេងអ៊ីចឹងទេ ដាវណ្ណ រីកគី ថតរឿងរាប់ភ្លេច
ចន្លោះមិនឃើញ
អ្នកនិយមទស្សនាភាពយន្តខ្មែរមួយរយៈចុងក្រោយនេះប្រហែលជាស្គាល់ក្មេងប្រុស ដូចក្នុងរូបខាងក្រោមនេះជាក់ជាមិនខាន ប្អូនមានឈ្មោះ ដាវណ្ណ រីកគី។ ក្នុងអាជីពសិល្បៈ ដោយមិនរាប់ទាំងការថត MV ឬស្ប៉តពាណិជ្ជកម្មផ្សេងៗ តារាសម្ដែងវ័យក្មេងរូបនេះ ធ្លាប់ថតដល់ទៅជិត៣០រឿងឯណោះ។ នេះបើតាមការបង្ហើបពីសាមីខ្លួនប្រាប់ Sabay។
ទើបតែអាយុ ១២ឆ្នាំ រីកគី បានឲ្យដឹងថា ខ្លួនបានចូលសិល្បៈតាំងពីអាយុ ៥ឆ្នាំមកម្ល៉េះ តាមរយៈសាច់ញាតិដែលជាអ្នកដឹកនាំសម្ដែង។ ជាកូនពៅ ក្នុងចំណោមបងប្អូន៤នាក់ រីកគី មានម្ដាយនិងបងស្រីម្នាក់ ក៏ជាអ្នកសិល្បៈដូចគ្នាផងដែរ។ " ខ្ញុំថតតាំងពី៥ឆ្នាំ ចូលតាមពូគាត់អ្នកដឹក ម្ដាយខ្ញុំ និងបងស្រីខ្ញុំម្នាក់ទៀតក៏ថតដែរតែ អត់សូវចេញមុខទេ" កុមារា ដាវណ្ណ រីកគី រៀបរាប់។
ប្អូនប្រុសដដែលបានបន្តឲ្យដឹងថា រឿងដែលខ្លួនបានថតនាពេលថ្មីៗនេះ មាន ដូចជា រឿង"កូនពស់កេងកង”, រឿង"ទឹកចិត្តម្ដាយសម័យថ្មី” និងរឿង"រថយន្តទៅសៀមរាប"។
ចំពោះរឿងដែល រីកគី ធ្លាប់បានសម្តែង គឺសុទ្ធសឹងជាតួអង្គឯកពីក្មេង ឬជាតួកូន។ "ខ្ញុំនៅក្មេងចឹងគេឲ្យសម្ដែងតួឯកកាលនៅតូច បើចឹងទេ គឺកូនៗតែម្ដង តែតួឯកពីក្មេងថតច្រើនរឿងដែរហ្នឹង"។ រីកគី លើកឡើងទាំងសំណើច។
ដោយសារតែប្រជាប្រិយភាពត្រូវបានមហាជនស្គាល់ច្រើន ទីផ្សារសិល្បៈក៏ទៅតាមនោះដែរ មានផលិតកម្មជាច្រើនបានទាក់ទងឲ្យថត ហើយមានពេលខ្លះប្អូនប្រាប់ថា ជាប់ថត ៤ ទៅ ៥រឿង ក្នុងខែតែមួយក៏មាន។ មមាញឹកបែបនេះ រីកគី មិនសូវជាមានពេលរៀនសូត្រដិតដល់ឡើយ បច្ចុប្បន្នប្អូនកំពុងរៀនថ្នាក់ទី៧។ បែបនេះក្ដី ប្អូនបានប្ដេជ្ញាថានឹងខិតខំបន្តការសិក្សារហូតដល់បញ្ចប់ថ្នាក់មហាវិទ្យាល័យឲ្យទាល់តែបាន។
ទៅថ្ងៃអនាគត រីកគី ប្រាប់ថា ចង់ធ្វើជាអ្នកធ្វើការនៅក្នុងការិយាល័យផង ចង់បន្តអាជីពជាអ្នកសិល្បៈផង ជាមួយគ្នានោះដែរប្អូនរំពឹងថា ពេលដែលធំពេញវ័យនោះ ខ្លួនអាចនឹងក្ដាប់តំណែងតួឯកក្នុងរឿងណាមួយជាក់ជាមិនខាន៕
ចុចអាន៖
មកស្គាល់ កុមារី អួន នីតា ធ្លាប់ថតជិត១០រឿង ក្នុងវិស័យភាពយន្តខ្មែរ
៨សន្លឹកនេះអាចបញ្ជាក់ពីក្ដីស្រលាញ់របស់ បវរកញ្ញាពិភពលោក ទៅកាន់កុមារកម្ពុជា