អង្គម្ចាស់អារ៉ាប៊ីសាអ៊ូឌីត ត្រូវចាប់ព្រះកាយ ក្រោយវាយរាស្ត្រឈាមមុខ និងភ្ជង់កាំភ្លើង

2017-07-21 04:32:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គម្ចាស់ប្រទេសអារ៉ាប៊ីសាអ៊ូឌីត ត្រូវបានអាជ្ញាធរចាប់ព្រះកាយតាមបញ្ជារបស់ស្ដេច Salman បន្ទាប់ពីលេចធ្លាយវីដេអូជាច្រើនបង្ហាញពីអង្គម្ចាស់វ័យក្មេងរូបនេះ វាយធ្វើបាបរាស្ត្រធម្មតា។

វីដេអូវាយធ្វើបាបដាល់មុខចេញឈាមនេះ បានធ្វើឲ្យមហាក្សត្រ Salman ក្រោធខ្លាំង រហូតបញ្ចេញរាជសារបន្ទាន់ឲ្យតាមចាប់ព្រះកាយអង្គម្ចាស់ Saud bin Abdulaziz bin Musaed bin Saud bin Abdulaziz Al Saud និងប្រកាសឲ្យឃុំខ្លួនអ្នកណាក៏ដោយឲ្យតែពាក់ព័ន្ធនឹងការវាយធ្វើបាបលើរាងកាយ និងការប្រើពាក្យសម្ដី។

បុរសរងគ្រោះជាពលរដ្ឋធម្មតា ត្រូវគេឃើញហូរឈាមចេញពីច្រមុះ មាត់ និងរបួសមុខ បន្ទាប់ពីអង្គម្ចាស់រូបនេះទាត់ និងដាល់បុរសសាមញ្ញជាច្រើនដៃសំដៅទៅក្បាល។

មហាក្សត្រ Salman បានបញ្ជាឲ្យអាជ្ញាធរដាក់ខ្នោះឃុំព្រះកាយអង្គម្ចាស់ទុក រង់ចាំសណ្ដាប់ជនរងគ្រោះទាំងអស់ ហើយជនសង្ស័យនឹងត្រូវកាត់ទោសក្រោមច្បាប់ដ៏តឹងរ៉ឹងបស់សាសនាឥស្លាម Sharia Law។ នេះបើតាមបើយោងទៅតាមសារព័ត៌មានអារ៉ាប Arab News ។

តាមរយៈវីដេអូលេចធ្លាយ គេឃើញអង្គម្ចាស់ព្យាយាមដាល់ក្បាលបុរសម្នាក់ ចេញឈាមមុខ រួចទៅអង្គុយគ្រវីកាំភ្លើងខ្លីនៅរថយន្តមួយគ្រឿង។ ឯវីដេអូមួយទៀត រាស្ត្រសាមញ្ញត្រូវអង្គម្ចាស់វាយធ្វើបាប និងគ្រវីកាំភ្លើងវែង រួចតម្រង់ដាក់ពួកគេគួរឲ្យខ្លាច និងមួយទៀតឃើញស្ត្រីមួយក្រុមត្រូវអង្គម្ចាស់ធ្វើបាប។ ទោះយ៉ាងណា ប្រភពមិនបានបញ្ជាក់ពីមូលហេតុពិតប្រាកដដែលធ្វើឲ្យអង្គម្ចាស់វ័យក្មេងខាងលើធ្វើបាបរាស្ត្រសាមញ្ញនោះទេ៕