មូលហេតុសំខាន់យប់មិញ កម្ពុជាស៊ុតមិនចំគោលដៅជប៉ុន១ជើងសោះ

2017-07-22 01:39:31
ចំនួនមតិ 0 | ចំនួនចែករំលែក 0

ចន្លោះមិនឃើញ

U23 កម្ពុជាប្រកួតជាមួយក្រុមយុវជន U21 ជប៉ុនយប់មិញនេះ គឺមិនមានឱកាសល្អណាមួយស៊ុតចំគោលដៅមួយជើងនោះទេ បើទោះជាមានឱកាសទាត់បាល់ពិន័យជិតនឹងបង្គោលទីហើយក៏ដោយ។

ចំពោះមូលហេតុនេះដែរ លោក Leonardo Vitorino បញ្ជាក់ថាមកពីជប៉ុនជាក្រុមខ្លាំងនៅអាស៊ី ហើយពួកគេមានបទពិសោធលេងជាមួយក្រុមខ្លាំងនៅអឺរ៉ុបដូចជាបារាំង អង់គ្លេសអីជាដើម។ ដូច្នេះហើយ ការដែលអូសបាល់ទៅតំបន់គ្រោះថ្នាក់របស់ក្រុមមួយនេះគឺពិតជាពិបាកខ្លាំងណាស់ ស្របពេលដែលខ្សែការពារនិងបម្រើរបស់ពួកគេសុទ្ធតែកំពូលៗថែមទៀត។

អ្វីដែលកាន់តែលម្អិតទៀតនោះ គឺលោកប្រើកីឡាករ២ប្រកួតមកនេះសុទ្ធតែមុខដដែលៗទាំងអស់ ដើម្បីឱ្យពួកគេប្រឹងប្រែងឱ្យអស់ពីសមត្ថភាពទប់យកឱ្យបាន១ពិន្ទុឬមានឱកាសបាន៣ពិន្ទុពីក្រុមជប៉ុនតែម្ដង។ ដោយលោក Leo មិនចង់ចាញ់ការប្រកួត ហើយទទួលត្រឹមលទ្ធផលបរាជ័យនោះទេ។ គ្រូបង្វឹកប្រេស៊ីលខាងលើនេះ បើទោះចាញ់ជប៉ុនមែន ប៉ុន្តែលោករំពឹងថាកូនក្រុមនឹងទទួលបានបទពិសោធល្អហើយនឹងធ្វើបានល្អថែមទៀត ដើម្បីយកឈ្នះលើក្រុមហ្វីលីពីននៅប្រកួតចុងក្រោយ។

សូមបញ្ជាក់ថាក្នុងពូល J នៃពានរង្វាន់ 2018 AFC U23 Championship ក្រុមលេខ១គឺជប៉ុនមាន៦ពិន្ទុពេញ ក្រុមលេខ២ ចិនមាន៤ពិន្ទុនិងក្រុមលេខ៣កម្ពុជាមាន១ពិន្ទុ ហ្វីលីពីនមាន០ពិន្ទុ ឆ្លងកាត់២ប្រកួតមកនេះ។ ដោយការជ្រើសរើសឡើងទៅវគ្គបន្ដគឺ គេយក១៦ក្រុមចេញពីក្នុង១០ពូលនេះ ដោយលេខ១ក្នុងពូល ត្រូវឡើង និងជ្រើសរើសលេខ២ក្នុងពូលល្អបំផុតឡើងទៅបន្ដទៀត ខណៈដែលចិនទោះជាស្ថិតក្នុងចំណាត់ថ្នាក់ទីប៉ុន្មានក្នុងពូល ក៏គេបានជាប់ទៅវគ្គចុងក្រោយដែរ ព្រោះក្នុងនាមជាក្រុមម្ចាស់ផ្ទះ៕

អត្ថបទ៖ មុន្នីរម្យ