អ្នកមានគម្រោងរៀបការ កុំភ្លេចចូលរួមពិព័រណ៍អាពាហ៍ពិពាហ៍ដ៏ធំលើកទី២
- 2017-07-22 04:21:40
- ចំនួនមតិ 0 | ចំនួនចែករំលែក 0
អ្នកមានគម្រោងរៀបការ កុំភ្លេចចូលរួមពិព័រណ៍អាពាហ៍ពិពាហ៍ដ៏ធំលើកទី២
ចន្លោះមិនឃើញ
ពិព័រណ៍អាពាហ៍ពិពាហ៍ដ៏ធំលើកទី២ បានចាប់ផ្ដើមផ្លូវការហើយនៅព្រឹកថ្ងៃទី២២ ខែកក្កដានេះ ដោយមានការចូលរួមពីបណ្ដាក្រុមហ៊ុនប្រមាណ៥០ ដែលអាចសម្រួលដល់អ្នកមានគម្រោងរៀបការ មិនឲ្យឈឺក្បាលរឿងរៀបចំពិធីឡើយ ហើយមានកម្មវិធីពិសេសជាច្រើនសម្រាប់អ្នកចូលរួមទស្សនា។
ពិព័រណ៍អាពាហ៍ពិពាហ៍នៅឆ្នាំនេះ ប្រារព្ធឡើង ២ថ្ងៃជាប់គ្នាដូចឆ្នាំមុនដែរ គឺនៅថ្ងៃទី២២ និងថ្ងៃទី២៣ ចាប់ពីម៉ោង ៨ព្រឹក រហូតដល់ម៉ោង ៩យប់ ក្នុងអគារ J-K នៃមជ្ឈមណ្ឌលសន្និបាត និងពិព័រណ៍កោះពេជ្រ ដោយមានអ្នកជំនាញប្រឹក្សាយោបល់លើការរៀបអាពាហ៍ពិពាហ៍ និងការសម្ដែងបែបប្រពៃណីជាច្រើន។
លោក សេង ពិសិដ្ឋ នាយកប្រតិបត្តិក្រុមហ៊ុន ANUSSA បាននិយាយថា នៅឆ្នាំនេះ មានក្រុមហ៊ុនផ្នែកសេវាកម្មអាពាហ៍ពិពាហ៍ប្រមាណជាង ៥០ក្រុមហ៊ុន បានចូលរួមក្នុងពិព័រណ៍ ដែលអាចឲ្យអ្នកចូលរួមងាយស្រួលក្នុងការទទួលបានព័ត៌មានទាក់ទងនឹងការរៀបការ។ លោកបាននិយាយទៀតថា ការរៀបការគឺជាពិធីដ៏សប្បាយរីករាយ កុំឲ្យក្លាយជាបន្ទុករបស់អ្នកជុំវិញខ្លួន ត្រូវធ្វើយ៉ាងណាឲ្យមានន័យ គួរស្វែងរកការប្រឹក្សាយោបល់ផ្ទាល់ក្នុងពិធីនេះ។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានមានប្រសាសន៍ថា ក្នុងមួយជីវិតមានថ្ងៃសំខាន់ ២ ៣ប៉ុណ្ណោះ ដែលចងចាំបំផុត។ ទីមួយនោះ គឺថ្ងៃកំណើត ហើយថ្ងៃបន្ទាប់នោះគឺថ្ងៃចូលរៀន ទទួលសញ្ញាប័ត្រ។ ចំណែកមួយទៀតដែលសំខាន់បំផុតនោះ គឺការរៀបអាពាហ៍ពិពាហ៍ ដែលជាថ្ងៃដ៏អស្ចារ្យមួយក្នុងការចាប់ផ្ដើមនៃជីវិត។ ដូចនេះ គួរស្វែងរកការប្រឹក្សាយោបល់ឲ្យត្រឹមត្រូវ ហើយលោកជំទាវ បានលើកទឹកចិត្តឲ្យបង្កើតកម្មវិធីបែបនេះបន្តបន្ទាប់រាល់ឆ្នាំ។
ចំណែកឯកឧត្ដម ឈួន ដារា រដ្ឋលេខាធិការក្រសួងពាណិជ្ជកម្ម បានលើកឡើងថា ពិព័រណ៍អាពាហ៍ពិពាហ៍នេះ ពិតជាផ្ដល់សារសំខាន់ខ្លាំងណាស់ ដល់អ្នកត្រៀមរៀបអាពាហ៍ពិពាហ៍ ព្រោះអាចជួយណែនាំតាំងពីរៀបការចំដំបូង រហូតដល់ចប់ មិនឲ្យពិបាកដល់អ្នកជិតខាង ឬញាតិមិត្តឡើយ ហើយវាមានភាពងាយស្រួលទៀតផង។
កម្មវិធីពិព័រណ៍អាពាហ៍ពិពាហ៍ ២ថ្ងៃនេះ នឹងមានការដើរបង្ហាញម៉ូតសំលៀកបំពាក់បែបប្រពៃណី បុរាណ សម័យ របស់កូនកំឡោះ ក្រមុំ សម្រាប់ថ្ងៃរៀបអាពាហ៍ពិពាហ៍ដ៏សម្បូរបែប។ លើសពីនេះទៀតអ្វីដែលកាន់តែពិសេសនោះ ក៏មានសម្ដែងកម្មវិធីសំខាន់មួយចំនួន ក្នុងពិធីរៀបអាពាហ៍ពិពាហ៍ដូចជា ពិធីចូលម្លប់ ពិធីបុកល័ក្ខ របាំជូនពរ របាំសហសម័យ និងការប្រគំភ្លេងបុរាណផងដែរ៕