ជនអន្តោប្រវេសន៍ខំពួនសម្ងំក្នុងរថយន្តឆ្លងដែន ត្រូវថប់ដង្ហើមស្លាប់ និងឈឺជិត ៤០នាក់

2017-07-24 02:05:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនសង្ស័យអន្តោប្រវេសន៍ចំនួន ៩នាក់ ត្រូវបានគេរកឃើញដេកស្លាប់កាលពីថ្ងៃអាទិត្យ ទី ២៣ កក្កដា ម្សិលមិញ បន្ទាប់ពីលាក់ខ្លួនពួនសម្ងំក្នុងរថយន្តដឹកទំនិញធំមួយចតទុកចោលនៅកន្លែងចំណត Walmart ក្នុងរដ្ឋតិចសាស់ និងមនុស្សចំនួន ៣០នាក់ផ្សេងទៀតត្រូវបានគេបញ្ជូនទៅកាន់មន្ទីរពេទ្យភ្លាមៗ។

ប៉ូលិសបានហៅសកម្មភាពនេះថា ជាឧក្រិដ្ឋកម្មជួញដូរមនុស្សដ៏សាហាវព្រៃផ្សៃមិនអាចលើកលែងឲ្យបាន។ ជនរងគ្រោះ ១៧នាក់ក្នុងចំណោមទាំងអស់ ត្រូវបានបញ្ជូនទៅកាន់មន្ទីរពេទ្យក្បែរៗក្នុងទីក្រុង San Antonio ព្រោះតែស្ថានភាពធ្ងន់ធ្ងរពេកដោយជំងឺដាច់សរសៃឈាមខួរក្បាល និងខ្សោះជាតិទឹក។

បើតាមប្រភពពីអាជ្ញាធរបញ្ជាក់ថា យ៉ាងហោចណាស់មនុស្សចំនួន ៣៨នាក់បានស្ថិតនៅក្នុងរថយន្តដឹកទំនិញ ក្នុងនោះមានក្មេងសិស្សសាលាចំនួន ២នាក់ផង និងម្នាក់ទៀតនៅក្រៅរថយន្ត ប៉ុន្តែមិនទាន់បញ្ចេញអត្តសញ្ញាណនៅឡើយទេ។

ប៉ូលិសទទួលដំណឹងខាងលើ ដោយសារបុគ្គលិក Walmart បានទូរសព្ទទៅប៉ូលិសពេលឃើញរថយន្តនេះចតនៅចំណតគួរឲ្យសង្ស័យ។ ក្រោយមក ប៉ូលិសបានចាប់ខ្លួនអ្នកបើកបររថយន្តដឹកទំនិញម្នាក់ឈ្មោះ James Mathew Bradley Jr អាយុ ៦០ឆ្នាំ មកពីរដ្ឋផ្លរីដា និងចោទប្រកាន់នៅព្រឹកថ្ងៃច័ន្ទនេះនៅទីក្រុង San Antonio។

ប្រភពពីអាជ្ញាធរដដែលបញ្ជាក់ថា ពេលរកឃើញជនអន្តោប្រវេសន៍ សីតុណ្ហភាពក្នុងរថយន្តគឺក្ដៅដល់ ៦៥អង្សាសេ។ ទោះយ៉ាងណាគេមិនទាន់ដឹងថា ជនរងគ្រោះទាំងអស់ចេញមកពីណានៅឡើយទេ ប៉ុន្តែជាទូទៅ ជនអន្តោប្រវេសន៍ខុសច្បាប់រាប់ពាន់នាក់មកពីប្រទេសម៉ិកស៊ីកូ និងអាមេរិកកណ្ដាល តែងតែព្យាយាមតាមវិធីដ៏គ្រោះថ្នាក់ចូលមកសហរដ្ឋអាមេរិកក្នុងមួយឆ្នាំៗ៕