អេ អ៊ឹមម៉ារិន ភូថង សម្លឹងឃើញមេដាយការប្រកួតប្រដាល់ជើងឯករាជធានីភ្នំពេញ ក្រោយឈ្នះល្ងាចមិញ
- 2017-07-24 10:19:52
- ចំនួនមតិ 0 | ចំនួនចែករំលែក 0
អេ អ៊ឹមម៉ារិន ភូថង សម្លឹងឃើញមេដាយការប្រកួតប្រដាល់ជើងឯករាជធានីភ្នំពេញ ក្រោយឈ្នះល្ងាចមិញ
ចន្លោះមិនឃើញ
កូនប្រុសលោក អេ ភូថង គឺកីឡាករ អេ អ៊ឹមម៉ារិន ភូថង ដែលជាយុវជនថ្នាលរបស់ប្រដាល់សកលកម្ពុជាសម្លឹងឃើញមេដាយបន្តើរៗ ក្រោយយកឈ្នះដៃគូកាលពីល្ងាចថ្ងៃទី២៤ ខែកក្កដា ២០១៧ នេះ។
អេ អ៊ឹមម៉ារិន បានឲ្យដឹងក្រោយប្រកួតថា ខ្លួនសង្ឃឹមឈ្នះមេដាយក្នុងកម្មវិធីប្រដាល់សាកលនិងគុនខ្មែរជ្រើសរើសជើងឯករាជធានីភ្នំពេញប្រចាំឆ្នាំ២០១៧ ដែលទើបនិងចាប់ផ្ដើមនៅរសៀលនេះក្នុងកីឡដ្ឋានស្តាតចាស់។ សម្រាប់ការប្រកួតរបស់ខ្លួនមានការលំបាកបន្តិច ប៉ុន្តែដោយការតស៊ូខំប្រឹងប្រកួតរហូតដល់ទីបញ្ចប់គេនៅតែទទួលបានជ័យជម្នះ។
កីឡាករជម្រើសជាតិថ្នាលរូបនេះបន្តទៀតថា ចំពោះការប្រកួតមុននេះខ្លួននៅមានកំហុសឆ្គងមួយចំនួនដែរ គឺនៅពេលប្រៃដៃម៉ាត់ចេញទៅនោះ ខ្លួនមិនបានបោះជើងទៅមុខជាមួយនោះទេ ដោយសាររូបគេភ្លេច តែនៅប្រកួតក្រោយៗទៀត គេនឹងព្យាយាមធ្វើឲ្យបានល្អជាងនេះទៅទៀត។ ចំពោះការប្រកួតនៅវគ្គផ្ដាច់ព្រ័ត្រខ្លួនរំពឹងនឹងឈ្នះមេដាយក្នុងកម្មវិធីនេះ ទន្ទឹមនិងនេះគេនឹងខំប្រឹងប្រែងហ្វឹកហាត់និងស្ដាប់គ្រូបង្ហាត់បង្ហាញបន្ថែមទៀតដើម្បីទទួលបានជ័យជម្នះ។
អេ អ៊ឹមម៉ារិន ភូថង ជាកីឡាករជម្រើសជាតិប្រដាល់សកលកម្ពុជាដើម្បីត្រៀមស៊ីហ្គេម ២០២៣ ខាងមុខដែលកម្ពុជាធ្វើជាម្ចាស់ផ្ទះ។ សម្រាប់ប្រកួតមិញនេះកីឡាករវ័យ១៣ឆ្នាំ រូបនេះប្រកួតក្នុងទម្ងន់ ៤៥គីឡូក្រាម ដោយឈ្នះពិន្ទុលើកីឡាករ នៅ សុខទី ដោយពិន្ទុ ហើយកូន អេ ភូថង ម្នាក់នេះនឹងត្រូវប្រកួតនៅវគ្គផ្ដាច់ព្រ័ត្រនាថ្ងៃទី២៧ ខាងមុខនេះទៀត៕