Real Madrid អាចនឹងទិញ Kylian Mbappe ពីក្លឹប Monaco ទោះថ្លៃក្ដី
- 2017-07-25 12:06:00
- ចំនួនមតិ 0 | ចំនួនចែករំលែក 0
Real Madrid អាចនឹងទិញ Kylian Mbappe ពីក្លឹប Monaco ទោះថ្លៃក្ដី
ចន្លោះមិនឃើញ
ក្លឹប Real Madrid អាចនឹងប្រើទឹកប្រាក់មហាសាលរបស់ខ្លួន ដើម្បីទិញយកខ្សែប្រយុទ្ធវ័យក្មេង Kylian Mbappe មកអេស្ប៉ាញ ដើម្បីរក្សាតំបន់ប្រយុទ្ធរបស់ខ្លួនឱ្យកាន់តែមុតថែមទៀត។
ក្រោយពីលក់កីឡាករល្អៗដូចជា James និង Morata ចេញទៅ ក្លឹប Real Madrid មិនទាន់ប្រកាសជាផ្លូវការណាមួយដើម្បីនាំយកកីឡាករល្អកម្រិតអន្តរជាតិមករួមក្រុមនៅឡើយទេ។ ខណៈដែលបំណងប្រាថ្នារបស់គេលើ Mbappe របស់ក្លឹប Monaco នោះ ត្រូវគាំងសិន ដោយសារតែក្លឹបមួយនេះទាមទារតម្លៃផ្ដាច់កុងត្រាខ្ពស់ពេក។ យ៉ាងណាមិញ លោក Zidane ក៏មិនទាន់បោះបង់ឱកាសនាំយកកីឡាករបារាំងរូបនេះនៅឡើយទេ ត្បិតអីទីផ្សារដោះដូរកីឡាករមិនទាន់បញ្ចប់នៅឡើយ។
អ្នកចាត់ការក្រុម Real Madrid បានលើកឡើងថា Mbappe ជាកីឡាករវ័យក្មេង តែឈានដល់កម្រិតអស្ចារ្យមួយទៅហើយ។ ត្រឹមវ័យ១៨ឆ្នាំ ធ្វើបានដូច្នេះគឺមិនមែនជារឿងងាយនោះទេ។ លោកមិនទាន់មើលឃើញកីឡាករណាដើម្បីស្នើទៅក្លឹបទិញយកតែម្ដងឡើយ ប៉ុន្តែទីផ្សារដោះដូរកីឡាករនៅមានរយៈពេលវែង ដូច្នេះអ្វីគ្រប់យ៉ាងក៏អាចកើតឡើង។ រឿង Kylian Mbappe អាចមក Real Madrid ក៏នៅតែអាចទៅរួច ទោះតម្លៃខ្លួនថ្លៃក្ដី។
រដូវកាលដោះដូរកីឡាករនឹងបិទនៅចុងខែក្រោយឯណោះ ខណៈដែលត្រឹមពេលនេះ ក្លឹប Monaco បានលក់កីឡាករសំខាន់ៗដូចជា Tiemoue Bakayoko, Bernardo Silva និង Benjamin Mendy ចេញអស់ទៅហើយ នៅឡើយតែ Mbappe មានក្លឹបច្រើនចង់បាននិងឱ្យតម្លៃខ្ពស់ តែក្លឹបយក្សនៅបារាំងមួយនេះ មិនទាន់ដាច់ចិត្តលក់នៅឡើយ។
ខ្សែប្រយុទ្ធបារាំងវ័យ១៨ឆ្នាំខាងលើ គឺជាអ្នកគាំទ្រ Cristiano Ronaldo ខ្លាំងណាស់ ហើយក្ដីស្រមៃរបស់គេតាំងពីតូចមកចង់មានឱកាសបានលេងជាមួយ Idol របស់គេ។ ស្របពេលដែលរដូវកាលមុននេះ Mbappe បានជួយក្លឹប Monaco លើកពានលីគកំពូលបារាំងដោយស៊ុតបាន២៦គ្រាប់ Assist បាន១១គ្រាប់ទៀតនោះ ទើបធ្វើឱ្យមានក្លឹបជាច្រើនចង់បានគេតែម្ដង រួមជាមួយ Real Madrid ផងដែរ៕