កុមារ ១០ឆ្នាំក្លាយជាវីរបុរស ក្រោយជួយក្មេងអាយុ ៥ឆ្នាំ ចេញពីចង្កូមសត្វសាហាវ
- 2017-07-26 04:49:26
- ចំនួនមតិ 0 | ចំនួនចែករំលែក 0
កុមារ ១០ឆ្នាំក្លាយជាវីរបុរស ក្រោយជួយក្មេងអាយុ ៥ឆ្នាំ ចេញពីចង្កូមសត្វសាហាវ
ចន្លោះមិនឃើញ
ក្មេងប្រុសជនជាតិថៃអាយុ ១០ឆ្នាំ ត្រូវបានគេហៅថា វីរបុរសវ័យក្មេង បន្ទាប់ពីប្រថុយគ្រោះថ្នាក់ចូលដេញឆ្កែកាចមួយក្បាល ដើម្បីជួយកុមារជាអ្នកជិតខាងអាយុ ៥ឆ្នាំ ដែលកំពុងរងរបួសធ្ងន់ធ្ងរដោយសារឆ្កែខាំ។
ឧបទ្ទវហេតុនេះកើតឡើងកាលពីថ្ងៃទី ២០កក្កដា ម៉ោង ៦៖៣០នាទីល្ងាច ខណៈពេលកុមារក្លាហាន Noppachai និងកុមាររងគ្រោះ Sirin អាយុ ៥ឆ្នាំ បានដើរត្រលប់មកផ្ទះពីកន្លែងរត់លេង ក្បែរពួកគេរស់នៅ នៅស្រុកថារួ ខេត្តអៈយុតថៈយ៉ា។
ពេលកំពុងដើរ ស្រាប់តែឆ្កែឈ្មោលមួយក្បាលបានរត់មកខាំទាំងកម្រោលលើកុមារ Sirin ដោយខាំមុខ និងក្បាលបណ្ដាលឲ្យរបួសយ៉ាងដំណំ។ ពេលឆ្កែកំពុងវាយប្រហារលើ Sirin កុមារ Noppachai បែរជាមិនភ័យខ្លាច និងបានទៅឆក់យកដំបងវាយកូនគោលនៅជាប់ដៃ Sirin ដែលគេយកមកពីផ្ទះ ទៅវាយឆ្កែកាចភ្លាមៗ តែកុមារ Sirin បានដេកដួលទៅហើយ។
កុមាររៀនថ្នាក់ទី៥ រូបនេះរៀបរាប់ថា "ដំបូងពេលវ៉ៃឈ្នះឆ្កែ ខ្ញុំបានអៀវ Sirin ដាក់លើខ្នង ប៉ុន្តែឆ្កែនោះវានៅតាមខាំ Sirin ទៀត ដូច្នេះខ្ញុំដាក់ឲ្យគេចុះ រួចខ្ញុំយកដំបងដដែលតាមដេញឆ្កែវិញ រហូតវារត់ផាសក្រញាំ។ ពេលនោះខ្ញុំគិតថា ប្រសិនបើខ្ញុំរត់ទៅរកឲ្យគេជួយ មានតែទុក Sirin ឲ្យនៅតែឯង អីចឹងឆ្កែនឹងខាំ Sirin ស្លាប់មិនខាន ដូច្នេះខ្ញុំសម្រេចចិត្តនៅតទល់ជាមួយឆ្កែតែម្ដង"។
ក្រោយវាយឆ្កែឈ្នះជាលើកទីពីរកុមារ Noppachai បានអៀវកុមារ Sirin ទាំងត្រូវរបួសហូរឈាមទៅកាន់ផ្ទះរបស់ Sirin ចម្ងាយប្រមាណ ១០០ម៉ែត្រពីកន្លែងកើតហេតុ។ បន្ទាប់មក ត្រូវគ្រួសារនាំទៅកាន់មន្ទីរពេទ្យបន្ទាន់ដោយត្រូវរបួសមុខ និងក្បាលចំនួន ៣៩ថ្នេរ។ មុខរបួសមួយ ត្រូវឆ្កែខាំក្បែរភ្នែកខាងស្ដាំ តែសំណាងល្អភ្នែកមិនខ្វាក់។ លើសពីនេះ វីរបុរសតូចបន្តថា ខ្លួនបានទៅមើល Sirin ដល់មន្ទីរពេទ្យស្ទើររាល់ថ្ងៃទៀតផង។
ដំណឹងនេះបានឮដល់សាលាពួកគេរៀន ហើយគ្រូបានបំពាក់គ្រឿងឥស្សរិយយសឲ្យ Noppachai ចំពោះសកម្មភាពក៏អង់អាចក្លាហាននេះ រួមជាមួយទឹកប្រាក់ ៣ពាន់បាត ឬប្រមាណ ៩០ដុល្លារផងដែរ៕