ពេជ សារ៉ាត សម្ដែងចាប៉ីមិនគិតប្រាក់ជាសំខាន់

2017-07-27 02:59:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានសហគមន៍ចាប៉ី លោក ពេជ សារ៉ាត បានប្រាប់ក្រុមការងារ Sabay ថា លោកនិងក្រុមសិល្បករចាប៉ីប្រឹងប្រែងបញ្ជ្រាបទម្រង់មួយនេះ ទៅកាន់មហាជនដោយមិនគិតពីប្រាក់ជាសំខាន់ តែធ្វើយ៉ាងណាមិនឱ្យទម្រង់មួយនេះនៅនឹងថ្កល់ឡើយ។

កូនសិស្សលោកព្រឹទ្ធាចារ្យ គង់ ណៃ រូបនេះ បានបញ្ជាក់ថា ការទៅសម្ដែងមានជាលក្ខណៈសប្បុរសធម៌ក្តី និងកម្មវិធីផ្សេងៗក្តី លោកកមិនគិតចំពោះតម្លៃនោះទេ ។ អ្វីដែលសំខាន់លោកចង់បញ្ជ្រាបទម្រង់សិល្បៈចាប៉ីទៅកាន់កូនខ្មែរគ្រប់រូបឱ្យបានស្គាល់ពីទម្រង់មួយនេះ។

"បើជាកម្មវិធីសប្បុរសធម៌ ក៏ដូចជាជួយដល់សង្គម ពួកយើងអត់គិតពីតម្លៃទេ គ្រាន់ថាបានថ្លៃញ៉ាំថ្លៃធ្វើដំណើរ។ បើលក្ខណៈគាត់ចង់ជួយសិល្បៈខ្លះជួយវប្បធម៌ខ្លះ យើងគិត៥០% អីចឹងយើងទៅចូលរួមទាំងសប្បាយរីករាយទាំងអស់គ្នា ប៉ុន្តែបើ លោកជំទាវ ឯកឧត្ដម លោក លោកស្រី គាត់ជួល១០០% អីចឹងយើងគិតពេញ តែមិនថ្លៃទេ។ យើងត្រូវឆ្លៀតយកឱកាសហ្នឹងចូលរួម ទីមួយយើងបានបច្ច័យខ្លះ ហើយបានផ្សព្វផ្សាយពីទម្រង់របស់យើងទៀត"។

ថ្វីត្បិតតែអាជីពជាសិល្បករចាប៉ីនេះមិនបានធ្វើឱ្យលោកមានជីវភាពថ្កុំថ្កើងដូចជាសិល្បៈសម័យ តែលោកនៅតែពេញចិត្តនឹងការងារនេះ ព្រោះលោកស្រលាញ់និងមាននិស្ស័យនឹងសិល្បៈបុរាណ។ អ្វីដែលធ្វើឱ្យលោកមិនអាចបោះបង់ចោលការខិតខំប្រឹងប្រែងនេះ ក៏ព្រោះតែលោកចង់ចូលរួមថែរក្សា មរតកសិល្បៈបុរាណខ្មែរទុកឱ្យកូនចៅជំនាន់ក្រោយបានចេះនិងផ្សព្វផ្សាយបន្ត៕

គួរបញ្ជាក់ដែរថា លោក ពេជ សារ៉ាត គឺជាកូនសិស្សលោកព្រឹទ្ធាចារ្យ គង់ ណៃ លោកមានស្រុក កំណើតនៅខេត្តតាកែវ និងបានចាប់អាជីពច្រៀងចាប៉ីក្នុង ឆ្នាំ ២០០៧៕

អត្ថបទៈ ប៉ូ សាគុន