ថ្ងៃនេះ ជាថ្ងៃដំបូងនៃការកម្ទេចសំណង់អគារប៊ូឌីញទ្រង់ទ្រាយធំ
- 2017-07-27 10:17:04
- ចំនួនមតិ 0 | ចំនួនចែករំលែក 0
ថ្ងៃនេះ ជាថ្ងៃដំបូងនៃការកម្ទេចសំណង់អគារប៊ូឌីញទ្រង់ទ្រាយធំ
ចន្លោះមិនឃើញ
តាមសេចក្ដីរាយការណ៍ពីក្រុមការងារ Sabay កំពុងស្ថិតនៅតំបន់អគារប៊ូឌីញ "ស" បានឲ្យដឹងថា ថ្ងៃនេះ ជាថ្ងៃដំបូងនៃការកម្ទេចសំណង់អគារប៊ូឌីញទ្រង់ទ្រាយធំ ស្របពេលដែលមេឃបានបន្ថែមដំណក់ទឹកភ្លៀងតាំងពីព្រឹកព្រលឹមផងដែរ។
ក្រោយពីការរៀបចំសណ្ដាប់ធ្នាប់ និងតេស្តគ្រឿងម៉ាស៊ីន កាលពីប៉ុន្មានថ្ងៃមុន សម្រាប់ថ្ងៃនេះ ក្រុមជំនាញការវាយកម្ទេចអគារនេះ បាននាំយកសម្ភារៈសំខាន់ៗមួយចំនួនដូចជា អេស្កាវេទ័រចំនួន ៣គ្រឿង និងឡានទឹកជាដើម សម្រាប់កម្ទេចដោយរលូន។ មុននេះបន្តិច គេបានវាយកម្ទេចត្រង់ចំណុចជិតទូតរ៉ូស្ស៊ី ហើយគេនឹងបន្តប្រតិបត្តិការទៀត ពេលដែលមិនសូវមានពលរដ្ឋធ្វើដំណើរ ឬម៉ោងសម្រាកពីការងារ។ នេះបើតាមការបញ្ជាក់ពីក្រុមការងារ Sabay។
លោក ហេង ប៊ុននី អ្នកជំនាញការវាយកម្ទេចអគារ និងជាតំណាងឲ្យក្រុមហ៊ុន ព្រះពិស្ណុការ បានប្រាប់ Sabay ថា រយៈពេលនៃការកម្ទេច យ៉ាងហោចណាស់ក៏ ៣ខែកន្លះ ទៅ ៤ខែដែរ ព្រោះជួបប្រទះការលំបាកមួយចំនួនត្រូវដោះស្រាយ ដូចជាខ្លាចហ៊ុយ ឬធ្លាក់កម្ទេចនានាទៅលើអគារជិតៗនោះ។ លោកថា ក្រុមការងារនឹងព្យាយាមធ្វើយ៉ាងណា ដើម្បីកុំឲ្យប៉ះពាល់ដល់អ្នកជិតខាងខ្លាំងពេក។
តំណាងក្រុមហ៊ុនរូបនេះ ក៏បានស្នើសុំអ្នកជិតខាង មានការយោគយល់អធ្យាស្រ័យ ចំពោះការប៉ះពាល់ណាមួយ ដែលអាចកើតឡើង៕