កម្មវិធីប្រដាល់ជ្រើសរើសជើងឯករាជធានីភ្នំពេញ បិទបញ្ចប់ព្រឹកមិញ
- 2017-07-28 06:45:49
- ចំនួនមតិ 0 | ចំនួនចែករំលែក 0
កម្មវិធីប្រដាល់ជ្រើសរើសជើងឯករាជធានីភ្នំពេញ បិទបញ្ចប់ព្រឹកមិញ
ចន្លោះមិនឃើញ
កម្មវិធីប្រកួតកីឡាប្រដាល់សកលនិងគុនខ្មែរ ជ្រើសរើសជើងឯករាជធានីភ្នំពេញឆ្នាំ ២០១៧ នេះ បានធ្វើពិធីបិទបញ្ចប់រួចរាល់ហើយកាលពីព្រឹកមិញនេះនៅកីឡដ្ឋានស្តាតចាស់។
ឯកឧត្ដម តែម ម៉ឺន ដែលជាប្រធានសហព័ន្ធប្រដាល់គុនខ្មែរ បានឲ្យដឹងថា សម្រាប់ការប្រកួតជ្រើសរើសជើងឯករាជធានីភ្នំពេញ មើលទៅដំណើរការបានយ៉ាងល្អ។ លោកយល់ឃើញថា កម្មវិធីនេះជាចលនាមួយបំផុសដល់យុវជន ឲ្យងាកមកចាប់យកកីឡា ដើម្បីសុខភាពល្អ និងគេចផុតការប្រព្រឹត្តិអ្វីដែលខុសឆ្គង ហើយអាចជាការបង្កើនធនធានកីឡាករ កីឡាការិនី បន្ថែមទៀត។
ឯកឧត្ដមបន្តទៀតថា កម្មវិធីនេះគឺរួមចំណែកជួយអភិវឌ្ឍន៍វិស័យប្រដាល់គុនខ្មែរ ឲ្យរីកចម្រើនបន្ថែមទៀត តាមរយៈការផ្សព្វផ្សាយដល់សិស្សានុសិស្សដែលបានមកទស្សនា ឲ្យបានដឹងថាគុនខ្មែរមានលក្ខណៈពិសេសយ៉ាងណា។ កម្មវិធីនេះដែរ អាចជួយស្វែងរកកីឡាករ កីឡាការិនីពន្លកថ្មីៗ ដែលពួកគេមានសមត្ថភាព ដើម្បីយកទៅបណ្ដុះបណ្ដាលបន្ថែមទៀត។
ការប្រកួតប្រដាល់សកល និងគុនខ្មែរ ជ្រើសរើសជើងឯករាជធានីភ្នំពេញឆ្នាំ២០១៧ នេះប្រព្រឹត្តិទៅអស់រយៈពេល៥ថ្ងៃគឺចាប់ពីថ្ងៃទី២៤ ដល់ ទី២៨ ខែកក្ដដា ឆ្នាំ២០១៧ នៅកីឡដ្ឋានស្តាតចាស់ ក្រោមការចូលរួមពីសំណាក់ក្លឹបប្រដាល់មួយចំនួនក្នុងរាជធានីភ្នំពេញ៕