សហគមន៍ទេសចរណ៍ធម្មជាតិសំបូរព្រៃគុកត្រូវប៉ាន់ ក្រោយចូលជាបេតិកភ័ណ្ឌពិភពលោក

2017-07-30 03:43:04
ចំនួនមតិ 0 | ចំនួនចែករំលែក 0

ចន្លោះមិនឃើញ

សហគមន៍ទេសចរណ៍ធម្មជាតិមួយត្រូវបានបង្កើតឡើងតាំងពីឆ្នាំ២០១១ មកដល់ពេលនេះ បានបោះជំហានរឹងមាំ ហើយថែមទាំងម្ចាស់ការស្វែងរកប្រភពចំណូល ដោយខ្លួនឯងទៀតផង ។

ឥឡូវនេះស្របពេល ដែលប្រាសាទសំបូរព្រៃគុកបានចូលជាបេតិកភ័ណ្ឌពិភពលោកកាលពីពេលថ្មីៗនេះ រឹតតែធ្វើឱ្យសហគមន៍ទេសចរណ៍មួយនេះត្រូវប៉ាន់ថែមទៀត ទៅលើការទទួលទេសចរចូលទិញរបស់របរ ម្ហូបអាហារ សា្នក់នៅកាន់តែច្រើនថែមទៀត ។ លោក សេង អាន ប្រធានមន្ទីរទេសចរណ៍ខេត្តកំពង់ធំ បានប្រាប់ឱ្យដឹងនៅថ្ងៃនេះ ថាសហគមន៍ ទេសចរណ៍ធម្មជាតិធម្មជាតិមួយនេះដំបូងឡើយបង្កើតឡើងដោយក្រសួងទេសចរណ៍តាំងពីឆ្នាំ ២០១១ ក្រោមជំនួយថវិការដោយធនាគារអភិវឌ្ឍអាស៊ី អេឌីប៊ី ។ ដល់ឆ្នាំ ២០១៤ ជំនួយត្រូវបានផ្តាច់ដោយសារតែសហគមន៍ទេសចរណ៍នេះ ចេះដើរដោយខ្លួនឯងបានរឹងមាំ ហើយឈានទៅម្ចាស់ការស្វែងរកចំណូលចិញ្ចឹមខ្លួនដោយខ្លួនឯង ។ សហគមន៍នេះ មានក្រុមធ្វើវត្ថុអនុស្សាវរីយ៍ ជាអនុផលព្រៃឈើបានចំណូល ជាមធ្យម ២០ម៉ឺនរៀលក្នុងមួយថ្ងៃ ។

ក្រុមធ្វើភេសជ្ជៈជាទឹកសណ្តែក និងទឹកត្នោតលក់ក្នុងមួយថ្ងៃ ចំណេញ បានជាង២ម៉ឺនរៀល ។ ភោជនីយដ្ឋាន ៤កន្លែងបានទទួលទេសចរជាច្រើន សហគមន៍ក្រុមនេះបានផល កំរៃចូលកាក់កបជាងគេ ។ ក្រុមផលិតគ្រាប់ស្វាយចន្ទី ក៏ចេះធ្វើជំនួយខ្នាតតូចលក់ផលិតផលជូនភ្ញៀវទេសចរណ៍បានល្អប្រសើរ ។ ចំណែកក្រុមត្បាញសូត្រជួបការលំបាកក្នុងការផលិត ធ្វើឱ្យក្រុមនេះដួលទៅវិញ តែក្រុមត្បាញនេះបានងាកទៅរកត្បាញក្រមាវិញ ។

តំបន់ប្រាសាទព្រៃគុកនេះមានផ្ទះស្នាក់នៅ៩បន្ទប់ មានរទេះគោសំរាប់ជូនទេសចរកំសាន្តតាមប្រាសាទនានាថែមទៀតផង ។ ជារួមសហគមន៍ ទេសចរណ៍នេះមានសមាជិកភាគច្រើន ជាស្ត្រីក្រីក្រ ស្រីមេម៉ាយ ប្រមាណជាង ១០០នាក់កំពុងទទួលប្រាក់ចំណូលប្រចាំថ្ងៃ លើកស្ទួយការរស់នៅប្រចាំថ្ងៃ ។ ថ្មីៗនេះលោក ថោង ខុន រដ្ឋមន្ត្រីក្រសួងទេសចរណ៍បានចុះទៅបំពេញទស្សនៈកិច្ចនៅតំបន់ប្រាសាទសំបូរព្រៃគុក ក្រោយពីបានចូលជាបេតិកភ័ណ្ឌរួចមក ។ ហើយបានប្រាប់ទៅដល់សមាគមន៍ទេសចរណ៍នៅទីនេះ ឱ្យយកចិត្តទុកដាក់បំផុតទៅលើបដិសណ្ឋារកិច្ចល្អ ជូនទេសចរ ធ្វើសេវាកម្មបំរើ ទេសចរឱ្យមានគុណភាព ផលិតផលលក់ដូរ ហូបចុកទាំងអស់ឱ្យមានអនាម័យស្អាត ការពារកាក់សំណល់បរិស្ថានឱ្យបានល្អ ។ ពីព្រោះទីនេះនឹងក្លាយទៅជាគោលដៅទេសចរណ៍ថ្មីមួយ ដូចប្រាសាទអង្គរវត្ត និង ប្រាសាទព្រះវិហារអញ្ជឹង ។

ទីនេះនឹងមានកំណើនទេសចរកាន់តែច្រើន ក្រោយពីគេបានដឹងថាប្រាសាទសំបូរព្រៃគុក បានចូលជាបេតិកភ័ណ្ឌពិភពលោក ធ្វើឱ្យទេសចរបរទេស កាន់តែចូលមកទស្សនាកាន់តែច្រើនឡើងៗ ។ ដូច្នេះសហគមន៍ទេសចរណ៍នៅទីនេះ ក៏ទទួលបានចំណូលកាន់តែច្រើន តាមរយៈនៃការចូលបេតិកភ័ណ្ឌ ពិភពលោក នៃប្រាសាទសំបូរព្រៃគុករបស់យើង៕