ត្រីឆ្លាម Mako ជាត្រីឆ្លាមហែលលឿនជាងគេក្នុងសមុទ្រ

2017-07-30 04:16:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រីឆ្លាម Mako ជាអំបូរត្រីឆ្លាមពណ៌សដែលរស់នៅក្នុងមហាសមុទ្រ។ អំបូរត្រីឆ្លាមនេះ មានប្រភេទ Shortfin Makos និង Longfin Makos។ កត្តាដែលធ្វើអោយត្រីនេះលេចធ្លោ គឺល្បឿន ដោយត្រីឆ្លាម Shortfin Mako ជាប់កំណត់ត្រាជាត្រីឆ្លាមដែលហែលលឿនជាងគេបំផុត ក្នុងចំណោមត្រីដែលហែលបានលឿនដទៃទៀតក្នុងពិភពលោក។

តើត្រីឆ្លាម Mako អាចហែលបានលឿនប៉ុណ្ណា?

ត្រីឆ្លាម Shortfin Mako អាចហែលបានល្បឿនដល់ទៅ ៧៤ គីឡូម៉ែត្រក្នុងមួយម៉ោង ហើយខ្លះដល់ទៅ ៩៦ គីឡូម៉ែត្រក្នុងមួយម៉ោង។ វាមានរាងកាយស្រលូនរលោង ដែលធ្វើអោយវាហែលបានលឿនដោយគ្មានឧបសគ្គ។ ស្បែក ឬស្រកា ឬព្រុយ ដែលគ្របដណ្តប់លើខ្លួនត្រីឆ្លាម Mako មានទំហំតូច និងអាចបត់បែនបានយ៉ាងល្អ កំឡុងពេលហែល។ វាមិនត្រឹមតែហែលបានលឿននោះទេ វាក៏អាចផ្លាស់ប្ដូរទិសដៅកំឡុងពេលហែលបានលឿនផងដែរ ដែលធ្វើអោយវាជាអ្នកប្រមាញ់ដ៏សាហាវក្នុងសមុទ្រ។

តើត្រីឆ្លាម Mako បង្កគ្រោះថ្នាក់ដែរឬអត់?

ត្រីឆ្លាមដែលមានមាឌធំ រួមទាំង Mako អាចបង្កគ្រោះថ្នាក់បាន ដោយសារវាមានធ្មេញវែងមុតស្រួច និងល្បឿនរបស់វាដែលធ្វើអោយកាន់តែភ័យខ្លាច។ ត្រីឆ្លាម Mako ធម្មតាមិនហែលនៅទឹករាក់ៗ ឬឆ្នេរនោះទេ ដែលជាកន្លែងត្រីឆ្លាមប្រភេទផ្សេងធ្លាប់វាយប្រហារ។ អ្នកនេសាទសមុទ្រនៅទឹកជ្រៅ និង SCUBA បានជួបប្រទះត្រីឆ្លាម Shortfin Mako ជារឿយៗ។ តាមឯកសារត្រីឆ្លាម Mako ប្រាំបីក្បាលតែប៉ុណ្ណោះដែលធ្លាប់វាយប្រហារ ប៉ុន្តែគ្មានអ្នកស្លាប់នោះទេ។

តើត្រីឆ្លាម Mako មានរូបរាងម៉េចទៅ?

ត្រីឆ្លាម Mako ជាមធ្យមមានប្រវែង ៣ ម៉ែត្រ និងទម្ងន់ ១៣៦ គីឡូក្រាម ប៉ុន្តែត្រីនេះធំបំផុត មានទម្ងន់ដល់ទៅច្រើនជាង ៤៥៣ គីឡូក្រាម។ នៅពីក្រោមខ្លួន Mako មានពណ៌ទឹកប្រាក់ និងពណ៌ខៀវភ្លឺនៅខាងលើខ្លួន។ ចំណុចដែលខុសគ្នារវាង Shortfin Mako និង Longfin Mako គឺប្រវែងព្រុយ។ ត្រីឆ្លាម Longfin Mako មានព្រុយខាងមុខ (ដៃ) វែង ដែលអាចបត់បែនបានរហ័ស។ ខ្លួនត្រីឆ្លាម Mako មានរាងសាជី និងស៊ីឡាំង ដែលកាត់បន្ថយសំពាធ និងធ្វើអោយវាហែលបានលឿន។ កន្ទុយវា មានរាងដូចនឹងចំណិតព្រះចន្ទ ដែលជួយអោយការហែលរបស់វាមានលំនឹងយ៉ាងល្អ។ ត្រីឆ្លាម Mako មានមាឌធំ ភ្នែកពណ៌ខ្មៅ និង រន្ធស្រកី ប្រាំនៅសងខាងថ្ពាល់។ ធ្មេញដ៏វែងរបស់វា ធម្មតាលានចេញក្រៅមាត់។

តើត្រីឆ្លាម Mako ត្រូវបានចំណាត់ថ្នាក់យ៉ាងដូចម្តេច?

ត្រីឆ្លាម Mako ជាអំបូរត្រីឆ្លាម mackerel ឬ ស។ Mackerel មានមាឌធំ ដែលសម្គាល់ដោយ ថ្គាម និងរន្ធស្រកីវែង ព្រមទាំងល្បឿនរបស់វា។ អំបូរត្រីឆ្លាម mackerel មានប្រាំ រួមមាន Porbeagles, ត្រីឆ្លាម Salmon, Shortfin Makos, Longfin Makos និងត្រីឆ្លាមសរ។

វដ្ដជីវិតត្រីឆ្លាម Mako

មិនមានទិន្នន័យច្រើនអំពីការបន្តពូជរបស់ត្រីឆ្លាម Longfin Mako។ ត្រីឆ្លាម Shortfin Mako ចំណាយពេលច្រើនឆ្នាំទើបឈានដល់វ័យបន្តពូជ។ ត្រីឆ្លាមឈ្មោលអាចបន្តពូជបាននៅអាយុ 8 ឆ្នាំ ឬច្រើនជាងនេះ និងត្រីឆ្លាមញីចំណាយពេលយ៉ាងហោចណាស់ក៏ 18 ឆ្នាំ ដែរ។ ក្រៅពីអត្រាលូតលាស់យឺត ហើយត្រីឆ្លាម Shortfin Mako មានវដ្ដបន្តពូជដល់ ទៅ 3 ឆ្នាំ ដែលធ្វើអោយចំនួនត្រីឆ្លាមប្រភេទនេះងាយរងគ្រោះនឹងការផុតពូជ ប្រសិនបើមានការនេសាទហួសប្រមាណ។ ត្រីឆ្លាម Mako បង្កកំណើតនៅខាងក្នុង។ ត្រីឆ្លាមនេះពពោះរយៈពេល 18 ខែ ដែលមានកូនពី 8 ទៅ 10 ក្បាល ហើយអាចដល់ទៅ 18 ក្បាល។ ក្រោយពេលបង្កើតកូន Mako ញីមិនរួមភេទរយៈពេល 18 ខែ។

តើត្រីឆ្លាម Mako រស់នៅឯណា?

ត្រីឆ្លាម Mako ធ្វើដំណើរដល់ទៅ ៣ ២១៨ គីឡូម៉ែត្រ ឬច្រើនជាងនេះ ដែលភាគច្រើនមាននៅ មហាសមុទ្រអាត្លង់ទិច ប៉ាស៊ីហ្វិក និងឥណ្ឌា៕

ប្រភព៖ Thought Co ប្រែសម្រួល ៖ ប៊ុន ធឿន