តោះ! យើងរួមគ្នាដើម្បីបរិស្ថាន និងសហគមន៍ស្អាតទាំងអស់គ្នា

2017-08-07 05:12:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកដឹងទេការចូលរួមរបស់អ្នកក្នុងកម្រិតណាមួយនោះ ក៏បានចំណែកដល់ការពារបរិស្ថាន និងអនាម័យសម្រាប់សហគមន៍យើងបានដែរ។ តើអ្នកទាំងអស់គ្នាដឹងទេកម្មវិធី Green Up the City 2017 កាលពីម្សិលមិញ បានដឹកនាំនិស្សិតជិត ៣០០នាក់ ទៅកាន់ស្រុកសំរោងទង ខេត្តកំពង់ស្ពឺ ដើម្បីចូលរួមដាំដើមឈើក្នុងសាលារៀន និងអប់រំកុមារតូចពីអនាម័យក្នុងការរស់នៅ ក៏ដូចជាការគ្រប់គ្រងសំរាម។

ការដាំដើមឈើ និងការគ្រប់គ្រងសំរាមក្នុងសហគមន៍ត្រូវការ ការចូលរួមពីយើងទាំងអស់គ្នា។ ថ្លែងក្នុងកិច្ចបើកកម្មវិធីនៅក្នុងរមណីយដ្ឋានអំពែភ្នំ កាលពីម្សិលមិញ អនុប្រធានមន្ទីរបរិស្ថានខេត្តកំពង់ស្ពឺ លោក សូ សុផល ថ្លែងថា ការគ្រប់គ្រងសំរាមបានល្អ គឺកើតចេញពីការចូលរួមរបស់យើងគ្រប់គ្នា។ «បើយើងចូលរួមគិតទាំងអស់គ្នា សំរាមមិននៅរាយប៉ាយនោះទេ...យើងត្រូវរួមគិតទាំងអស់គ្នា...សំរាមជាដើមហេតុបង្កនូវជំងឺផ្សេងៗ»។

ដោយឡែក ការដាំដើមឈើបានរួមចំណែកធ្វើឲ្យសហគមន៍មានពណ៌បៃតង និងថាដើមឈើរួមចំណែកកាត់បន្ថយកម្ដៅនៅលើផែនដី និងស្រូបយកជាតិកាបូនជាដើម។

បន្ទាប់ពីការបើកម្មវិធី យុវជនបានធ្វើដំណើរទៅកាន់សាលាបឋមសិក្សាអំពែភ្នំ និងសាលាបឋមសិក្សាវាលមានជ័យ ដើម្បីចូលរួមដាំដើមឈើ នៅក្នុងសាលាទាំងពីរ និងអប់រំសិស្សពីការគ្រប់គ្រងសំរាម និងការរក្សាអនាម័យខ្លួនប្រាណ។

យុវជន អ៊ុំ ចាន់ណារិទ្ធ ដែលបានចូលរួមក្នុងសកម្មភាពនេះថ្លែងថា Green Up the City ជាកម្មវិធីមួយដែលរស់រវើក អ្នកចូលរួមបានរួមចំណែកក្នុងការជួយ ដល់សហគមន៍ទាំងផ្នែកបរិស្ថាន និងមនុស្សធម៌។ ជាងនេះទៅទៀតលោកថា កម្មវិធីនេះក៏បានបង្កនូវបរិយាកាសល្អដល់យុវជនបានស្គាល់គ្នា ដែលបានមកពីតាមសាកលវិទ្យាល័យនានា ក៏ដូចជាមានទំនាក់ទំនងជាមួយសហគមន៍។

«យើងបានជួយសង្គម ដូចជាការដាំដើមឈើ សំអាតបរិស្ថាន និងបានស្គាល់គ្នាកាន់តែច្រើន»។

គួរបញ្ជាក់ថា កម្មវិធី Green Up the City 2017 ត្រូវបានបង្កើតឡើងកាលពីឆ្នាំ ២០១៥ ដោយមានគោលបំណងផ្សារភ្ជាប់រវាងយុវជន និងសហគមន៍ ជាមួយនឹងការចែកសម្ភារ សិក្សាដល់សិស្សនៅតាមសាលបឋមសិក្សា ជាពិសេសគឺផ្ដល់ការអប់រំពីការគ្រប់គ្រងសំរាមដល់កុមារតូច និងបណ្ដុះគំនិតស្រលាញ់បរិស្ថានដល់កុមារទាំងនោះ៕