ហួន ទីណារ័ត្ន សិស្សឆ្នើមនិទ្ទេស A ប្រាប់ពីគន្លឹះប្រឡងគណិតវិទ្យាឱ្យបានពិន្ទុល្អបំផុត

2017-08-09 06:38:35
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការលើកឡើងរបស់សិស្សធ្លាប់ប្រឡងបាក់ឌុបពីឆ្នាំមុនៗនិយាយថា គណិតវិទ្យា ជាមុខវិជ្ជាពិបាកជាងគេបំផុតក្នុងការប្រឡង។ ដូច្នេះគួរមានគន្លឹះដូចម្ដេច ដើម្បីរៀនមុខវិជ្ជាឱ្យបានល្អ និងអាចស្រូបយកពិន្ទុបានច្រើនពេលប្រឡង? ខាងក្រោមនេះជាការចែករំលែកពីសិស្សឆ្នើមនិទ្ទេស A ឆ្នាំ២១០៦ ហួន ទីណារ័ត្ន អាចយកលំដាប់ពិន្ទុ A ទៅលើមុខវិជ្ជាគណិតវិទ្យា រូបវិទ្យា គីមីវិទ្យា និងជីវវិទ្យា។

១. ខិតខំរៀនតាំងពីថ្នាក់ទី១១

ហូន ទីណារ័ត្ន ប្រាប់ថា ដើម្បីបានពិន្ទុល្អទៅលើមុខវិជ្ជាគណិតវិទ្យាពេលប្រឡងបាក់ឌុបនោះ ចំណុចសំខាន់បំផុត គឺគ្រឹះមូលដ្ឋានពីថ្នាក់ទី ១១។ ណារ័ត្នប្រាប់ថា ដោយសារមេរៀន និងលំហាត់ថ្នាក់ទី១២ស្ទើរទាំងស្រុងមានទំនាក់ទំនងតាំងពីថ្នាក់ទី១១មក ហើយលំហាត់ រូបមន្តកាន់តែជ្រៅឡើង។ ដូច្នេះហើយត្រូវច្បាស់តាំងពីថ្នាក់ក្រោមមក មិនមែនទើបតែខំពេលមកដល់ថ្នាក់ទី១២ទេ។

២. ការអនុវត្ត

ណារ័ត្ន ប្រឡងគណិតវិទ្យាបានលំដាប់និទ្ទេស A ប្រាប់មួយចំណុចទៀតថា ការអនុវត្តគឺជារឿងសំខាន់បំផុត មិនមែនរៀនតែទ្រឹស្ដីនោះទេ។ យុវជនរូបនេះ ប្រាប់ទៀតថា នៅពេលជាមួយគ្រូអាចយល់ទៅលើមេរៀននោះ តែពេលត្រឡប់មកដល់ផ្ទះមិនគួរទុកចោលនោះទេ ព្រោះអាចភ្លេចទៅវិញ។ អ្វីដែលសំខាន់បំផុតនោះ នៅពេលរៀនចប់មេរៀនណាមួយត្រូវធ្វើលំហាត់ទៅលើមេរៀននោះឱ្យបានច្រើនបំផុត រហូតចេះចាំស្ទាត់ ទើបបន្តទៅមេរៀនមួយទៀត។

៣. មុនប្រឡងបាក់ឌុប១ខែផ្អាករៀនគួរ

មកដល់ចំណុចនេះណារ័ត្នប្រាប់ថា គួរផ្អាករៀនគួរសិនដើម្បីមានពេលវេលាសាកល្បងពីសមត្ថភាពខ្លួនឯងដូចជាសាកល្បងធ្វើលំហាត់ឡើងវិញទាំងអស់ ការចងក្រងរូបមន្តជាដើម ហើយប្រសិនបើមានកន្លែងណាឆ្ងល់អាចសួរគ្រូវិញបាន។ ជាពិសេសការអនុវត្តទៅលើលំហាត់អនុគមន៍ ដោយសារតែវាលំបាកជាងគេ ហើយតែងចេញនៅពេលប្រឡងជារៀងរាល់ថ្ងៃ។ យុវជនរូបនេះប្រាប់ថា ប្រសិនបើសម្រុករៀនគួរខ្លាំងមុនពេលប្រឡង ហាក់មិនសូវមានប្រសិទ្ធភាពនោះទេ ដោយសារតែមិនមានពេលវេលាសម្រាប់ខ្លួនឯង ក្នុងការសាកល្បងសមត្ថភាព។

៤. យកវិញ្ញាសាចាស់ៗមកធ្វើឡើងវិញ និងដាក់ម៉ោងកំណត់

ចំពោះវិធីសាស្ត្រនេះ គួរអនុវត្តមុនពេលការប្រឡងកាន់តែជិតមកដល់ គឺត្រូវយកវិញ្ញាសាចាស់មកធ្វើឡើងវិញ និងដាក់ម៉ោងកំណត់ទៅតាមក្រសួង ដើម្បីអាចគ្រប់គ្រងពេលវេលាបានល្អ។ ចំណុចសំខាន់មួយទៀតគឺមើលពីរបៀបនៅក្នុងការធ្វើអត្រាកំណែចាស់ៗ ថាតើរបៀបគេសរសេរយ៉ាងម៉េចទើបបានពិន្ទុ។ ដូច្នេះត្រូវមើលពីរបៀបក្នុងការធ្វើចម្លើយ ពេលខ្លះទោះចម្លើយមិនបានត្រឹមត្រូវ តែក្នុងការសរសេរមានចំណុចខ្លះត្រូវ ក៏ក្រសួងឱ្យពិន្ទុដែរ។

៥. ធ្វើលំហាត់ពីលើចុះក្រោម

ណារ័ត្នប្រាប់ថា ភាគច្រើនលំហាត់ស្រួលៗគឺនៅខាងលើ ចំណែកលំហាត់លំបាកៗនៅចុងក្រោយគេ។ ដូច្នេះដើម្បីកុំឱ្យអារម្មណ៍តានតឹង មិនគួរយកលំហាត់ណាលំបាកមកគិតមុននោះទេ ព្រោះអាចបែកអារម្មណ៍ គួរធ្វើលំហាត់ស្រូលៗឱ្យអស់សិន។ ចំណែកឯលំហាត់ណាពិបាកទុកធ្វើពេលក្រោយ តែយ៉ាងណាត្រូវផ្ទៀងផ្ទាត់ពេលវេលាឱ្យច្បាស់ ហើយសំខាន់បំផុតមិនត្រូវចោលលំហាត់ណាមួយដាច់ខាត៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ