ត្រឹម៣ថ្ងៃនៅជប៉ុន សម្ដេច ហ៊ុន សែន នឹងនាំសមិទ្ធផលធំៗទាំងនេះជូនពលរដ្ឋខ្មែរ

2017-08-10 02:09:59
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេល៣ថ្ងៃសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើដំណើរទស្សនកិច្ចនៅប្រទេសជប៉ុន គិតចាប់ពីថ្ងៃទី ០៦ ខែសីហា រហូតដល់ថ្ងៃទី ០៩ ខែសីហា ឆ្នាំ២០១៧ ដើម្បីជួបប្រជុំជាមួយនាយករដ្ឋមន្ត្រីជប៉ុន Shinzo Abe ។ តើអំឡុងទស្សនៈកិច្ច៣ថ្ងៃនោះ សម្ដេច ហ៊ុន សែន សម្រេចកិច្ចការធំៗអ្វីខ្លះ ជាមួយមេដឹកនាំជប៉ុន?

រូបភាព៖ ហ្វេសប៊ុកសម្ដេច ហ៊ុន សែន

**១. ចំណតនាវាខ្នាតយក្សតម្លៃ ២០៩លានដុល្លារសហរដ្ឋអាមេរិក**

លោកនាយករដ្ឋមន្ត្រីជប៉ុន Shinzo Abe បានសម្រេចផ្ដល់កម្ចីឥណទានសម្បទានប្រមាណ ២០៩ លានដុល្លារដល់កម្ពុជា សម្រាប់អនុវត្តគម្រោងអភិវឌ្ឍន៍ចំណតផែកុងតឺន័រថ្មីរបស់កំពង់ផែស្វយ័តក្រុងព្រះសីហនុ ក្នុងថ្ងៃដែលសម្ដេច ហ៊ុន សែន នាយករដ្ឋមន្ត្រី ទៅទស្សនកិច្ចនៅប្រទេសជប៉ុន។

២.គម្រោងធ្វើឱ្យប្រសើរឡើងវិញការការពារគ្រោះទឹកជំនន់ក្នុងរាជធានីភ្នំពេញ

ជប៉ុនផ្ដល់ហិរញ្ញប្បទានឥតសំណងមកដល់កម្ពុជា សម្រាប់អនុវត្តគម្រោងធ្វើឱ្យប្រសើរឡើងវិញការការពារទឹកជំនន់ក្នុងរាជធានីភ្នំពេញ ដំណាក់កាលទី០៤ ដែលមានទឹកប្រាក់សរុប ប្រមាណជា៣៥លានដុល្លារសហរដ្ឋអាមេរិក។

៣. គម្រោងបង្កើតរថភ្លើងស្វ័យប្រវត្តិលើអាកាសក្នុងរាជធានីភ្នំពេញ

តបតាមសំណើរបស់សម្តេច ហ៊ុន សែន លោកនាយករដ្ឋមន្រ្តីជប៉ុន Shinzo Abe បានឯកភាពជំរុញ ការអនុវត្តគម្រោងអាទិភាពមួយចំនួន ក្នុងនោះជប៉ុន នឹងសិក្សាគម្រោងបង្កើតរថភ្លើងធុនស្រាលស្វ័យប្រវត្តិលើអាកាសនៅរាជធានីភ្នំពេញ។ នេះបើតាមសេចក្តីប្រកាសព័ត៌មានស្តីពីលទ្ធផលនៃដំណើរទស្សនកិច្ចរបស់សម្តេច ហ៊ុន សែន នៅជប៉ុន របស់ក្រសួងការបរទេស នៅថ្ងៃទី៨សីហា។

រូបតំណាង

គម្រោងបង្កើតរថភ្លើងធុនស្រាលនេះ នឹងជួយកាត់បន្ថយការកកស្ទះចរាចរ និងគ្រោះថ្នាក់ចរាចរ នៅរាជធានីភ្នំពេញ ព្រមទាំងទាក់ទាញភ្ញៀវទេសចរមកកម្ពុជា។

សម្តេច ហ៊ុន សែន បានលើកឡើងក្នុងអំឡុងពេលជួបសំណេះសំណាលជាមួយនិស្សិតខ្មែរនៅជប៉ុនថា គម្រោងរថភ្លើងធុនស្រាលស្វ័យប្រវត្តិ ពីរាជធានីភ្នំពេញ ទៅព្រលានយន្តហោះអន្តរជាតិ គឺមានទំហំទឹកប្រាក់ប្រមាណ ៨០០លានដុល្លារ។

៤. គម្រោងបង្កើតរោងចក្រកែច្នៃសំរាមក្នុងរាជធានីភ្នំពេញ

ក្នុងអំឡុងពេលទស្សនកិច្ចរោងចក្រកែច្នៃសំរាមនៅប្រទេសជប៉ុន សម្ដេច ហ៊ុន សែន មានការចាប់អារម្មណ៍ខ្លាំង និងចង់បង្កើតឱ្យមាននៅក្នុងរាជធានីភ្នំពេញ ដើម្បីដោះស្រាយបញ្ហាសំរាមក្នុងទីក្រុង ហើយកែច្នៃឱ្យទៅជារបស់មានតម្លៃដូចនៅជប៉ុនដែរ។ សម្ដេច ហ៊ុន សែន បានស្នើសុំទៅកាន់ប្រទេសជប៉ុនរួចរាល់ហើយ ប៉ុន្តែមិនទាន់មានការឆ្លើយតបយ៉ាងណានោះទេ៕

ចុចអាន៖

អត្ថបទ៖ វឌ្ឍនៈ