ឈិត សារឹម អេ ភូថង តែម ម៉ឺន និយាយអ្វីខ្លះ ចំពោះកំពូលអ្នកប្រដាល់៥រូប ទៅស៊ីហ្គេម
- 2017-08-10 23:31:00
- ចំនួនមតិ 0 | ចំនួនចែករំលែក 0
ឈិត សារឹម អេ ភូថង តែម ម៉ឺន និយាយអ្វីខ្លះ ចំពោះកំពូលអ្នកប្រដាល់៥រូប ទៅស៊ីហ្គេម
ចន្លោះមិនឃើញ
គ្រូប្រដាល់ជើងចាស់ដែលមានបទពិសោធក្រាស់ក្រែល និងសាងកេរ្តិ៍ឈ្មោះល្បីល្បាញនាពេលអតីតកាលគឺលោកគ្រូ ឈិត សារឹម និង អេ ភូថង ថាពួកលោកពិតជាមានសង្ឃឹមខ្ពស់លើកីឡាករជម្រើសជាតិគុនខ្មែរបច្ចុប្បន្ននឹងយកមេដាយបាននៅស៊ីហ្គេម ២០១៧ នេះ។
លោកគ្រូ ឈិត សារឹម បានលើកឡើងថា បច្ចុប្បន្ននេះលោកកំពុងសម្រុកបង្វឹកពួកគេខ្លាំងជាពិសេសនោះគឺផ្ដោតលើកម្លាំងកាយតែម្ដង បើនិយាយពីបច្ចេកទេស និងបទពិសោធប្រកួតលើសង្វៀនពួកមានអស់ហើយ។ ចំពោះការហ្វឹកហាត់កម្លាំងនោះ គឺតម្រូវឲ្យកីឡាករទាំងអស់រត់ឡើងជណ្ដើរ និងរត់ជម្រេញ ២ ទៅ ៣ដងក្នុងមួយពេល ហើយប្រៀបធៀបនាទីរបស់ពួកគេ។ គ្រូប្រដាល់តាំងពីសង្គមដើមរូបនេះបន្ថែមទៀតថា ក្នុងចិត្តលោកពិតជាចង់ឲ្យពួកគេប្រកួតបានមេដាយណាស់ ប៉ុន្តែក៏មិនហ៊ានថា នឹងបាន ១០០ % ព្រោះការប្រកួតនេះវាខុសពីការប្រកួតធម្មតា ដោយតម្រូវឲ្យកីឡាករប៉ះឧបករណ៍ការពារច្រើន វាមិនទម្លាប់សម្រាប់កីឡាករ ហើយឧបករណ៍វាកាត់បន្ថយទម្ងន់ដៃ ឬជើងពេលវ៉ៃត្រូវទៀតផង។
ចំពោះលោកគ្រូ អេ ភូថង ក៏បានឲ្យដឹងដែរថា ចំពោះលោកជាគ្រូបង្វឹកផ្ទាល់របស់ពួកគេ សង្ឃឹមទាំងអស់លើកីឡាករជម្រើសជាតិទាំង៥រូបនេះតែម្ដង ព្រោះសព្វថ្ងៃមើលឃើញថាពួកគេមានការខំប្រឹងប្រែងណាស់ អ្វីដែលលោកប្រាប់ និងបង្ហាត់បង្ហាញនោះ គឺពួកគេស្ដាប់បង្គាប់ និងធ្វើតាមជានិច្ច។ ចំពោះសមត្ថភាពរបស់ពួកគេនាបច្ចុប្បន្ននេះគឺមិនទាន់ថាបានដល់១០០% ទេ ប៉ុន្តែក៏ក្បែរនេះដែរ។ ទន្ទឹមនិងនេះដែរ គ្រូប្រដាល់ជម្រើសជាតិខាងលើក៏មានការបារម្ភខ្លះៗដែរចំពោះប្រទេសថៃ និងប្រទេសវៀតណាម ព្រោះពួកគេមានកម្លាំងស៊ុហ្វខ្លាំង តែបច្ចេកទេសនោះគឺមិនហួសពីកម្ពុជានោះឡើយ។
អ្នកប្រដាល់កណ្ដាប់ដៃថ្ម ម៉ឺន សុភា បានបង្ហាញចំណាប់អារម្មណ៍មុនទៅស៊ីហ្គេមនេះដែរថា សម្រាប់ការប្រកួតនៅថ្ងៃខាងមុខក្នុងព្រឹត្តិការណ៍នេះ គេមានទំនុកចិត្តខ្លាំងលើខ្លួនឯង ព្រោះវាចូលនិងជំនាញរបស់គេគឺម៉ាត់ និងវ៉ៃប្រយោល។ នាការប្រកួតរបស់គេកន្លងមកគឺចូលចិត្តវ៉ៃរបៀបនេះ ហេតុនេះហើយទើបធ្វើឲ្យគេសង្ឃឹមខ្ពស់ចំពោះការប្រកួតខាងមុខ។ និយាយពីការហ្វឹកហាត់បច្ចុប្បន្ននេះគឺគេហ្វឹកហាត់បានល្អណាស់ ព្រមទាំងទទួលបានចំណេះដឹងបានច្រើនពីគ្រូៗជើងចាស់ដែលមានបទពិសោធច្រើន ហើយសព្វថ្ងៃនេះហ្វឹកហាត់ផ្ដោតលើការវ៉ៃប្រយោលនេះតែម្ដង។
ឯកឧត្ដម តែម ម៉ឺន ប្រធានសហព័ន្ធគុនខ្មែរ បានឲ្យលើកថា សម្រាប់ការចេញទៅស៊ីហ្គេមឆ្នាំនេះ សហព័ន្ធបានរៀបចំរួចរាល់ហើយ ក្នុងនោះមានប្រតិភូ គ្រូបង្វឹក និងកីឡាករ៥រូបទៅចូលរួមក្នុងការប្រកួតនេះស៊ីហ្គេម ២០១៧។ ចំពោះការប្រមូលផ្ដុំ និងការហ្វឹកហាត់វិញគឺពួកគេធ្វើតាមកម្មវិធីបានល្អហើយ ទន្ទឹមនិងការហ្វឹកហាត់នេះក៏មានការប្រកួតកម្ដៅសាច់ដុំតាមស្ថានីយផ្សេងៗផងដែរ។ ជាលទ្ធផលមើលឃើញថាល្អ មិនថាវិន័យ បច្ចេកទេស កម្លាំងថាមពល និងប្រាជ្ញានោះទេ គឺមានការកើនឡើងខុសពីមុនដោយសារមានការគ្រប់គ្រងបានម៉ត់ចត់។ ប្រធានសហព័ន្ធរូបនេះក៏មានសេចក្ដីសង្ឃឹមចំពោះកីឡាកររបស់ខ្លួនថានឹងអាចដណ្ដើមបានមេដាយ ព្រោះកីឡាករទាំងនោះបានហ្វឹកហ្វឺនត្រឹមត្រូវ និងមានបទពិសោធច្រើននាពេលកន្លងមក ហើយពួកគេជាកីឡាករលំដាប់លេខ១ក្នុងប្រទេសផងដែរ។
ជាចុងក្រោយលោកគ្រូ ឈិត សារឹម និង អេ ភូថង ក៏សូមផ្ដាំផ្ញើដល់ប្រជាជនកម្ពុជាទាំងអស់ ជាពិសេសអ្នកចូលចិត្តវិស័យប្រដាល់កុំភ្លេចជួយគាំទ្រដល់កីឡាករជម្រើសជាតិគុនខ្មែរដែល នឹងប្រកួតនៅប្រទេសម៉ាឡេស៊ីនាប៉ុន្មានថ្ងៃខាងមុខនេះ។ ដើម្បីឲ្យកីឡាករទាំងអស់មានកម្លាំងចិត្តបន្ថែមទៀតក្នុងការប្រកួតយកមេដាយជូនជាតិ។ សម្រាប់ប្រភេទកីឡាគុនខ្មែរ នឹងចេញពីកម្ពុជានៅថ្ងៃទី២៥ សីហានេះដើម្បីទៅចូលរួមក្នុងព្រឹត្តិការកីឡាស៊ីហ្គេម ២០១៧ នេះ នៅប្រទេសម៉ាឡេស៊ី៕
ស្រាបៀរអង្គរមានមោទនភាពគាំទ្រអត្តពលិកជាតិចូលរួមប្រកួតកីឡាស៊ីហ្គេម ២០១៧ #ឆន្ទៈយើងបេះដូងយើង។