រំជួលចិត្ត! មានជំងឺព្យាបាលមិនជា តែ ពេជ្រ ចរណៃ ខំហាត់គុនខ្មែរ១មានប្រវត្តិជាង២០០០ឆ្នាំ ព្រោះ...(វីដេអូ)

2017-08-10 02:53:43
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីដែលបាត់មុខពីសិល្បៈមួយរយៈធំ ព្រោះតែជំងឺកាចសាហាវ ពេជ្រ ចរណៃ បានត្រលប់មកវិញជាមួយរាងមាំមួនជាងមុន មិនត្រឹមតែប៉ុណ្ណោះនាងបានហាត់ល្បុក្កតោ ព្រោះខ្លាចបាត់បង់ដោយសារប្រទេសជិតខាង និងដើម្បីថតរឿងថ្មី។

ចរណៃ មានជំងឺដាច់សរសៃប្រើសបេះដូងជាប់ខ្លួន បញ្ជាក់ប្រាប់ Sabay ពីមូលហេតុដែលនាងសស្រាក់សស្រាំក្នុងការហាត់ក្បាច់គុននេះថា ដោយសារនាងគ្រងតំណែងជាតួឯកមួយក្នុងរឿងប្រភេទវាយប្រហារ គឺរឿង"អាគមស្បែកដាច" ដែលតម្រូវឲ្យនាងដើរតួជាមនុស្សស្រីម្នាក់ចេះវ៉ៃ ដូច្នេះហើយទើបរូបនាងខំដើររកកន្លែងដើម្បីហាត់ក្បាច់គុននេះ។

លុះហាត់យូរៗទៅ នាងកើតចិត្តស្រលាញ់ក្បាច់គុនដែលជាកេរ្តិ៍ដំណែលពីដូនតា និងមានប្រវត្តិជាយូរលង់មកហើយនេះ។

"ខ្ញុំខំហាត់ មិនត្រឹមតែដើម្បីថតកុនទេបង! គឺខ្ញុំចង់ថែរក្សា និងផ្សព្វផ្សាយក្បាច់គុននេះ ព្រោះមានអ្នកខ្លះយល់ច្រឡំថា ខ្មែរយើងចម្លងវាមកពីថៃ តែតាមពិតវាជាក្បាច់គុនខ្មែរសុទ្ធសាធ ដែលមានប្រវត្តិជាង ២ ០០០ ឆ្នាំហើយ"។ នាងថ្លែង។

តារាដែលចិញ្ចឹមជំងឺព្យាបាលមិនជានេះ លើកឡើងថា ខ្លួនធ្លាប់ជួបឧបសគ្គជាច្រើនក្នុងការហាត់នេះ ត្បិតអីខ្លួនជាស្រីដែលមានសុខភាពមិនសមប្រកបផង ហើយហាត់ជាមួយមនុស្សប្រុសជាច្រើននៅក្នុងទីអារាមដែលធ្វើឲ្យមហាជនជាច្រើនរិះគន់។

“កន្លងមកមានគេរិះគន់ថា ខ្ញុំជាស្រីមិនសមស្លៀកពាក់បែបនេះទៅហាត់នៅក្នុងវត្តអ៊ីចឹងឡើយ តែតាមពិតនេះ គឺឯកសណ្ឋានល្បុក្កតោ ហើយល្បុក្កតោពិតជាមានដើមកំណើតចេញពីក្នុងវត្ត។ ខ្ញុំសង្ឃឹមថាបងប្អូនទាំងឡាយបានយល់ និងជួយគាំទ្រក្បាច់គុនមួយនេះ"។ នាងបន្ត។

បច្ចុប្បន្នតារាស្រីវ័យ២២ឆ្នាំរូបនេះ កំពុងបន្តហ្វឹកហាត់ជាមួយលោកគ្រូ ឆន ច័ន្ទវីរៈ នៅក្នុង "ក្លឹបល្បុក្កតោក្មេងវត្តថាន់" ដែលមានទីតាំងនៅក្នុងវត្តថាន់ផ្ទាល់តែម្ដង។ ការហាត់នេះទៀតសោត នាងអះអាងថា នាងនឹងមិនបញ្ឈប់បន្ទាប់ពីថតរឿងចប់ឡើយ ពោលគឺនៅតែបន្តទោះបីជាខ្លួនធ្លាប់ជួបការលំបាកជាច្រើនកន្លងមកក៏ដោយ៕

អត្ថបទ៖ សុខណា