Emmanuel ៖ មិនញញើតកីឡាករថៃ Watchralek ម្នាក់នេះទេ

2017-08-10 07:53:20
ចំនួនមតិ 0 | ចំនួនចែករំលែក 0

ចន្លោះមិនឃើញ

បរទេសដែលស្រឡាញ់គុនខ្មែរ និងចង់សាងកេរ្តិ៍ឈ្មោះនៅកម្ពុជា Emmanuel Onyedikachi ថាមិនញញើតនិងជើងខ្លាំងឆ្លងដែនមកពីប្រទេសថៃ Watchralek OR. Kwanmueng នោះទេ ហើយការប្រកួតស្អែកនេះអាចនឹងមិនដល់៥ទឹកផង។

កីឡាករ Emmanuel

កីឡាករគុនខ្មែរ Emmanuel បានឲ្យដឹងមុននេះថា សម្រាប់ការប្រកួតនៅថ្ងៃស្អែកជាមួយអ្នកប្រដាល់ជើងខ្លាំងរបស់ថៃ Watchralek គេបានត្រៀមខ្លួនរួចរាល់ហើយចំពោះការប្រកួតមួយនេះ។ បើទោះជាមានគេប្រាប់ខ្លួនថាថៃម្នាក់នេះខ្លាំង និងមានបទពិសោធច្រើន ហើយធ្លាប់ផ្ដួលអ្នកប្រដាល់កម្ពុជាខ្លាំងៗច្រើនរូបនាពេលកន្លងមកក្ដី តែ Emmanuel មិនមានចិត្តខ្លាចរអែងសូម្បីតែបន្តិច គេជឿជាក់លើខ្លួនឯងថា នឹងឈ្នះការប្រកួតមួយនេះ។

កីឡាករ Emmanuel

កូនសិស្សលោកគ្រូ ធី ណារិទ្ធិ ម្នាក់នេះបន្តទៀតថា សព្វថ្ងៃគេមានការហ្វឹកហាត់ខ្លាំងក្នុង១ថ្ងៃហាត់ចាប់ពី ៥ ទៅ ៦ ម៉ោងឯណោះ ទាំងការលើកដុំដែកយកកម្លាំងនិងគុនខ្មែរ។ ចំពោះការប្រកួតនេះដែរ គេក៏បានទទួលដំបូន្មានច្រើនពីលោកគ្រូ ធី ណារិទ្ធិ ចាន់ រតនា និងលោកគ្រូប្រដាល់សកលជម្រើសជាតិកម្ពុជាផងដែរ។ Emmanuel ក៏បានមើលវីដេអូប្រកួតរបស់ដៃគូខ្លួនរួចផងដែរ និងចាប់ចំណុចខ្លះៗនិងត្រៀមប្រើក្បាច់អ្វីដើម្បីផ្ដួលអ្នកប្រដាល់ថៃនេះរួចហើយ។

អតីតអ្នកកីឡាកាសរូបនេះបន្តថា ការប្រកួតស្អែកនេះប្រហែលជាមិនដល់៥ទឹកនោះទេ គេនឹងយកជ័យជម្នះលើ Watchralek ព្រោះ អ្នកប្រដាល់ថៃម្នាក់នេះមិនធ្លាប់ប្រកួតជាមួយបរទេសដូចជាលោកនោះទេ ម្យ៉ាងទៀតនោះខ្លួនប្រកួតមានលក្ខណៈខុសពីកីឡាករកម្ពុជាផងដែរ ហេតុដូចនេះកីឡាករថៃរូបនេះ ពិបាកទប់ទល់នឹងខ្លួនណាស់។

កីឡាករ Emmanuel

Emmanuel Onyedikachi ជាកូនសិស្សលោកគ្រូ ធី ណារិទ្ធិ ចាន់ រតនា និងលោកគ្រូប្រដាល់សកលជនជាតិគុយបា គេធ្លាប់ប្រកួតគុនខ្មែរបាន២ដង ឈ្នះដោយផ្ដួលដៃគូឲ្យសន្លប់ទាំង២ដង ហើយស្អែកនេះអ្នកប្រដាល់រូបនេះនឹងត្រូវឡើងប្រឈមជាមួយជើងខ្លាំងថៃ Watchralek OR. Kwanmueng នៅសង្វៀន គូបូតា បាយ័នស្ទឹងមានជ័យ ចាប់ពីម៉ោង ៧យប់តទៅ៕

អត្ថបទ៖ នួន ស៊ីណា