អ្នកតាដើមស្លែងព្រៃលើ និងជំនឿប្លែកៗ

2017-08-11 02:35:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ភូមិសាស្ត្រទឹកដីព្រៃលើមានសម្រស់ស្រស់ត្រកាលនារដូវវស្សា ដែលទីនេះមានបង្កប់នូវជំនឿអភិនីហារប្លែកៗ និងបារមីអ្នកតាដើមស្លែង ឬអ្នកភូមិខ្លះហៅថាអ្នកតាជោ។

ខ្ទមអ្នកតាដើមស្លែង

លោក គឹមថា អាយុ ៥០ឆ្នាំ ជាគ្រូបង្រៀនម្នាក់មានទីលំនៅភូមិព្រៃផ្អេរបានប្រាប់ Sabay ថា លោកតាដើមស្លែងនេះ កាលពីមុនបើអ្នកណាធ្វើដំណើរឆ្លងកាត់ គឺត្រូវចុះមកកាច់ស្លឹកឈើបន់ស្រន់សុំសេចក្តីសុខបើមិនអញ្ចឹង ទេមានរឿងចម្លែកៗកើតឡើងមិនខានព្រោះគាត់ជាអ្នកថែរក្សាទឹកដីព្រៃលើនេះ។

លោក គឹមថា

«សូម្បីតែខ្ញុំចំណាស់ហ្នឹងទៅហើយបើឆ្លងកាត់ទីនោះម្នាក់ឯងក៏ព្រឺក្បាលដែរ។» លោក គឹមថា បានឲ្យដឹងបែបនេះ។ លោកថា ប៉ុន្មានឆ្នាំមុននេះមានក្រុមហ៊ុនឡានជីកដីមួយបានមកបោះទីតាំងសង់ជម្រកនៅជិតរោងអ្នកតានោះចម្ងាយជាង ១០០ម៉ែត្រ តែនៅពេលយប់ឡើងស្រាប់តែមានស្រមោលខ្មៅៗមកដេញអោយរើទីជម្រកចេញមិនអោយស្នាក់នៅបានទេ។ ដូច្នោះក្រុមហ៊ុននោះក៏លែងហ៊ានធ្វើអ្វីទាំងអស់។

ប្រភពដដែលបន្តទៀតថា ទីនេះក៏មានអ្នកស្រុកអ្នកភូមិដែលមកឃ្វាលគោធ្លាប់ឃើញពស់វែករនាមទាំងគូរៗ ធ្លាប់បង្ហាញខ្លួននៅជិតៗរោងអ្នកតានេះដែរពេលដែលមានអ្នកណាម្នាក់និយាយខុសមាត់ (ខុសត្រណមអ្នកដើរព្រៃ)។

ទាក់ទងនឹងបញ្ហានេះ យុវជនម្នាក់សុំមិនបញ្ចេញឈ្មោះ អះអាងថា «កាលខ្ញុំនៅក្មេងធ្លាប់មកឃ្វាលគោនៅម្ដុំជិតៗ រោងអ្នកតាខាងលើនេះ ខ្ញុំប្រទះឃើញវត្ថុម្យ៉ាងមិនដឹងថា ជាអ្វីក៏ដើរចូលទៅជិតទើបដឹងថា ជាពស់ត្បាល់ ខ្ញុំក៏រត់ចេញមកវិញទាំងអារម្មណ៍ភ័យខ្លាច រហូតធ្លាក់ខ្លួនឈឺអស់ជាច្រើនខែ ទម្រាំមើលជា»។

សូមបញ្ជាក់ថា ព្រៃលើជាតំបន់អភិរក្សព្រៃឈើធម្មជាតិមួយដែលមានទំហំផ្ទៃដីរាប់រយហិកតារស្ថិតក្នុងទឹកដីស្រុកទ្រាំង ប៉ុន្តែវាស្ថិតនៅចម្ងាយប្រមាណជា១០គីឡូម៉ែត្រប៉ុណ្ណោះពីទីរួមខេត្តតាកែវ ប៉ុន្តែទីនេះពុំសូវមានមនុស្សឆ្លងកាត់ទេលើកលែងតែអ្នកស្រុកភូមិជិតៗហ្នឹងប៉ុណ្ណោះ៕