Oppo R11 រាងស្អាតដូច iPhone 7 Plus Red ចុះតម្លៃ និង កម្លាំងវិញ?

2017-08-14 02:39:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះស្មានហ្វូន Oppo R11 ទទួលបានការចាប់អារម្មណ៍ជាខ្លាំងពីសំណាក់អ្នកលេងបណ្ដាញសង្គម ដោយសារវាមានរូបរាងស្អាតទាក់ភ្នែកដូចជា iPhone 7 Plus Red យ៉ាងអ៊ីចឹង។ តទៅនេះនឹងបង្ហាញពីការប្រៀបធៀបលម្អិតរវាង R11 និង 7 Plus Red ដោយចង់ដឹងថាមានចំណុចខុសគ្នាយ៉ាងណា៖

@ ការរចនារូបរាង ៖

ចំណុចដែលធ្វើឲ្យ R11 និង 7 Plus Red ទាក់ភ្នែកខ្លាំងបំផុតគឺការរចនារូបរាងពណ៌ក្រហមឆ្អិនឆ្អៅនេះឯង។ R11 បើមើលមួយភ្លែតទៅមានរូបរាងស្រដៀងនឹង 7 Plus Red មែនទែន ជាពិសេសត្រង់កាមេរ៉ាភ្លោះ និង ការបំពាក់ទីតាំងខ្សែអង់តែន។

Oppo R11 មានវិមាត្រ ១៥៤,៥x៧៤,៨x ៦,៨ ម.ម និង មានទម្ងន់ ១៥០ ក្រាម ស្ដើងជាង និងស្រាលជាង iPhone 7 Plus ដែលមានវិមាត្រ ១៥៨,២x៧៧,៩x ៧,៣ ម.ម និង មានទម្ងន់ ១៨៨ ក្រាម។

@ អេក្រង់ ៖

iPhone 7 Plus Red មានអេក្រង់ទំហំ ៥,៥ អ៊ីញអាចបង្ហាញរូបភាពក្នុងកម្រិត 1080 x 1920 ភីកសែល ជាមួយដង់ស៊ីតេរូបភាព ៤០១ ភីកសែលក្នុងមួយអ៊ីញ។ ចំណែក Oppo R11 វិញមានអេក្រង់ទំហំ ៥,៥ អ៊ីញ អាចបង្ហាញរូបភាពក្នុងកម្រិត 1080 x 1920 ភីកសែល ជាមួយដង់ស៊ីតេរូបភាព ៤០១ ភីកសែលក្នុងមួយអ៊ីញដូចគ្នា។

@ កាមេរ៉ា ៖

Oppo R11 មានបំពាក់កាមេរ៉ាភ្លោះផ្នែកខាងក្រោយដោយមួយមានទំហំ ២០ MP កម្រិត Aperture f/2.6 និងមួយគ្រាប់ទៀតទំហំ ១៦ MP Aperture f/1.7 ដែលមានមុខងារ Auto-Focus ដូចគ្នា។ កាមេរ៉ាភ្លោះនេះមានប្រយោជន៍ជំនួយដល់ការ Zoom មិនឲ្យបែក និង មានមុខងារថតព្រាលក្រោយ Portrait Mode ដូច iPhone 7 Plus ដែរគ្រាន់តែសមត្ថភាពខុសគ្នា។ វីដេអូអាចថតបានក្នុងកម្រិត 4K ជាមួយល្បឿន ៣០ ប្លង់/វិនាទី។ ចំពោះកាមេរ៉ាខាងមុខរបស់ Oppo R11 មានទំហំដល់ ២០ MP អាចថតវីដេអូកម្រិត Full HD។

ដោយឡែកចំពោះ iPhone 7 Plus វិញចំណុចពិសេសរបស់វាគឺត្រង់កាមេរ៉ាភ្លោះនេះឯងដោយអាចថតរូបភាពព្រាលក្រោយច្បាស់មុខបានស្អាតមិនចាញ់កាមេរ៉ា DSLR និងមានថត Zoom ពេលថតដោយមិនបាត់បង់គុណភាពរូបថតឡើយ។ កាមេរ៉ាភ្លោះរបស់ 7 Plus មានកម្រិត ១២ MP ដូចគ្នាដែលមានមុខងាររក្សាលំនឹង OIS និង អាចថតវីដេអូបានក្នុងកម្រិត 4K។ កាមេរ៉ាខាងមុខមានទំហំ ៧ MP អាចថត Selfie បានភ្លឺស្អាតដោយមាន Aperture f/2.2 និងថតវីដេអូបានក្នុងកម្រិត Full HD។

@ Software ៖

iPhone 7 Plus Red ដំណើរការប្រព័ន្ធប្រតិបត្តិការ iOS 10 ហើយនឹងអាចអាប់ដេតឡើងទៅកាន់ iOS 11 ដែលនឹងបញ្ចេញឲ្យប្រើផ្លូវការក្នុងអំឡុងខែកញ្ញាខាងមុខបាន។ 7 Plus Redនេះមានប្រើបន្ទះឈីប A10 Fusion ដែលមាន RAM ៣ GB និងអង្គផ្ទុកទិន្នន័យទំហំ ១២៨ GB/ ២៥៦ GB។

Oppo R11 វិញប្រើប្រព័ន្ធប្រតិបត្តិការ Android 7.1.1 Nougat និងមានប្រើបន្ទះឈីបស៊េរីទាប Snapdragon 660, មាន RAM ទំហំ ៤ GB និងអង្គផ្ទុកទិន្នន័យ ៦៤ GB អាចបន្ថែមទំហំបាន។

@ ទំហំថ្ម ៖

Oppo R11 មានទំហំថ្ម ៣០០០ mAh ដែលមានប្រើបច្ចេកវិទ្យាសាកថ្មបានលឿន Quick Chargeហើយទំហំថ្មប៉ុណ្ណេះអាចទ្រាំទ្រនឹងការប្រើប្រាស់បានមួយថ្ងៃឯណោះ។ ដោយឡែក iPhone 7 Plus Red វិញមានទំហំ ២៩០០ mAh អាចប្រើប្រាស់បានពេញមួយថ្ងៃ។ ថ្មទូរសព្ទទាំងពីរសុទ្ធតែមិនអាចដោះចេញបាន។

@ តម្លៃ ៖

iPhone 7 Plus Red នៅទីផ្សារប្រទេសមានតម្លៃចាប់ពី ៨៧០ ដុល្លារ ចំណែកឯ Oppo R11 វិញមានតម្លៃថោកជាងពាក់កណ្ដាលត្រឹមតែប្រមាណ ៤៤០ ដុល្លារប៉ុណ្ណោះ។

@ សេចក្ដីសម្រេច ៖

ឆ្លងកាត់តាមការប្រៀបធៀបខាងលើឃើញថាស្មាតហ្វូនទាំងពីរម៉ូដែលសុទ្ធតែមានចំណុចខ្លាំងរៀងៗខ្លួន ដោយ iPhone 7 Plus Red បានយកឈ្នះលើផ្នែក Software ជាពិសេសត្រង់បន្ទះឈីបតែម្ដង ចំណែក Oppo វិញយកឈ្នះត្រង់តម្លៃដោយមានសមត្ថភាពខ្លាំងគួរសមដែរតែមានតម្លៃទាបជាង iPhone ពាក់កណ្ដាល។ ចំពោះចំណុចដទៃទៀតវិញដូចជារូបរាង អេក្រង់ និង កាមេរ៉ាអាចប្រកួតប្រជែងគ្នាបាន៕

ប្រភព៖ Androidauthority ប្រែសម្រួល៖ សុខហេង