៥ ចំណុចសំខាន់បំផុត សម្រាប់ជីវិត-ប្ដីប្រពន្ធក្រោយរៀបការរួច ទើបគ្រួសាររីកចម្រើន

2017-08-14 08:10:06
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀបការកសាងគ្រួសារ គឺជារឿងដែលមនុស្សគ្រប់រូបមិនអាចជៀសផុត ហើយការរៀបការដោយមានផែនការច្បាស់លាស់ រៀបការដោយមានទំនុកចិត្ត ថាកសាងគ្រួសារមួយដ៏មានសុភមង្គល គឺជារឿងសំខាន់បំផុត។ ដូច្នេះក្រោយរៀបការហើយ តើពីរនាក់ប្ដី-ប្រពន្ធគួរធ្វើដូចម្ដេចខ្លះ ទើបគ្រួសារមានភាពរីកចម្រើន? ខាងក្រោមនេះ ជាការលើកឡើងរបស់លោកសាស្ត្រាចារ្យ ហេង ដារារ័ត្ន បង្រៀនមុខវិជ្ជាសហគ្រិនភាព នៅសាកលវិទ្យាល័យឯកជនមួយ លើកឡើងជុំវិញបញ្ហានេះ៖

១.ផ្ទះរស់នៅផ្ទាល់ខ្លួនពីរនាក់ប្ដី-ប្រពន្ធ

ប្រសិនបើរៀបការរួចនៅមិនទាន់មានផ្ទះផ្ទាល់ខ្លួនរស់នៅទេ ចំណុចសំខាន់បំផុត គឺរួមគ្នាទិញផ្ទះទាំងពីរនាក់ប្ដី-ប្រពន្ធ។ លោកសាស្ត្រាចារ្យ ហេង ដារារ័ត្ន លើកឡើងថា ផ្ទះគឺជាទ្រព្យសម្បត្តិធំគួរទិញមុនគេ ចំណែកទ្រព្យរបស់ផ្សេងទៀត អាចលៃលកនៅពេលក្រោយ ព្រោះក្រោយរៀបការហើយមិនអាចស្នាក់អាស្រ័យជាមួយឪពុក-ម្ដាយរហូតនោះទេ។ ដូច្នេះត្រូវវិភាគមើលទៅលើប្រាក់ចំណូលទាំងពីរនាក់ប្ដីប្រពន្ធ ថាតើសល់ពីការចំណាយចាំបាច់ទាំងអស់ អាចមានលទ្ធភាពទិញផ្ទះបង់រំលស់ដែរឬទេ? យ៉ាងហោចណាស់ក៏ត្រូវមានប្រាក់ខែម្នាក់ ៤០០ដុល្លារដែរ។ ក្រោយមានផ្ទះរស់នៅហើយ អាចចាត់ទុកថា ជាភាពជោគជ័យដំណាក់កាលដំបូង សម្រាប់ជីវិតប្ដីប្រពន្ធ។

២. សន្សំលុយបើកអាជីវកម្មខ្នាតតូចមួយ

ក្រោយពេលមានផ្ទះសមរម្យរស់នៅហើយ គឺការចាប់ផ្ដើមបង្កើនទ្រព្យសម្បត្តិតាមរយៈការធ្វើអាជីវកម្មលក្ខណៈគ្រួសារ។ លោក ហេង ដារារ័ត្ន និយាយថា ការធ្វើការឱ្យគេមិនងាយសល់លុយនោះទេ ដូចនេះហើយគួរចាប់ផ្ដើមបែងចែកប្រាក់ចំណូលមួយផ្នែកសន្សំទុករកស៊ី។ ក្នុងនោះត្រូវកាត់បន្ថយការចំណាយមិនចាំបាច់ទាំងឡាយ ហើយយកលុយសន្សំក្នុងធនាគារ ក្នុងរយៈពេលកំណត់ណាមួយ ដោយក្នុង១ខែយ៉ាងហោចណាស់ក៏សន្សំ ៥០០ ទៅ ៦០០ដុល្លារដែរ ឬច្រើនលើសពីនេះអាស្រ័យលើចំណូលរកបាន។ ក្រោយសន្សំរយៈពេល ៥ ទៅ ៦ឆ្នាំ អាចមានកញ្ចប់លុយតូចមួយ អាចបើកអាជីវកម្មខ្នាតតូចដូចជា៖ លក់ដូរ ចំណីអាហារ ភេសជ្ជៈជាដើម។

៣. សន្សំ បង្កើនទ្រព្យ ពង្រីកមុខរបរ

លោកសាស្ត្រាចារ្យមុខវិជ្ជា សហគ្រិនភាព រូបនេះលើកឡើងទៀតថា គ្មានអ្វីល្អជាងការសន្សំនោះទេ ទោះរកបានប៉ុណ្ណាបើមិនពូកែសន្សំក៏គ្មានថ្ងៃក្លាយជាអ្នកមានដែរ។ ក្រោយជីវភាពក្នុងគ្រួសារចាប់ផ្ដើមល្អប្រសើរហើយ ពីរនាក់ប្ដីប្រពន្ធគួរចាប់ផ្ដើមសន្សំ និងការបង្កើនទ្រព្យសម្បត្តិដូចជាទិញផ្ទះថែម ទិញរថយន្ត និងទ្រព្យផ្សេងទៀតដែលអាចចំណេញទៅថ្ងៃក្រោយ។ ចំណុចសំខាន់មួយទៀតនោះ គឺពង្រីកមុខរបរដែលមានស្រាប់ឱ្យកាន់តែរីកចម្រើន មិនមែននៅតែដដែលគ្មានការអភិវឌ្ឍនោះទេ។

៤. កំណត់ផែនការអនាគត

នៅត្រង់ចំណុចនេះពិតជាសំខាន់ សម្រាប់ជីវិតប្ដីប្រពន្ធ គឺការរៀបចំផែនការអនាគត។ ក្នុងនោះត្រូវពិភាក្សាគ្នា ពីបញ្ហាដែលអាចកើតមានទៅថ្ងៃក្រោយ ដូចជារបររកស៊ីតើអាចមានហានិភ័យអ្វីខ្លះ? ក្នុងរយៈពេល ៥ឆ្នាំ ឬ១០ឆ្នាំទៀតត្រូវធ្វើអ្វីទៀតសម្រាប់ជីវិតគ្រួសារ? ដូច្នេះត្រូវកំណត់ផែនការ និងព្យាយាមធ្វើរហូតជោគជ័យតាមការកំណត់ទាំងពីរនាក់ប្ដីប្រពន្ធ។ លោកសាស្ត្រាចារ្យ ហេង តារារ័ត្នបន្ថែម។

៥. កំណត់ពេលវេលាត្រូវមានកូន

លោកសាស្ត្រាចារ្យរូបនេះប្រាប់ទៀតថា ក្រោយមានជីវភាពធូរធារ ហើយប្រពន្ធអាចដកខ្លួនដើម្បីទុកពេលវេលាមានកូនបានប្ដីប្រពន្ធ អាចចាប់ផ្ដើមកំណត់ពេលត្រូវយកកូន។ ការយកកូនមិនមែនចេះតែចង់បានតាមចិត្តនោះទេ ត្រូវដឹងថា មានកូនគឺមានបន្ទុក កុំយកកូនក្នុងពេលស្ថានភាពលំបាក ដោយមិនមានផែនការ។ ក្រោយមានកូនត្រូវគិតគូរពីអនាគតកូន ទាំងការរៀន និងអ្វីៗគ្រប់បែបយ៉ាងសម្រាប់កូន។ ដូច្នេះហើយទើបពីរនាក់ប្ដីប្រពន្ធត្រូវកំណត់ផែនការឱ្យបានច្បាស់លាស់ទើប ទាំងកូន និងឪពុកម្ដាយមិនជួបផលលំបាក៕

អត្ថបទ៖ ថោ ច័ន្ទឬទ្ធិ