រកឃើញផ្នូរបុរាណ៣ អាយុកាលជាង២០០០ឆ្នាំ នៅអេហ្ស៊ីប

2017-08-16 02:06:18
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ក្រុមអ្នកបុរាណវិទូ បានរកឃើញផ្នូរបុរាណចំនួន ៣ ដែលមានអាយុកាលប្រហែល ២ ០០០ ឆ្នាំ នៅភាគខាងត្បូងប្រទេសអេហ្ស៊ីប។

ផ្នូរទាំងនោះត្រូវបានគេរកឃើញ នៅក្នុងកន្លែងបញ្ចុះសព នៅតំបន់ Al-Kamin al-Sahrawi ក្នុងខេត្ត Minya ភាគខាងត្បូងទីក្រុង Cairo។ ពួកវាបានផ្ទុកនូវថ្មមឈូស និង បំណែកដីឥដ្ឋផ្សេងៗគ្នា។

ក្រសួងវត្ថុបុរាណរបស់អេហ្ស៊ីប បានឲ្យដឹងថា ការរកឃើញនេះបានបង្ហាញថា តំបន់នោះគឺជាកន្លែងបញ្ចុះសពដ៏អស្ចារ្យមួយ ដែលមានអាយុកាលយូរណាស់មកហើយ។ ជាមួយគ្នានេះដែរ ផ្នូរមួយក្នុងចំណោមនោះ មានផ្ទុកនូវថ្មមឈូស ដែលត្រូវបានគេឆ្លាក់ចេញជាមុខមនុស្សទៀតផង។

មិនតែប៉ុណ្ណោះ គេក៏បានរកឃើញរណ្ដៅបញ្ចុះសពចំនួន ៦ ផ្សេងទៀត ក្នុងនោះរួមមានរណ្ដៅសម្រាប់បញ្ចុះសពកូនក្មេងតូចមួយផងដែរ។

លោក Ali al-Bakry ប្រធានផ្នែកបេសកកម្មនេះបាននិយាយថា ផ្នូរមួយក្នុងចំណោមផ្នូរទាំងនោះ មានផ្ទុកឆ្អឹង ដែលគេជឿថាជារបស់ បុរស ស្ត្រី និង កុមារ ដែលមានអាយុខុសគ្នា៕