គង់ ហ៊ូវ៖ ផ្ដោតក្ដីសង្ឃឹមខ្ពស់លើ ម៉ឺន សុភា និង ឡៅ ចិត្រា នៅស៊ីហ្គេម
- 2017-08-16 02:51:37
- ចំនួនមតិ 0 | ចំនួនចែករំលែក 0
គង់ ហ៊ូវ៖ ផ្ដោតក្ដីសង្ឃឹមខ្ពស់លើ ម៉ឺន សុភា និង ឡៅ ចិត្រា នៅស៊ីហ្គេម
ចន្លោះមិនឃើញ
កូនសិស្សលោកគ្រូ ធន់ សុភា គឺកីឡាករ គង់ ហ៊ូវ ថាសម្រាប់ការប្រកួតនៅស៊ីហ្គេម លើកទី២៩ នៅប្រទេសម៉ាឡេស៊ី ប៉ុន្មានថ្ងៃនេះខាងមុខនេះ ខ្លួនមានក្ដីសង្ឃឹមខ្លាំងលើកីឡាករពីររូប ទី១ ម៉ឺន សុភា ទី២ ឡៅ ចិត្រា។
កីឡាករ គង់ ហ៊ូវ បានឲ្យដឹងថា គេជឿជាក់ថាកីឡាករពីររូបខាងលើនេះ នឹងឈ្នះមេដាយជូនកម្ពុជានៅក្នុងព្រឹត្តិការកីឡាស៊ីហ្គេមនេះ ព្រោះពួកគេសុទ្ធតែជាជើងខ្លាំងនៅកម្ពុជានាពេលបច្ចុប្បន្ន។ ចំពោះសមត្ថភាពកីឡាករ «ម៉ឺន សុភា» គង់ ហ៊ូវ បន្តលើកឡើងថា អ្នកប្រដាល់ដែលមានផ្លែងធ្ងន់ៗ មិនថាកណ្ដាប់ដៃ ឬទាត់នោះទេ ហើយកីឡាករល្មមៗមិនអាចយកជ័យជម្នះពីគេបានឡើយ។
ម្ចាស់ពានរង្វាន់ម៉ារ៉ាតុងនៅបាយ័នរូបនេះបន្ថែមទៀតថា បើនិយាយពី «ឡៅ ចិត្រា» សព្វថ្ងៃនេះគេមានកេរ្តិ៍ឈ្មោះល្បីមែនទែន រាល់ការប្រកួតនានាលើសង្វៀនស្ទើរតែមិនដែលចាញ់។ ចិត្រា ជាកីឡាករវ័យក្មេងកំពុងតែឡើងកម្លាំង និងសមត្ថភាពខ្លាំង រួមផ្សំនិងការព្យាយាមផងនោះ ទើបធ្វើឲ្យគេមានការជោគជ័យខ្លាំង។ កីឡាករទាំងពីរនាក់នេះ មានមហិច្ឆតាខ្ពស់ណាស់ ពួកគេមិនចង់ល្បីត្រឹមក្នុងប្រទេស ឬល្បីតែប៉ុណ្ណេះទេ ដូច្នេះគេនឹងអាចយកមេដាយបាននៅស៊ីហ្គេមនេះ។
កីឡាករប្រដាល់គុនខ្មែរនឹងចាកចេញពីកម្ពុជានៅថ្ងៃទី២៥ ខែសីហា ឆ្នាំ២០១៧នេះ ដើម្បីទៅចូលរួមក្នុងព្រឹត្តិការស៊ីហ្គេម លើកទី២៩ ឯប្រទេសម៉ាឡេស៊ី។ អ្នកប្រដាល់ដែលតំណាងឲ្យកម្ពុជាចេញទៅនេះមាន ៥រូប ទី១ ម៉ឺន សុភា មឿន សុខហ៊ុច ឃីម ឌីម៉ា ឡៅ ចិត្រា និង វ៉ាន់ វឿន៕