អាជ្ញាធរវេណេហ្ស៊ុយអេឡា បាញ់អ្នកទោសស្លាប់ ៣៧នាក់ ក្រោយផ្ទុះកុបកម្ម
- 2017-08-17 01:47:11
- ចំនួនមតិ 0 | ចំនួនចែករំលែក 0
អាជ្ញាធរវេណេហ្ស៊ុយអេឡា បាញ់អ្នកទោសស្លាប់ ៣៧នាក់ ក្រោយផ្ទុះកុបកម្ម
ចន្លោះមិនឃើញ
អាជ្ញាធរប្រទេសវេណេហ្ស៊ុយអេឡា បានបាញ់អ្នកទោសក្នុងពន្ធនាគារស្លាប់អស់ ៣៧នាក់ បន្ទាប់ពីផ្ទុះកុបកម្មបង្កជាអំពើហិង្សានៅរដ្ឋ Amazonas ភាគខាងត្បូងប្រទេស។ នេះបើតាមការអះអាងរបស់អភិបាលរដ្ឋ កាលពីថ្ងៃពុធម្សិលមិញ។
អភិបាលរដ្ឋលោក Liborio Guarulla បានបញ្ជាក់ថា ការបង្ហូរឈាមបានកើតឡើងបន្ទាប់ពីមានការប្រយុទ្ធតតាំងរវាងអ្នកទោស និងមន្ត្រីយាមគុកនៅយប់ថ្ងៃអង្គារនៅទីក្រុង Puerto Ayacucho។ ប្រភពដដែលបន្ថែមថា កងកម្លាំងសន្តិសុខបានឆ្មក់ចូលបរិវេណពន្ធនាគារ ដើម្បីរៀបចំសណ្ដាប់ធ្នាប់ឡើងវិញ ក្រោយអ្នកទោសពង្រាយគ្នាគ្រប់គ្រងពន្ធនាគារអស់រយៈពេលជាច្រើនសប្ដាហ៍។ មន្ត្រីពន្ធនាគារចំនួន ១៤នាក់ បានរងរបួសផងដែរ។
ពេលកើតហេតុ ពន្ធនាគារខាងលើមានអ្នកទោសចំនួន ១១០នាក់ កំពុងឃុំខ្លួន ហើយពេលនេះគេកំពុងស៊ើបអង្កេតរកមូលហេតុនៃកុបកម្មផ្ទុះជាអំពើហិង្សានេះ។ គួររម្លឹកថា កាលពីឆ្នាំ ២០១៣ ក៏មានការបាញ់អ្នកទោសដែរ បណ្ដាលឲ្យស្លាប់ ៦១នាក់។ វេណេហ្ស៊ុយអេឡា ជាប្រទេសមួយក្នុងចំណោមប្រទេសលើលោកដែលកើតមានអំពើហិង្សាញឹកញាប់៕