សមិទ្ធផលស្ពានធំៗ ៧ នៅកម្ពុជា ក្រោមការគាំទ្រហិរញ្ញវត្ថុពីប្រទេសចិន
- 2017-08-17 23:06:00
- ចំនួនមតិ 0 | ចំនួនចែករំលែក 0
សមិទ្ធផលស្ពានធំៗ ៧ នៅកម្ពុជា ក្រោមការគាំទ្រហិរញ្ញវត្ថុពីប្រទេសចិន
ចន្លោះមិនឃើញ
នៅប៉ុន្មានឆ្នាំចុងក្រោយនេះកម្ពុជាបានបើកសម្ពោធនូវសមិទ្ធផលស្ពានធំៗជាច្រើន ដែលបានមកពី ហិរញ្ញប្បទាន និងកម្ចីឥណទានសម្បទានពីរដ្ឋាភិបាល នៃសាធារណៈ រដ្ឋប្រជាមានិតចិន។
ស្ពានទាំងនោះ រួមមាន៖
១) ស្ពានឆ្លងកាត់ទន្លេមេគង្គតភ្ជាប់ខេត្តស្ទឹងត្រែង និងខេត្តព្រះវិហារ៖
ស្ពានឆ្លងកាត់ទន្លេមេគង្គពីខេត្តស្ទឹងត្រែងតភ្ជាប់ទៅស្រុកត្បែងមានជ័យ ខេត្តព្រះវិហារ បានសាងសង់រួចហើយ ដោយក្រុមហ៊ុនស៊ាងហៃ ប្រទេសចិន មានបណ្ដោយប្រវែង ១.៧៣១ ម៉ែត្រ និងទទឹង ១៣ ម៉ែត្រ។ ការស្ថាបនាស្ពាននេះ ក៏មានការស្ថាបនាកំណាត់ផ្លូវលេខ ២១៤ ពីភូមិបាចុង សង្កាត់ព្រះបាទ ក្រុងស្ទឹងត្រែង ទៅស្រុកត្បែងមានជ័យ ខេត្តព្រះវិហារ មានប្រវែង ១៤៣,៣៣ គីឡូម៉ែត្រ។ គម្រោងស្ថាបនាស្ពានថ្នល់នេះ បានចំណាយថវិកាសរុបចំនួន ១១៦,៥ លានដុល្លារ ដែលជាប្រាក់កម្ចីឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយថវិកាបដិភាគរបស់ រដ្ឋាភិបាលកម្ពុជា។ គម្រោងនៃការសាងសង់ស្ពាននេះត្រូវសាងសង់រយៈពេល ៤៥ ខែ គឺគិតចាប់ពីថ្ងៃទី ១៥ ខែមេសា ឆ្នាំ ២០១២ និងត្រូវបានសម្ពោធដាក់ឱ្យដំណើរ ការកាលពីថ្ងៃទី ១ ខែមេសា ឆ្នាំ ២០១៥ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
២)ស្ពានមិត្តភាពកម្ពុជា-ចិន តាខ្មៅ ស្ពានតាខ្មៅឆ្លងកាត់ទន្លេបាសាក់ ដែលស្ថិតនៅចំណុច ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល មានប្រវែង ៨៥៥ ម៉ែត្រ និង ទទឹង ១៣,៥ ម៉ែត្រ ត្រូវបានបើកការដ្ឋានសម្ពោធកាលពីថ្ងៃទី៦ ខែ កក្កដា ឆ្នាំ ២០១១ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន និងឯកអគ្គរដ្ឋទូតចិនប្រចាំនៅប្រទេសកម្ពុជា ។ ការស្ថាបនាស្ពានតាខ្មៅ នេះប្រើរយៈពេល ៤២ ខែ និង ត្រូវសាងសង់បញ្ចប់នៅចុងឆ្នាំ ២០១៤ ដែលត្រូវចំណាយថវិកាអស់ចំនួន ៣២,៨៩ លានដុល្លារ ជាប្រាក់កម្ចីសម្បទានពីសាធារណរដ្ឋប្រជាមានិតចិន និង ថវិកាបដិភាគរបស់រាជរដ្ឋាភិបាលកម្ពុជា ។
៣) ស្ពានជ្រោយចង្វាថ្មី ស្ពានជ្រោយចង្វាថ្មី ប្រើរយៈពេល ៣៦ ខែ ដោយបានចាប់ផ្ដើមបើកការដ្ឋានសាងសង់កាលពីខែវិច្ឆិកា ឆ្នាំ ២០១១ ហើយបញ្ចប់ការសាងសង់នៅចុងឆ្នាំ ២០១៤ ។ ស្ពាននេះមានប្រវែង ៧១៩ ម៉ែត្រ និងទទឹង ១៣,៥ ម៉ែត្រ ដែលត្រូវចំណាយថវិកាអស់ចំនួន ២៧,៥ លានដុល្លារ ដែលជាប្រាក់ឥណទានហិរញ្ញប្បទានពីប្រទេសចិន ។ ការសាងសង់ស្ពាននេះគឺក្រុមហ៊ុនសាជីវកម្មស្ពានថ្នល់របស់ប្រទេសចិនជាអ្នកសាងសង់ ។ ស្ពាននេះបានសាងសង់រួចហើយបានបើកឱ្យដំណើរការរួចហើយដែរគ្រាន់តែមិនទាន់សម្ពោធឱ្យប្រើប្រាស់ជាផ្លូវការតែប៉ុណ្ណោះ ។
៤) ស្ពានមិត្តភាពកម្ពុជា-ចិន សេកុង ស្ពានឆ្លងកាត់ទន្លេសេកុងដែលគេហៅថា «ស្ពានមិត្តភាពកម្ពុជា-ចិន» នេះមានប្រវែង ១.០៧៥ ម៉ែត្រ និង ទទឹងប្រវែង ១១ ម៉ែត្រ កម្ពស់ ២១ ម៉ែត្រ នៅរដូវប្រាំង ។ ការស្ថាបនាស្ពាននេះប្រើរយៈពេល ៤៤ ខែ ជាមួយនឹងការស្ថាបនាស្ពាននេះក៏មានការស្ថាបនាកំណាត់ផ្លូវលេខ ៧ ផងដែរ ដែលមានប្រវែង ១៩៦,៩ គីទ្បូម៉ែត្រ ។ ការស្ថាបនាស្ពាន និងផ្លូវនេះ រដ្ឋាភិបាលនៃសាធារណរដ្ឋប្រជាមានិតចិនបានផ្តល់ប្រាក់កម្ចីចំនួន ៥២០ លានយន់ ស្មើនឹង ៧០ លានដុល្លារ និង ថវិកាបដិភាគរបស់រដ្ឋាភិបាលកម្ពុជាចំចំនួន ៤,៣ លានដុល្លារ ដែលបានសម្ពោធដាក់ឱ្យប្រើប្រាស់ ជាផ្លូវការកាលពីថ្ងៃទី ២៩ ខែមេសា ឆ្នាំ ២០០៨ ។
៥) ស្ពានព្រែកក្ដាម ស្ពានព្រែកក្ដាមបានបើកការដ្ឋានស្ថាបនាកាលពីថ្ងៃទី ១១ ខែមិថុនា ឆ្នាំ ២០០៧ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន និង លោក ស្រី យ៉ាង យីហ្វេង ដែលពេលនោះឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំនៅក្នុងប្រទេសកម្ពុជា។ ស្ពាននេះបានស្ថាបនាចប់១០០% នៅដើមខែមេសា ឆ្នាំ ២០១០ ដែលបានចំណាយពេលវេលាក្នុងការស្ថាបនាតែ ៣ ឆ្នាំប៉ុណ្ណោះ ។ ថវិកាសម្រាប់ស្ថាបនាស្ពាននេះជាប្រាក់កម្ចីសម្បទានរយៈពេលវែង ដែលមានអត្រាការប្រាក់ទាបពីប្រទេសចិន និង ថវិកាបដិភាគរបស់រដ្ឋាភិបាលកម្ពុជាប្រមាណប្រមាណជា ៥ ភាគរយ ។ ស្ពានព្រែកក្តាម មានបណ្ដោយប្រវែង ៩៧៥ ម៉ែត្រ ទទឹងប្រវែង ១៣,៥០ ម៉ែត្រ និង កម្ពស់ ១០ ម៉ែត្រ ចំណាយថវិកាអស់ចំនួន ២៨,៨ លានដុល្លារ ។
៦) ស្ពានមិត្តភាពកម្ពុជា-ចិន ព្រែកតាមាក់ ស្ពានព្រែកតាមាក់មានបណ្ដោយប្រវែង ១.០៦៦ ម៉ែត្រ និងទទឹងប្រវែង ១៣,៥០ ម៉ែត្រ ចំណាយថវិកាអស់ចំនួន ៤៣,៥ លានដុល្លារ ដែលជាប្រាក់កម្ចីពីរដ្ឋាភិបាលនៃសាធារណរដ្ឋប្រជាមានិតចិនចំនួន ៤២.២០៨.៧៣៣ ដុល្លារ និងប្រាក់បដិភាគរបស់រដ្ឋាភិបាលកម្ពុជាចំចំនួន ២.២២១.៥១២ ដុល្លារ ។ ស្ពានព្រែកតាមាក់នេះបានបើកការដ្ឋានសាងសង់នៅថ្ងៃទី៦ ខែមិថុនា ឆ្នាំ ២០០៧ ការស្ថាបនាស្ពាននេះប្រើរយៈពេល ៥០ ខែ ប៉ុន្តែការស្ថាបនាលឿន ជាងគម្រោង ១០ ខែ ហើយត្រូវបានដាក់សម្ពោធឱ្យប្រើប្រាស់នៅថ្ងៃទី ២៤ ខែមករា ឆ្នាំ ២០១១ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
៧) ស្ពានកោះធំ ឆ្លងទន្លេបាសាក់ ស្ពានកោះធំ ត្រូវបានបើកការដ្ឋានសាងសង់កាលពីថ្ងៃទី ២៥ មីនា ២០១៣ ក្រោមអធិបតីភាពសម្ដេចតេជោ នាយករដ្ឋមន្ត្រី និងត្រូវបានចាក់បេតុងតភ្ជាប់នៅថ្ងៃទី ០៨ សីហា ឆ្នាំ២០១៦ ដោយសម្ដេចតេជោ ហ៊ុន សែន ផងដែរ។ ស្ពានកោះធំនេះមានប្រវែងសរុប ៨២៤ម៉ែត្រ ចំណាយថវិកាសាងសង់សរុប ១៩.៣៩ លានដុល្លារអាមេរិក ជាថវិកាកម្ចីឥណទានពីរដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជាប្រមាណជា ២.៨លានដុល្លារអាមេរិក។ ស្ពាននេះមានទីតាំងចាប់ពីត្រង់គីឡូម៉ែត្រលេខ ៥៨+២០០ ស្ថិតលើផ្លូវជាតិលេខ២១ ត្រង់ចំណុចភូមិព្រែកធន់ ឃុំព្រែកថ្មី ស្រុកកោះធំ តភ្ជាប់ពីផ្លូវជាតិលេខ២១ ពីត្រើយខាងលិចទន្លេបាសាក់ ឆ្លងទៅផ្លូវជាតិលេខ១១០ ដែលជាផ្លូវប្របមាត់ទន្លេនៅត្រើយខាងកើតទន្លេបាសាក់ ស្ថិតនៅក្នុងភូមិព្រែកថ្មី ឃុំជ្រោយតាកែវ ស្រុកកោះធំ ។ ស្ពាននេះបានដាក់សម្ពោធឱ្យប្រើប្រាស់កាលពីថ្ងៃទី១៣ ខែកុម្ភៈ ឆ្នាំ២០១៧៕