មិនធ្លាប់ដឹងសោះ! ភ្លើងស្តុបថ្មីនៅរាជធានីភ្នំពេញ មានលក្ខណៈពិសេសមិនធម្មតា
- 2017-08-17 07:49:59
- ចំនួនមតិ 0 | ចំនួនចែករំលែក 0
មិនធ្លាប់ដឹងសោះ! ភ្លើងស្តុបថ្មីនៅរាជធានីភ្នំពេញ មានលក្ខណៈពិសេសមិនធម្មតា
ចន្លោះមិនឃើញ
ភ្លើងស្តុបថ្មីនៅរាជធានីភ្នំពេញ កំពុងដាក់ដំណើរការជាបន្តបន្ទាប់នោះមានលក្ខណៈពិសេសដែលអ្នកទាំងអស់គ្នាមិនធ្លាប់បានដឹង។ នេះបើតាមការរៀបរាប់របស់ ឯកឧត្ដម ហ៊ីដេហ៊ីសា ហូរីណូអុជិ ឯកអគ្គរាជទូតជប៉ុនប្រចាំប្រទេសកម្ពុជា ក្នុងវីដេអូខ្លីមួយបង្ហោះនៅលើទំព័រហ្វេសប៊ុកផ្លូវការស្ថានទូតជប៉ុន។
ឯកអគ្គរាជទូតជប៉ុន បានប្រាប់ថា ភ្លើងស្តុបចរាចរណ៍ថ្មីនេះ មានភ្ជាប់ប្រព័ន្ធ Sensor ដែលអាចដឹងថានៅលើផ្លូវយានយន្តតិច ឬច្រើន និងអាចកំណត់នាទីដោយស្វ័យប្រវត្តិ ដើម្បីសម្រួលដល់បញ្ហាកកស្ទះ។ ឧទាហរណ៍ ប្រសិនបើនៅលើផ្លូវរត់ត្រង់ ឬបត់ស្ដាំ និងបត់ឆ្វេង មានយានយន្តច្រើន នោះភ្លើងពណ៌បៃតង នឹងពន្យារពេលកាន់តែយូរ តែបើសិនជាមានយានយន្តតិចភ្លើងពណ៌បៃតងនឹងលោតតាមធម្មតា។
បន្ថែមលើពីនេះទៀត ប្រសិនបើអ្នកបើកបរទាំងឡាយ មិនគោរពភ្លើងសញ្ញាចរាចរណ៍ ឈប់ខុសគន្លង នោះភ្លើងស្តុបថ្មីនឹងលោតពណ៌ខុសប្រក្រតី។ ឧទាហរណ៍ថា អ្នកបើកបរណាម្នាក់ចង់ទៅត្រង់ តែបែរជាមកឈប់គន្លងបត់ឆ្វេង ហើយស្រាប់តែកាច់ចង្កូតទៅត្រង់វិញ នោះភ្លើងស្តុបនឹងយល់ថា គន្លងបត់ឆ្វេងកំពុងកកស្ទះខ្លាំង។ ដូច្នេះភ្លើងស្តុបនឹងបញ្ឈប់អ្នកដំណើរតាមផ្លូវត្រង់ ហើយមកពន្យារពេលឱ្យគន្លងបត់ឆ្វេងវិញ។
ដូចនេះមានន័យថា បើអ្នកបើកបរមិនគោរពភ្លើងសញ្ញា បត់ខុស ឬឈប់ខុសគន្លង នឹងធ្វើឱ្យភ្លើងស្តុបថ្មី ដំណើរការខុសប្រក្រតី និងបង្កឱ្យមានបញ្ហាកកស្ទះកាន់តែខ្លាំងឡើង។ ហេតុនេះហើយទាមទារឱ្យអ្នកបញ្ជាចង្កូតទាំងអស់គោរពភ្លើងសញ្ញាឱ្យបានត្រឹមត្រូវ ទើបមិនខាតពេលវេលា និងមិនកកស្ទះចរាចរណ៍៕
ទស្សនាវីដេអូការពន្យល់របស់ ឯកឧត្ដម ហ៊ីដេហ៊ីសា ហូរីណូអុជិ៖