ខេត្តព្រះវិហារដែលបច្ចុប្បន្នត្រូវបានប្រទេសធំៗនៅក្នុងសហគមអឺរ៉ុប ទទួលស្គាល់ថាជាតំបន់ដាំដុះផលិតផលកសិកម្មគ្មានជាតិគីមី ឬហៅថាកសិកម្មសរីរាង្គល្អបំផុតរបស់កម្ពុជា។ នេះបើតាមការអះអាងរបស់មន្ត្រីជាន់ខ្ពស់ក្រសួងកសិកម្ម។

នៅក្នុងសិក្ខាសាលាពិគ្រោះយោបល់រវាង អ្នកផលិត និងអ្នកផ្គត់ផ្គង់ផលិតផលខ្មែរ ជាមួយអ្នកប្រើប្រាស់ និងចែកចាយបន្តនាថ្ងៃទី១៧ ខែសីហា ឆ្នាំ២០១៧ ឯកឧត្តម វ៉េងសាខុន រដ្ឋមន្ត្រីក្រសួងកសិកម្ម បានលើកពីក្រុមហ៊ុននាំចេញអង្ករសរីរាង្គ Amru Rice ដែលបានបង្កើតសហគមន៍ផលិតស្រូវសរីរាង្គក្នុងខេត្តព្រះវិហារ រហូតក្លាយជា តំបន់ផលិតនូវផលិតផលកសិកម្មសរីរាង្គ។

ឯឧត្តមបន្តថាៈ « ជាដំណឹងល្អបំផុតសម្រាប់ខេត្តព្រះវិហាររបស់យើងនេះ គឺឥឡូវកំពុងពេញនិយមដែលឈានទៅដល់ការផលិតបន្លែនាំចេញទៅក្រៅប្រទេសទៀត...ដែលសហគមអឺរ៉ុបបានផ្ដល់ភ្លើងខៀវថាជាតំបន់ផលិតនូវផលិតផលកសិកម្មសរីរាង្គ»។

«នេះជាចំណុចពិសេសមួយជាការចាប់ផ្ដើមរបស់កម្ពុជា ដែលពិភពលោកបច្ចុប្បន្នគឺគេចង់បាននូវផលិតផលមួយដែលគ្មានឥទ្ធិពលនៃជាតិគីមីនិងថ្នាំពុល»។ ឯឧត្តម វ៉េង សាខុន បន្ត។

ឯឧត្តមរដ្ឋមន្ត្រីក៏បានបង្គាប់ឲ្យអគ្គនាយកដ្ឋានកសិកម្ម ធ្វើការឲ្យជិតស្និទ្ធជាមួយមន្ទីរកសិកម្មទប់ស្កាត់ការនាំចូលថ្នាំពុលផ្សេងៗនៅខេត្តព្រះវិហារ ដើយថាដើម្បីការពារសុវត្ថិភាពនិងស្ដង់ដារផលិតផលកសិកម្មនៅតំបន់នោះផងដែរ។

ជាមួយគ្នានេះ លោកស្រី ឃី មុនី នាយិកាក្រុមហ៊ុននាំចេញអង្ករសរីរាង្គបានឲ្យដឹងថាៈ «បច្ចុប្បន្នយើងបានបង្កើតសហគមន៍ដាំដុះស្រូវសរីរាង្គចំនូន២ខេត្ត មានខេត្តបាត់ដំបង និងព្រះវិហារ សរុបចំនួន ២៤ សហគមន៍ មានសមាជិកជាង ៥ពាន់គ្រួសារ និងនាំចេញទៅក្រៅប្រទេសជាង ៤០»។ លោកស្រីរំពឹងថា សម្រាប់រដូវប្រមូលផលឆ្នាំនេះ នឹងទទួលបានស្រូវសរីរាង្គប្រមាណ ២ម៉ឺនតោន៕

• រដ្ឋាភិបាល​វិនិយោគទឹក​ប្រាក់​៨០លាន​ដុល្លារ​ដើម្បី​ធានា​តម្លៃ​ស្រូវ

• ​កម្ពុជា​នឹង​ចំណេញ​លើស​ពី​ការ​គិត​ បើ​កសិករ​នាំ​គ្នា​ដាំ​ស្រូវ​សរីរាង្គ​