ពីក្មេងពិការភ្នែកដើរសុំទានគេ ក្លាយជាគ្រូភ្លេងដ៏ជំនាញ
- 2017-08-18 06:19:08
- ចំនួនមតិ 0 | ចំនួនចែករំលែក 0
ពីក្មេងពិការភ្នែកដើរសុំទានគេ ក្លាយជាគ្រូភ្លេងដ៏ជំនាញ
ចន្លោះមិនឃើញ
ជាជនពិការភ្នែកទាំងសងខាងតាំងពីកំណើតលោក ណូន សុខ ធ្លាប់ជាអតីតក្មេងសុំទាននៅតាមផ្សារ តាមវត្ត និងនៅប្រាសាទអង្គរវត្ត តែពេលនេះប្រែក្លាយជាគ្រូភ្លេងដ៏ជំនាញម្នាក់ ចេះឧបករណ៍ភ្លេងខ្មែរស្ទើរគ្រប់ប្រភេទ។
មានស្រុកកំណើតនៅខេត្តសៀមរាប គ្រូភ្លេងវ័យ៣៥ឆ្នាំរូបនេះបានរៀបរាប់ពីដំណើរជីវិតរបស់ខ្លួនប្រាប់ Sabay ថា ក្នុងចំណោមបងប្អូន៥នាក់ លោកជាកូនទី២ ក្នុងត្រកូលកសិករ ម្ដាយជាអ្នកចាប់សរសៃ ហើយឪពុកចុងជាកសិករ។
កាលពីតូចលោកត្រូវទទួលបន្ទុករកប្រាក់ដើម្បីផ្គត់ផ្គង់គ្រួសារ និងមើលប្អូនតូចដែលត្រូវជាកូនឪពុកចុងជាមួយម្ដាយរបស់ខ្លួន។ លោកថា ធម្មតាក្មេងរពឹសណាស់ ម្យ៉ាងខ្លួនពិការភ្នែកផង ពេលខ្លះប្អូនដើរលេងបាត់មិនដឹងទៅរកឯណា ឪពុកចុងមកពីស្រែមិនឃើញប្អូននៅផ្ទះ គាត់តែងតែវាយធ្វើបាបគ្រប់ពេល។
លោកបញ្ជាក់ថា ក្រោយពីបានដើរសុំទានគេបានជាអង្ករនិងប្រាក់ ម្ដាយនិងឪពុកមិនសូវធ្វើបាបខ្លួនទេ។ «ការសុំមិនចេះតែបានរាល់ថ្ងៃទេ ថ្ងៃណាដែលសុំបាន ម៉ែសរសើរ ប្រើពាក្យល្អៗជាមួយ តែបើសុំមិនបានវិញ នោះនឹត្រូវរំពាត់ ឬត្រូវបង្អត់បាយក៏មាន»។
រំលឹកដល់មូលហេតុដែលនាំឲ្យលោកមានថ្ងៃនេះ គឺថ្ងៃមួយពេលទៅសុំទាននៅប្រាសាទអង្គរវត្ត ក្មេងពិការរូបនេះក៏បានជួបនឹងប្រធានអង្គការគ្រួសារថ្មី ពេលនោះហើយដែលពន្លឺក្ដីសង្ឃឹមនៃចំណេះដឹងបានចាប់ពន្លកឡើង។
មករៀននៅអង្គការគ្រួសារថ្មីនៅភ្នំពេញ កុមារសុខរៀនបានថ្នាក់ទី៨ តែអ្វីដែលគួរឱ្យកត់សម្គាល់នោះ គឺការរៀនឧបករណ៍ភ្លេង កុមាររូបនេះមានភាពលេចធ្លោជាងគេ រហូតធ្វើឱ្យគ្រូ និងអ្នកភូមិជិតនោះសរសើរពីទេពកោសល្យ។ បន្ទាប់ពីបញ្ចប់ការសិក្សាលោកសុខបានធ្វើជាគ្រូបង្ហាត់ភ្លេងនៅក្នុងអង្គការនេះ រយៈពេល៧ឆ្នាំ។
«ខ្ញុំមករៀនក្នុងឆ្នាំ១៩៩៥ រៀនបានត្រឹមថ្នាក់ទី៨ ភាសាខ្មែរអត់អីទេ តែអត់ចេះគណិតវិទ្យា រូបអីហ្នឹង អ៊ីចឹងក៏ឈប់ទៅ តែបើភ្លេងហ្នឹងចាប់បានច្រើន។ ពេលដែលហាត់ច្រៀងអាយ៉ៃ ស្មូត ឬ រៀនភ្លេងម្នាក់ឯងគេថាថ្លង់ណាស់ ជួនទៅគេថាអ្ហែងស្មូតអាណាងាប់ ពេលខ្លះចង់ឈប់ម្ដងៗដែរតែចេះតែទ្រាំដោយចាំពាក្យថា អ្នកដែលថានោះមិនមែនមកឱ្យបាយមួយគ្រាប់ឱ្យខ្ញុំហូបទេ»។ លោកថា ចំណេះទាំងប៉ុន្មាន លោកបានមកពីការស្ដាប់ច្រើន ដូចជាស្ដាប់វិទ្យុ ស្ដាប់ឯកសារពី youtube ដែលកូនសិស្សទាញឱ្យ ជួនទៅទិញសៀវភៅចំណេះដឹងផ្សេងៗឱ្យកូនសិស្សអានឱ្យស្ដាប់។
លោកក៏បានលើកទឹកចិត្តទៅដល់មនុស្សគ្រប់គ្នាថា មិនថាជាជនពិការឬមិនពិការក៏មានសមត្ថភាពផ្ទាល់ខ្លួនដែរ ខ្លួនជាអ្នកកំណត់វាសនាខ្លួនឯងគ្មានអ្វីដែលមិនពិបាកទេ សំខាន់យើងយល់តម្លៃវានិងខំចាប់វាឱ្យបាន។
បច្ចុប្បន្ននេះលោក ណូន សុខ មិនមានប្រពន្ធកូនទេ រស់នៅក្នុងវត្តឧណ្ណាលោម ដោយបង្ហាត់ភ្លេងបុរាណខ្មែរដល់សិស្សមួយចំនួន និងលេងភ្លេងនៅក្នុងហាងអាហារជប៉ុនមួយកន្លែង។ ពេលទំនេរលោកទៅលេងភ្លេងតាមពិធីបុណ្យ អាពាហ៍ពិពាហ៍ និងកម្មវិធីមួយចំនួនទៀត។
យ៉ាងណាក៏ដោយលោកថា ចំណូលរកបានសមរម្យ តែមិនទៀងទាត់ទេ។ ឧបករណ៍ភ្លេងដែលលោកចេះមាន រនាត គង ស្គរ សម្ភោរ ស្រឡៃ ខ្លុយ ប៉ីពក ចាប៉ី ទ្រ ឃឹម គែន និងមានឧបករណ៍ភ្លេងមួយចំនួនទៀត ព្រមទាំងស្មូតកំណាព្យ និងច្រៀងអាយ៉ៃផងដែរ៕