Matic ថា Man Utd ជាក្លឹបធំបង្អស់ ក្នុងចំណោមក្លឹបដែលខ្លួនធ្លាប់លេងឲ្យ
- 2017-08-18 12:12:58
- ចំនួនមតិ 0 | ចំនួនចែករំលែក 0
Matic ថា Man Utd ជាក្លឹបធំបង្អស់ ក្នុងចំណោមក្លឹបដែលខ្លួនធ្លាប់លេងឲ្យ
ចន្លោះមិនឃើញ
នៅថ្ងៃនេះ ខ្សែបម្រើ Nemanja Maticដែលជាកីឡាករចំណូលថ្មីរបស់ក្លឹបបិសាចក្រហម Manchester United បាននិយាយសរសើរពីក្លឹបថ្មីរបស់ខ្លួនដោយអះអាងវាជាក្លឹបធំបង្អស់ ក្នុងចំណោមក្លឹបដែលខ្លួនធ្លាប់លេងឲ្យ និងបានបង្ហើបថា អ្នកចាត់ការទូទៅ Jose Mourinho គឺជាកត្តាដែលជំរុញឲ្យរូបគេចាកចេញពីតោខៀវ Chelsea មកចូលរួមក្នុងក្លឹបជើងឯកលីគកំពូលអង់គ្លេស ២០សម័យមួយនេះ។
នៅពេលសួរថា តើក្លឹបបិសាចក្រហមជាក្លឹបធំបង្អស់សម្រាប់រូបគេ តាំងពីចូលលេងបាល់អាជីពមកឬ? កីឡាករសញ្ជាតិស៊ែបវ័យ ២៩ឆ្នាំរូបនេះ បានឆ្លើយតបថា៖ "ពិតប្រាកដណាស់! អ្នកណាក៏ដឹងរឿងហ្នឹងដែរ"។ ខ្សែបម្រើរូបនេះបានបន្តទៀតថា៖ "នៅពេលនិយាយពីក្លឹប Manchester United គឺវាខុសពីគេ។ ក្លឹប Chelsea ជាក្លឹបធំ ឯក្លឹប Benfica ជាក្លឹបបាល់ទាត់ធំបង្អស់ក្នុងប្រទេសព័រទុយហ្គាល់ ក៏ប៉ុន្តែ Manchester គឺ Manchester"។ កីឡាកររូបនេះចង់បញ្ជាក់ពី ភាពធំខុសពីក្លឹបដទៃ របស់ក្លឹបបិសាចក្រហម។
ក្នុងការសម្ភាសន៍ជាមួយគ្នានេះដែរ Matic ក៏បានបង្ហាញថា លោក Mourinho (អ្នកចាត់ការទូទៅរបស់ក្លឹបបិសាចក្រហម) ជាមនុស្សសំខាន់សម្រាប់ខ្លួន ហើយអ្នកចាត់ការសញ្ជាតិព័រទុយហ្គាល់រូបនេះក៏ជាកត្តាមួយដែលធ្វើឲ្យរូបគេ សម្រេចចិត្តចូលរួមជាមួយក្លឹបជើងឯកកំពូលអឺរ៉ុប ៣សម័យតែម្ដង។
សូមបញ្ជាក់ផងដែរ ខ្សែបម្រើ Matic ទើបតែត្រូវបានក្លឹបបិសាចក្រហមទិញពីក្លឹប Chelsea កាលពីដើមខែនេះ ក្នុងតម្លៃ ៤០លានផោន។ ក្នុងការបង្ហាញខ្លួនលើកទីមួយ សម្រាប់ក្លឹបថ្មីរបស់ខ្លួនក្នុងក្របខណ្ឌលីគកំពូលអង់គ្លេសរដូវកាលថ្មី កាលពីសប្ដាហ៍មុន កីឡាកររូបនេះបានបង្ហាញទម្រង់លេងយ៉ាងល្អ ដែលជួយឲ្យក្រុមឈ្នះរហូតដល់ ៤-០ ទៅលើក្លឹបញញួរយក្ស West Ham United៕