គូស្នេហ៍តារាកូរ៉េ ៦គូណាខ្លះ បែកបាក់ស្នេហា នាំឲ្យអ្នកគាំទ្រស្ដាយខ្លាំង?
- 2017-08-19 02:28:48
- ចំនួនមតិ 0 | ចំនួនចែករំលែក 0
គូស្នេហ៍តារាកូរ៉េ ៦គូណាខ្លះ បែកបាក់ស្នេហា នាំឲ្យអ្នកគាំទ្រស្ដាយខ្លាំង?
ចន្លោះមិនឃើញ
អ្វីគ្រប់យ៉ាងដែលកើតឡើង សុទ្ធតែមានទីបញ្ចប់របស់វា គ្មានអ្វីដែលអាចនៅស្ថិតស្ថេរនេះទេ ហើយក្រោយពីនោះ នឹងមានការចាប់ផ្ដើមថ្មី កើតឡើងជាបន្តទៀត គ្រាន់តែអ្វីដែលថ្មីនោះ ធ្វើឲ្យមនុស្សពិបាកនឹងប្រឈមមុខបន្តិចពេលដំបូងៗ។
បើក្រឡេកទៅមើលក្នុងសង្គមសិល្បៈ K-Pop វិញ មានតារាៗមួយចំនួនក៏ជួបប្រទះបញ្ហានេះដែរ ទាក់ទងនឹងចំណងសម្ព័ន្ធភាពស្នេហា។ តារាខ្លះក៏បានជោគជ័យក្នុងរឿងនេះ ខ្លះទៀតក៏បរាជ័យ ដែលធ្វើឲ្យអ្នកគាំទ្រខ្លះហាក់មានការអាណិតអាសូរតារាក្នុងដួងចិត្តពួកគេទាំងនោះណាស់។
ខាងក្រោមជាតារាៗ ប្រុសស្រីកូរ៉េ ទាំង ៦គូដែលបានបែកបាក់ស្នេហា ក្នុងឆ្នាំ ២០១៧ ហើយធ្វើឲ្យអ្នកគាំទ្រមានអារម្មណ៍សោកស្ដាយជាខ្លាំង៖
១. តារាសម្ដែង Nam Joo Hyuk និង Lee Sung Kyung
អតីតគូស្នេហ៍តារាសម្ដែងគូនេះ ទទួលបានការចាប់អារម្មណ៍ខ្លាំងពីអ្នកគាំទ្រយ៉ាងច្រើន ពេលបង្ហាញ វត្តមានសម្ដែងរួមគ្នាក្នុងរឿង "Weightlifting Fairy Kim Bok Joo”។ ចាប់ពីពេលនោះ ពួកគេក៏បានចាប់ផ្ដើមស្និទ្ធស្នាលនឹងគ្នា ហើយចំណងស្នេហ៍ក៏ចេះតែមានច្រើនឲ្យគ្នាទៅវិញទៅមក។ គួរឲ្យសោកស្ដាយ Joo Hyuk និង Sung Kyung ក៏ត្រូវឈានដល់ទីបញ្ចប់ កាលពីថ្ងៃទី ១៨ ខែសីហា ឆ្នាំ ២០១៧។
២. តារាចម្រៀង Kai និង Krystal
បើនិយាយពីអតីតគូស្នេហ៍ ១នេះវិញ គឺសុទ្ធតែស្ថិតក្រោមផលិតកម្ម SM ដូចគ្នា ហើយពួកគេក៏កើតក្នុងឆ្នាំ ១៩៩៤ ដូចគ្នាដែរ។ អ្នកទាំង ២ចាប់ផ្ដើមក្លាយជាមិត្តនឹងគ្នា តាំងពីចូលហ្វឹកហាត់ក្នុងផលិតកម្មដំបូងម្ល៉េះ។ បន្ទាប់ពីទាក់ទងស្រឡាញ់គ្នាប្រមាណជាង ១ឆ្នាំ តារា K-Pop ទាំង ២នេះក៏សម្រេចចែកផ្លូវគ្នាដើរ កាលពីថ្ងៃទី ៣១ ខែឧសភា ឆ្នាំ ២០១៧ ស្របតាមហេតុផលរវល់ការងាររៀងៗខ្លួនពេក។
៣. តារាសម្ដែង Shin Ha Kyun និង Kim Go Eun
តារាប្រុសស្រីទាំង ២នេះ បានប្រកាសពីចំណងស្នេហារបស់ពួកគេនៅខែសីហា ឆ្នាំ ២០១៦ ក្រោយទាក់ទងស្រឡាញ់គ្នាជាង ២ខែ។ ថ្វីត្បិតតែខាងស្រីមានអាយុតិចជាងខាងប្រុស ដល់ទៅ១៧ឆ្នាំ ប៉ុន្តែចំណង់ចំណូលចិត្តរបស់គេទាំង ២ត្រូវគ្នាណាស់។ ប៉ុន្តែចុងក្រោយ អ្នកគាំទ្រមានការសោកស្ដាយជាខ្លាំង ក្រោយឮដំណឹងថា ពួកគេត្រូវចែកផ្លូវគ្នា កាលពីថ្ងៃទី ២១ ខែមីនា ឆ្នាំ២០១៧។
៤. តារាចម្រៀង Jang Ki Ha និង IU
អតីតគូស្នេហ៍វ័យខុសគ្នា ១១ឆ្នាំគូនេះ បានលង់ស្រឡាញ់គ្នា ក្នុងខែ តុលា ឆ្នាំ ២០១៥ ក្រោយពីមានចំណង់ចំណូលចិត្តលើតន្ត្រីដូចគ្នាខ្លាំង ហើយស្នេហាពួកគេក៏កើតឡើងតាមរយៈតន្ត្រីដែរ។ ក្រោយពីនោះ Ki Ha និង IU ក៏បានបែកគ្នាវិញ កាលពីថ្ងៃទី ២២ ខែមករា ឆ្នាំ ២០១៧។
៥. តារាចម្រៀង Choiza និង Sulli
ងាកមកតារាគូនេះវិញ ត្រូវចាត់ទុកថាជាគូស្នេហ៍បង្កាត់ភ្លើងស្នេហ៍លឿន និងបើកចំហខ្លាំងជាងគេ ក្នុងប្រវត្តិសាស្ត្រសិល្បៈកូរ៉េ។ យ៉ាងណាក្ដី មិនយូរប៉ុន្មាន Choiza និង Sulli ក៏ត្រូវបែកគ្នា។
៦. តារាសម្ដែង Lee Sang Yoon និង Uee
តារាសម្ដែងទាំង ២ បានប្រកាសជាសាធារណៈ លើកដំបូងពីចំណងស្នេហ៍របស់ខ្លួន នៅខែឧសភា ឆ្នាំ ២០១៦ ក្រោយទាក់ទងគ្នាតាំងពីខែ មករា។ ប្រមាណជាង ១ឆ្នាំក្រោយ ក្នុងខែមករា ឆ្នាំ ២០១៧ ស្នេហាអ្នកទាំង ២ក៏ឈានដល់ទីបញ្ចប់៕
ចុចអាន៖
[ស្នេហា Joo Hyuk និង Sung Kyung ត្រូវចប់ក្រោមហេតុផល១](http://news.sabay.com.kh/article/962018#utm_campaign=onpage/ "ស្នេហា Joo Hyuk និង Sung Kyung ត្រូវចប់ក្រោមហេតុផល១)
មិនធម្មតាទេ Billboard ដាក់ចំណាត់ថ្នាក់បទចម្រៀង Girls' Generation