ឌីមសាំ លេចមុខស្ទើរគ្រប់មីនុយម្ហូបនៅហាងអាហារចិន
- 2017-08-19 04:14:09
- ចំនួនមតិ 0 | ចំនួនចែករំលែក 0
ឌីមសាំ លេចមុខស្ទើរគ្រប់មីនុយម្ហូបនៅហាងអាហារចិន
ចន្លោះមិនឃើញ
ឌីមសាំជាម្ហូបប្រចាំត្រកូលរបស់ជនជាតិចិន។ ស្ទើរតែគ្រប់ភោជនីយដ្ឋានដែលបើកដោយជនជាតិចិន តែងតែមានបម្រើម្ហូបប្រពៃណីនេះសម្រាប់ភ្ញៀវដែលមកទទួលទាន។
មេចុងភៅម្ហូបចិនមួយរូបនៅទីក្រុងភ្នំពេញ លោក Liu Fu Sing បានប្រាប់ Sabay ថា ឌីមសាំស្ថិតនៅក្នុងបញ្ជីមុខម្ហូបចិនដែលមានប្រជាប្រិយភាពបំផុត។ ប្រជាជនចិនក៏ដូចជាពលរដ្ឋនៅលើពិភពលោកដែលចង់សាករសជាតិម្ហូបចិន កម្រចោលមុខម្ហូបអាយុកាលរាប់ពាន់ឆ្នាំនេះណាស់។
មានស្រុកកំណើតមកពីខេត្តគ័ងស៊ី និងបទពិសោធន៍ជាង ១០ ឆ្នាំផ្នែកចុងភៅម្ហូបចិនលោកប្រាប់ថា ការធ្វើឌីមសាំមានរសជាតិឆ្ងាញ់ ទាល់តែធ្វើនិងចំហុយភ្លាមៗ។ ការធ្វើឌីមសាំនេះដែរ ត្រូវប្រើពេលយូរ ដើម្បីវ៉ៃម្សៅធ្វើស្នូល និងចម្អិនម្ដងមួយមុខៗដាក់ចំហុយក្នុងប្រអប់ឫស្សីជាច្រើនជាន់។
លោកថា ឌីមសាំមានច្រើនរសជាតិដូចជាប្រភេទស្នូលបង្គា ស្នូលក្តាម សាច់ជ្រូក សាច់គោជាដើមតាមចំណូលចិត្តរបស់អតិថិជន។
កំណើនភ្ញៀវទេសចរចិនមកកម្ពុជា នាំឲ្យហាងអាហារចិនជាច្រើនបានបើករីកស្គុសស្គាយ។
លោក Liu Fu Sing ដែលបច្ចុប្បន្នជាមេចុងភៅប្រចាំហាងឌីមសាំអែមភើរើដែលមានទីតាំងនៅម្តុំផ្សារច្បារអំពៅបានឲ្យដឹងថា ពលរដ្ឋកម្ពុជាកាន់តែច្រើនកំពុងទំនោរចូលចិត្តម្ហូបចិនដោយសាររសជាតិ និងភាពសំបូរបែបនៃមុខម្ហូបប្លែកៗដែលត្រូវចំណូលចិត្តរបស់ពួកគេ។
លោកបញ្ជាក់ថា នៅថ្ងៃអនាគតនៅពេលទំនាក់ទំនងរកស៊ីរវាងប្រទេសចិននិងកម្ពុជាកាន់តែរីកធំឡើងដែលនាំឲ្យលំហូរអ្នកវិនិយោគនិងភ្ញៀវទេសចរចិន នឹងមានការបើកដំណើរការហាងបម្រើម្ហូបអាហារចិនកាន់តែច្រើន ហើយពេលនោះពលរដ្ឋខ្មែរក៏អាចសាករសជាតិម្ហូបចិនមកពីគ្រប់តំបន់នៅក្នុងប្រទេសចិន៕