រថភ្លើងបើកធ្លាក់ផ្លូវស្លាប់ និងរបួសអ្នកដំណើរជាង ៨០នាក់នៅឥណ្ឌា

2017-08-20 02:08:41
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់មនុស្ស ២៣នាក់ បានស្លាប់បាត់បង់ជីវិត និងជាង ៦០នាក់រងរបួស បន្ទាប់ពីរថភ្លើងមួយខ្សែបានធ្លាក់ផ្លូវនៅរដ្ឋ Uttar Pradesh ភាគខាងជើងប្រទេសឥណ្ឌា កាលពីល្ងាចថ្ងៃសៅរ៍ម្សិលមិញ។

ប៉ូលិសនិយាយថា ទូររថភ្លើងចំនួន ៨ បានហោះចេញពីផ្លូវនៅក្បែរទីក្រុង Muzaffarnagar ចម្ងាយប្រមាណ ១៣០គីឡូម៉ែត្រពីភាគខាងជើងទីក្រុងដេលី។ មូលហេតុនៃគ្រោះថ្នាក់មិនទាន់ដឹងច្បាស់នៅឡើយ។

មុនពេលកើតហេតុ រថភ្លើងនេះបានធ្វើដំណើរពីទីក្រុង Puri ភាគខាងជើងរដ្ឋ Odisha ទៅកាន់ទីក្រុង Haridwar តំបន់ជួរភ្នំហិម៉ាឡៃ។ មន្ត្រីប៉ូលិសលោក Ajay Pandey បានទៅដល់កន្លែងកើតហេតុបញ្ជាក់ថា ក្រុមការងាររបស់លោកកំពុងព្យាយាមទាញជនរងគ្រោះចេញពីទូរ និងរង់ចាំឧបករណ៍កាត់ដែកទៅដល់។

ចំណែកនាយករដ្ឋមន្ត្រីឥណ្ឌាលោក Narendra Modi បានសម្ដែងការរំលែកទុក្ខដល់គ្រួសាររងគ្រោះនៅលើបណ្ដាញសង្គមទ្វីតធឺ និងសន្យាផ្ដល់ជំនួយសង្គ្រោះគ្រប់បែបយ៉ាង។ គួរបញ្ជាក់ថា គ្រោះថ្នាក់ទាក់ទងនឹងរថភ្លើង តែងតែកើតមានជារឿងធម្មតា។ ប្រព័ន្ធផ្លូវរថភ្លើងឥណ្ឌា បានដឹកជញ្ជូនអ្នកដំណើរជាង ២២លាននាក់ក្នុងមួយថ្ងៃៗ ហើយរថភ្លើងជាច្រើនហួសសម័យ ចាស់ៗ។ គ្រោះថ្នាក់រថភ្លើងនៅរដ្ឋ Uttar Pradesh ដដែល កាលពីខែវិច្ឆិកាកន្លងទៅបានសម្លាប់ ១៥០នាក់ និងមួយករណីទៀតសម្លាប់ ៣៩នាក់ផងដែរ៕