គ្រូ U22 ថៃថា បើទម្រង់លេងកូនក្រុមនៅបែបនេះ ប្រហែលមិនបានឡើងវគ្គពាក់កណ្ដាលផ្ដាច់ព្រ័ត្រ

2017-08-20 07:47:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Worrawoot Srimaka គ្រូបង្វឹកក្រុមបាល់ទាត់ U-22 ថៃ និយាយដោយមិនលាក់លៀមថាលោកខកចិត្តចំពោះក្រុមក្នុងជ័យជម្នះប្រផុតប្រផើយ ១-០ លើក្រុមទីម័រខាងកើត។

លោក Worrawoot Srimakha

គ្រូបង្វឹកម្ចាស់គ្រងដំណែងមេដាយមាស២០១៥ ថាការបាន៣ពិន្ទុលើក្រុមទីម័រជាសំណាង ព្រោះក្រុមលោកលេងមិនសូវបានល្អ។ "កីឡាករយើងភាគច្រើន លេងដូចជាពួកគេអត់ចង់ឈ្នះសោះ។ កុំសួរខ្ញុំ ព្រោះខ្ញុំក៏មិនដឹងពីមូលហេតុដែរ "។ គ្រូបង្វឹកវ័យ ៤៥ឆ្នាំបាននិយាយ។

គ្រូបង្វឹកថែមទាំងថាឲ្យចំៗ ឲ្យក្រុមកីឡាករលោកទៅមើលអតីតជម្រើសជាតិថៃ ថាពួកគេប្រឹងយ៉ាងណា ដើម្បីមុខមាត់ប្រទេស។ "បើពួកគេបន្តលេងរបៀបនេះ ខ្ញុំមានអារម្មណ៍ថាយើងនឹងឈានមិនដល់វគ្គពាក់កណ្ដាលផ្ដាច់ព្រ័ត្រផង»។ លោកបន្ថែម។

U22 ថៃ

ពាក្យស្តីបន្ទោសរបស់គ្រូបង្វឹកធ្វើឡើងមុនពេល ថៃត្រូវប៉ះកម្ពុជាថ្ងៃទី២០ ខែសីហានេះ វេលាម៉ោង ៧:៤៥ នាទីយប់ ដែលសង្ឃឹមថាក្រុមលោកនឹងពង្រឹងស្មារតីលេងឡើងវិញ។

ក្រុមបាល់ទាត់ថៃ គ្រងដំណែងជើងឯកមេដាយមាសច្រើនជាងគេចំនួន ១៥ដង ក្នុងការបង្ហាញវត្តមានក្នុងព្រឹត្តិការណ៍ស៊ីហ្គេមចំនួន២៩លើក គិតតាំងពីឆ្នាំ១៩៥៩មក និង តាមពីក្រោយដោយ ម៉ាឡេស៊ី មេដាយមាស៦ដង និង មីយ៉ាន់ម៉ា ៥ដង សម្រាប់រយៈពេលដូចគ្នា៕

ប្រភព៖ Football Tribe ប្រែសម្រួល៖ សុខ លាងហ៊ត