ចូលរួមត្រេកអរ ជំងឺមហារីក តា ហ្វុយហ្សូ អាចមានសង្ឃឹម (វីដេអូ)

2017-08-22 04:44:40
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ស៊ូ សាវ៉ាង ហៅ តា ហ៊្វុយហ្សូ អតីតតារាប្លែង និងជាប្រធានសមាគមចលនាវប្បធម៌ជាតិ ដើម្បីជួយដល់កុមារកំព្រា កុមារក្រីក្រ បានថ្លែងឲ្យដឹងថា ជំងឺមហារីកថ្លើម របស់លោកបានប្រសើរជាមុខជាខ្លាំង ហើយលោករំពឹងថា នឹងជាសះស្បើយ១០០% នាពេលដ៏ខ្លីខាងមុននេះ។

តា ហ៊្វុយហ្សូ បានលើកឡើងថា បច្ចុប្បន្នសុខភាពរបស់លោកល្អប្រសើរខ្លាំង បន្ទាប់ពីទទួលការព្យាបាលពីគ្រូពេទ្យនៅប្រទេសថៃជាច្រើនលើកមក។ «វេជ្ជបណ្ឌិតបានឲ្យពិសាថ្នាំជាប្រចាំ និងហាមមិនឲ្យខ្ញុំពិសាគ្រឿងស្រវឹង និងអាហារផ្អាប់ ដូចជា ផ្អក ប្រហុក គេងឲ្យបានគ្រប់គ្រាន់ ហាត់ប្រាណ ជាដើម»តា ហ៊្វុយហ្សូ»។

តា ហ៊្វុយហ្សូ បានទៅព្យាបាលនៅប្រទេសថៃចំនួន៣លើកមកហើយ បន្ទាប់ពីជំងឺរបស់លោកធ្វើទុក្ខ ហើយបានចូលសង្គ្រោះបន្ទាន់នៅមន្ទីរពេទ្យក្នុងស្រុកមួយ។ លោកថា ថ្លៃព្យាបាលរបស់លោកកន្លងមកនេះ គឺចំណាយប្រហែលជា២ម៉ឺនដុល្លារ ដោយថវិកាទាំងនោះ គឺជាអំណោយពីសប្បុរសជនស្ទើរតែទាំងអស់។

អតីតតារាបំប្លែងរូបនេះ នឹងចេញទៅតាមដានសុខភាពតាមការណាត់របស់វេជ្ជបណ្ឌិតម្ដងទៀតនៅថ្ងៃទី៤ កញ្ញា ឆ្នាំ ២០១៧ ខាងមុខ ដោយការទៅប្រទេសថៃជាលើកទី៤នេះ តា ហ៊្វុយហ្សូ បញ្ជាក់ថា គឺទៅជាលើកចុងក្រោយហើយ។

លោក ស៊ូ សាវ៉ាង ហៅ តា ហ៊្វុយហ្សូ មិននឹកស្មានថា ជំងឺរបស់ខ្លួនអាចជាសះស្បើយឡើយ ហើយលោកពិតជាសប្បាយចិត្តជាខ្លាំង។ ជាងនេះទៅទៀត អ្វីដែលធ្វើឲ្យលោកមានកម្លាំងចិត្ត ហើយចងចាំមិនភ្លេចនោះ លោកថា គ្រប់សប្បុរសជនទាំងអស់ដែលបានជួយលោក តែងតែជូនពរឲ្យលោកចាប់ជាសះស្បើយ ដើម្បីមកបង្រៀនចំណេះជំនាញសិល្បៈដល់ក្មេងៗបន្តទៀត ដែលចំណុចនេះហើយបានចាក់ដោតបេះដូងលោកតែម្ដង។

សូមស្ដាប់ការរៀបរាប់របស់ លោក ស៊ូ សាវ៉ាង ហៅ តា ហ៊្វុយហ្សូ ពីសុខភាពរបស់លោក៕

អត្ថបទៈ ស៊ុនហួត