រដ្ឋបាល ដូណាល់ ត្រាំ ត្រៀមរឹតបន្តឹងទិដ្ឋាការលើកម្ពុជា និងប្រទេស ៣ ផ្សេងទៀត

2017-08-24 07:28:28
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋបាលប្រធានាធិបតីដូណាល់ ត្រាំ នឹងរឹតបន្តឹងប្រទេសចំនួន ៤ ដែលធ្លាប់បដិសេធមិនទទួលយកជនជាតិខ្លួនរស់នៅលើទឹកដីអាមេរិកខុសច្បាប់ត្រលប់មកវិញ។ នេះបើតាមការបញ្ជាក់របស់អ្នកនាំពាក្យក្រសួងសន្តិសុខមាតុភូមិអាមរិក លោក Dave Lapan។

ប្រទេសទាំង ៤ មានកម្ពុជា អេរីទ្រី ហ្គីណេ និងសេរ៉ាឡេអូន។ ប្រទេសទាំងនេះត្រូវបានរដ្ឋបាល ដូណាល់ ត្រាំ ចាត់ទុកថាជា «ប្រទេសរឹងរូស» មិនព្រមទទួលយក ឬពន្យារពេលធ្វើមាតុភូមិនិវត្តន៍ពលរដ្ឋខ្លួន បន្ទាប់ពីសហរដ្ឋអាមេរិកនិរទេសពួកគេ។

គួររំលឹកថា ក្នុងអំឡុងពេលឃោសនារកសំឡេងឆ្នោតកន្លងទៅ បេក្ខជនប្រធានាធិបតីដូណាល់ ត្រាំ ធ្លាប់រិះគន់ប្រឆាំងរដ្ឋបាលអូបាម៉ា និងលោកស្រី ហ៊ីលឡារី គ្លីនតុន ថា មិនបានអើពើទណ្ឌកម្មលើប្រទេសមិនសហប្រតិបត្តិការទាំងនោះ។

យ៉ាងហោចណាស់ មាន ២៣ប្រទេសដែលបដិសេធមិនទទួលយកជនជាតិខ្លួនខុសច្បាប់រស់នៅលើទឹកដីអាមេរិក ត្រលប់ទៅប្រទេសកំណើតវិញ ទោះជាអាមេរិកបញ្ជាឲ្យចាកចេញក៏ដោយ រួមទាំងឧក្រិដ្ឋជនប្រើប្រាស់ហិង្សាផង។

លោក ដូណាល់ ត្រាំ ធ្លាប់មានប្រសាសន៍នៅខែសីហា ឆ្នាំ ២០១៦ថា "យល់ព្រម, យើងទុកពួកគេ ប៉ុន្តែមិនអាចកើតមានឡើងទៀតទេនៅអាណត្តិខ្ញុំ"។ ពលរដ្ឋប្រទេសទាំង ៤ ខាងលើ ត្រូវបានចាត់ក្នុងបញ្ជីរបស់រដ្ឋបាលដូណាលត្រាំ រួចហើយ។ ពួកគេប្រឈមនឹងការរឹតបន្តឹងសុំទិដ្ឋាការ ដែលអាចរារាំងពួកគេមិនអោយចូលទឹកដីអាមេរិកទៀតផង៕

ប្រភព៖ CNN ប្រែសម្រួល៖ ឡេង ភារុណ