តារាក្បាច់គុន សុខ ដែន បានស្រីស្អាត អាង សូនីតា ថតឈុតថើបមិនគិតលុយ

2017-08-25 04:07:34
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចតារាៗ កីឡាករ ព្រមទាំងក្រុមបច្ចេកទេស ជិត១០នាក់ បានចូលរួមថត MV បទ "មន្តអាគមន៍ស្នេហ៍" ជាបទចម្រៀងរបស់តារាល្បីខាងក្បាច់គុន លោក សុខ ដែន ដោយមិនគិតប្រាក់។ អ្នកទាំងនោះមាន កញ្ញា អាង សូនីតា នាយឆើត លោក អែល ចាន់តារា កីឡាករវង្ស ណយ ជាដើម ទោះបីជាថតមិនគិតប្រាក់ពិតមែន ប៉ុន្តែប្លង់វិញមានទាំងឈុតថើបមាត់ទៀតផង។

តាមការលើកឡើងរបស់លោក សុខ ដែន បទ "មន្តអាគមន៍ស្នេហ៍" ខ្លួនបានធ្វើជាយូរណាស់មកហើយ ប៉ុន្តែមិនមានប្រាក់ដើម្បីថត MVឡើយ ទើបតែសម្រេចចិត្តថតកាលពីពេលថ្មីៗនេះ ដោយមានការចូលរួមមិត្តភ័ក្ដិដែលជាអ្នកសិល្បៈដូចគ្នា ក៏ដូចជាកីឡាករ ហើយអ្នកទាំងអស់នោះ មកជួយថតមិនគិតប្រាក់ឡើយ។

ចំពោះមូលហេតុដែលនាំឲ្យតារាសម្ដែងខាងលើមិនគិតថ្លៃខ្លួនពីការថតនោះ ត្រូវបានលោកបញ្ជាក់ថា ក៏ព្រោះតែអ្នកទាំងនោះជាមិត្តជិតស្និទ្ធបំផុត ពិសេសនោះ គឺពួកគេអាណិតលោក ត្បិតអីបច្ចុប្បន្នលោកកំពុងដុនដាបលើបញ្ហាសេដ្ឋកិច្ចខ្លាំងណាស់។

តារាសម្ដែងក្នុងរឿង"ព្រះហ្លូងស្ដេចកន"រូបនេះបានបន្តឲ្យដឹងថា ទោះបីជាខ្លួនរាល់ថ្ងៃត្រូវបានមហាជនស្គាល់ថា ជាតារាខាងក្បាច់គុនពិតមែន ប៉ុន្តែបើនិយាយពីជវភាព គឺមានការលំបាកខ្លាំងណាស់ បច្ចុប្បន្នស្នាក់នៅផ្ទះជួល ទីផ្សារសិល្បៈមានក៏ពិតមែន ប៉ុន្តែម្ដងមានម្ដងអត់ ហើយតម្លៃខ្លួនវិញក៏មិនសូវជាបានថ្លៃឡើយ។ ដោយសារតែទីផ្សារសម្ដែង មិនសូវជាកាក់កបអ៊ីចឹងហើយទើបលោកខំធ្វើបទចម្រៀងខ្លះៗ ក្រែងមានទីផ្សារ បច្ចុប្បន្នលោក សុខ ដែនប្រាប់ថា មានបទចម្រៀងផ្ទាល់ខ្លួន៤ ទៅ៥បទហើយ។

បន្ថែមពីលើនោះ លោកក៏បានព្យាយាមផលិតរឿងកំប្លែងខ្លីៗបានមួយចំនួនផងដែរ។ តារាវ័យ ៣៥ឆ្នាំរូបនេះ បានថ្លែងថា MV ១បទខាងលើនេះ ប្រសិនបើថតឲ្យមានគុណភាពដូចផលិតកម្មក្នុងស្រុក ត្រូវចំណាយប្រាក់មិនក្រោម១ពាន់ដុល្លារទេ ប៉ុន្តែដោយមានមិត្តភ័ក្ដិជួយទាំងអស់បែបនេះ លោកចំណាយអស់ត្រឹមតែជាង១០០ ដុល្លារលើអាហារប៉ុណ្ណោះ។

ការថតដោយមិនគិតប្រាក់នេះ លោកថា មិនមែនតែលើកទី១ឡើយ បទចម្រៀងនិងរឿងកំប្លែងខ្លីៗរបស់លោកកន្លងមក ក៏ធ្លាប់អ៊ីចឹងដែរ ព្រោះដូចបានលើកឡើង តារាៗទាំងនោះរាប់អានគ្នា ម្យ៉ាង ការពឹងគ្នាបែបនេះ គឺម្ដងគេម្ដងយើងប៉ុណ្ណោះ។ ទោះបីជាការរៀបរាប់ខាងលើស្ដាប់មើលទៅហាក់ដូចជាកម្សត់វេទនា ដែលធ្វើឲ្យអ្នកដែលមានបំណងចង់ចាប់អាជីពសិល្បៈអាចបោះបង់ចោល ប៉ុន្តែសម្រាប់លោក សុខ ដែនវិញ ថ្លែងថា នៅតែក្រាញននៀលបន្តអាជីពមួយនេះបន្តទៀត ត្បិតអីមហាជនបានស្គាល់ខ្លួនហើយ នឹងគួបផ្សំចិត្តខ្លួនស្រលាញ់ផង៕

អត្ថបទៈ ស៊ុនហួត