កម្ពុជាចាប់ផ្តើមចលនាប្រឡងប្រណាំងបង្គន់អនាម័យសាធារណៈជាលើកដំបូង
- 2017-08-27 07:53:52
- ចំនួនមតិ 0 | ចំនួនចែករំលែក 0
កម្ពុជាចាប់ផ្តើមចលនាប្រឡងប្រណាំងបង្គន់អនាម័យសាធារណៈជាលើកដំបូង
ចន្លោះមិនឃើញ
រាជរដ្ឋាភិបាល កម្ពុជាបានប្រកាសពីការប្រកួតប្រជែងលើផ្នែកបង្គន់អនាម័យសាធារណៈ ខណៈហេដ្ឋារចនាសម្ព័ន្ធលើផ្នែកអនាម័យមួយនេះ នៅមានកម្រិតទាបជាងបណ្តាប្រទេសអាស៊ាន។
លោក ថោង ខុន រដ្ឋមន្ត្រីក្រសួងទេសចរណ៍ នៅក្នុងសប្តាហ៍នេះ មានប្រសាសន៍ថា ចលនាប្រឡងប្រណាំងបង្គន់អនាម័យសាធារណៈជាលើកដំបូងនេះ នឹងទាក់ទាញប្រជាប្រិយភាពពី ទេសចរផង និងដើម្បីឈានទៅដណ្តើមជ័យលាភីផ្នែកបរិស្ថាន និងអនាម័យរបស់សហគមន៍អាស៊ាន ផង។ លោកបញ្ជាក់ថា «បង្គន់សាធារណៈដែលមានស្តង់ដារ ត្រូវតែជាបង្គន់ដែលមានបរិស្ថានជុំវិញស្អាត អនាម័យ ផាសុខភាព និងជាទីពេញចិត្តរបស់ភ្ញៀវទេសចរជាតិ និងអន្តរជាតិ ដែលរួមចំណែកលើកស្ទួយកម្ពុជា ជាគោលដៅទេសចរណ៍ប្រកបដោយភាពទាក់ទាញ»។ ប្រទេសកម្ពុជា បានរៀបចំការប្រឡងប្រណាំងបង្គន់សាធារណៈថា្នក់ជាតិ ដើម្បីជ្រើសរើសជ័យលាភី ទៅប្រឡងថ្នាក់អាស៊ាននៅទីក្រុងឈៀងម៉ៃ ប្រទេសថៃ នៅក្នុងខែមករា ឆ្នាំ២០១៨ខាងមុខ។ លោករដ្ឋមន្ត្រី បានឲ្យដឹងថា ស្ថាប័នរដ្ឋ និងក្រុមហ៊ុនឯកជន អាចចូលរួមចលនាប្រឡងប្រណាំងបង្គន់អនាម័យសាធារណៈនេះបាន។ «បេក្ខភាពបង្គន់សាធារណៈដែលអាចចូលរួមប្រឡងប្រណាំងបានរួមមាន៖ បង្គន់ដែលគ្រប់គ្រងដោយរដ្ឋបាលថ្នាក់ក្រោមជាតិ បង្គន់នៅតាមទីសាធារណៈសួនច្បារ ដងផ្លូវ ផ្សាររដ្ឋ និងចំណតរថយន្តសាធារណៈ ផ្សារទំនើប ចំណតរថយន្តឯកជន ស្ថានីយ៍ប្រងឥន្ទនៈ និងមូលដ្ឋានទេសចរណ៍ ជាដើម»។ លោកបញ្ជាក់ថា បង្គន់អនាម័យ ត្រូវមានលក្ខណៈសម្បត្តិជា បង្គន់ដែលរៀបចំទៅតាមគំរូស្តង់ដារ និងមានការគាំទ្រពីភ្ញៀវទេសចរក្នុងស្រុក និងក្រៅស្រុក ។ យោងតាមរបាយការណ៍ដែលបានសិក្សាលើចំនួនអ្នកប្រើប្រាស់បង្គន់ក្នុងតំបន់អាស៊ី របស់អង្គការសុខភាពពិភពលោក នាឆ្នាំ២០០៨ បានបង្ហាញថា អនាម័យនៅកម្ពុជាមានកម្រិតទាបជាងគេនៅក្នុងតំបន់ ពោលគឺ ចំនួន២៩ភាគរយប៉ុណ្ណោះ បើធៀបនឹងប្រទេសថៃដែលមានរហូតដល់៩៦ភាគរយ ប្រទេសភូមាចំនួន៧៩ភាគរយ វៀតណាម៦៧ភាគរយ ប្រទេសទីម័រ៤០ភាគរយ ប្រទេសឡាវ៣៨ភាគរយ និងប្រទេសឥណ្ឌូនេស៊ី៣៨ភាគរយ។
ក្នុងចំណោមប្រជាជនកម្ពុជាជាង១៥លាននាក់ គឺមានតែប្រមាណ៤លាននាក់ប៉ុណ្ណោះដែលបានប្រើប្រាស់បង្គន់ ខណៈប្រមាណជា១០លាននាក់ទៀត នៅបន្ទោរបង់ពាសវាលពាសកាលនៅឡើយ ហើយបានបង្កឲ្យមានលាមកស្រស់ក្នុងមួយថ្ងៃៗជិត៣.០០០តោន ត្រូវរាយប៉ាយក្នុងបរិស្ថាន។ បញ្ហាកង្វះអនាម័យនេះ បានធ្វើឲ្យកម្ពុជាខាតបង់ថវិកាប្រមាណ៤៤៨លានដុល្លារ ក្នុងមួយឆ្នាំ ក្នុងនោះខាតលើសុខភាពជិត១៨៧លានដុល្លារ ខាតលើការបំពុលប្រភពទឹកចំនួន១៥០លានដុល្លារ ខាតទៅលើពេលវេលាដើរទៅជុះកណ្តាលវាល/ព្រៃចំនួន ៣៨លានដុល្លារ ខាតបង់លើផ្នែកទេសចរណ៍ចំនួន៧៣លានដុល្លារ៕