ពិសេសមែន! មរតកដើម ១១បទ កក្រើកឆាកតន្ត្រីឆ្លងសតវត្ស
- 2017-08-28 10:17:10
- ចំនួនមតិ 0 | ចំនួនចែករំលែក 0
ពិសេសមែន! មរតកដើម ១១បទ កក្រើកឆាកតន្ត្រីឆ្លងសតវត្ស
ចន្លោះមិនឃើញ
"តន្ត្រីឆ្លងសតវត្ស" កាលពីយប់មិញ ធ្វើឱ្យអ្នកទស្សនាមានការភ្ញាក់ផ្អើល និងពេញចិត្តយ៉ាងខ្លាំងព្រោះតែគំនិតច្នៃប្រឌិត និងទេពកោសល្យរបស់សិល្បៈករ។
ការសម្ដែងសិល្បៈជាច្រើនទម្រង់ មានដូចជា របាំបុរាណ ល្ខោនខោល ក្បាច់គុនល្បុក្កតោ ចម្រៀងសម័យដែលយកទម្រង់ដូចក្នុងទសវត្សរ៍ទី៦០ និងសៀកជាដើម ត្រូវបានបង្ហាញជូនភ្ញៀវកិត្តិយសជាតិនិងអន្តរជាតិយ៉ាងកក្រើកឆាក។ ។
អ្នកសម្របសម្រួលជាន់ខ្ពស់កម្មវិធីអភិវឌ្ឍន៍សិល្បៈអ្នកនាង យ៉ុន សុខខន បានឱ្យដឹងថា ការសម្ដែងតន្ត្រីឆ្លងសតវត្សនេះ ធ្វើឡើងក្នុងគោលបំណងបញ្ជ្រាបបទពិសោធន៍សិល្បៈទៅកាន់អ្នកជំនាន់ក្រោយ។ ម្យ៉ាងវិញទៀតធ្វើឡើងដើម្បីជាវេទិកាបង្ហាញស្នាដៃ និងគំនិតច្នៃប្រឌិតរបស់សិល្បករផងដែរ។ "ការសម្ដែងនេះមិនមែនសម្ដែងតែសិល្បៈបុរាណទេ គឺមានទាំងសម័យ និងភាពច្នៃប្រឌិត។ យើងចង់ឱ្យកម្មវិធីនេះជាវេទិកាសិល្បៈសម្រាប់អ្នកសិល្បៈបញ្ចេញស្នាដៃ និងគំនិតច្នៃប្រឌិតរបស់ខ្លួន តាមកម្មវិធីយើងនឹងធ្វើមួយខែម្ដង”។
ប្រធានក្រុមដឹកនាំសម្ដែងស្នាដៃនេះ លោក សួន សុភ័ក្ត្រ បានប្រាប់ថា ក្នុងការដឹកនាំរឿងនេះគឺមានការពិបាក៣ចំណុច ទី១គឺសរសេររឿងពីដើមរហូតដល់ចប់ នៅពេលសរសេរហើយត្រូវហាត់មួយផ្នែកម្ដងឱ្យត្រូវចង្វាក់។ ទី២ពិបាកក្នុងការហាត់សមដោយសិល្បករទាំងអស់សុទ្ធតែរវល់ និងទី៣ត្រូវយកទម្រង់ទាំងអស់មកបញ្ចូលគ្នា។ លោកបញ្ជាក់ថា ស្នាដៃមួយនេះមានផលលំបាកច្រើនមែនតែលោកពេញចិត្ត ព្រោះវាជាការថែរក្សាមរតកដូនតារួមនឹងគំនិតច្នៃប្រឌិត។ លោកក៏បានអំពាវនាវដល់កូនខ្មែរគ្រប់វ័យចូលរួមអភិរក្សនិងអភិវឌ្ឍន៍សិល្បៈរបស់ខ្លួនមុននឹងជាតិសាសន៍ដទៃយកវាធ្វើជារបស់គេ។
"តន្ត្រីឆ្លងសតវត្ស" រៀបចំឡើងដោយអង្គការសិល្បៈខ្មែរអមត រួមសហការជាមួយក្រុមរីកសាយ៕