បានត្រឹមប្រាក់មែន តែម្ចាស់មេដាយប៉េតង់គូចម្រុះបង្កើតកំណត់ត្រាល្អបំផុត

2017-08-29 01:46:12
ចំនួនមតិ 0 | ចំនួនចែករំលែក 0

ចន្លោះមិនឃើញ

បរាជ័យក្រោយការវាយបករបស់ថៃ ជារឿងគួរឲ្យសោកស្ដាយសម្រាប់ប៉េតង់កម្ពុជា វិញ្ញាសាគូចម្រុះបុរស-នារី បានត្រឹមគ្រងមេដាយប្រាក់ តែក៏ជាកំណត់ត្រាល្អបំផុតមួយក្នុងអាជីពរបស់កីឡាករ សៅ សុភារ៉ាន់ ដ្បិតជាការចូលរួមប្រជែងលើកដំបូងបង្អស់ ក្នុងព្រឹត្តិការណ៍កីឡាស៊ីហ្គេម។

កីឡាករ សៅ សុភារ៉ាន់ និងកីឡាការិនី ឌួង ឌីណា

«តាមពិតទៅខ្ញុំធ្លាប់ឈ្នះមេដាយមាស ជើងឯកប៉េតង់អាស៊ាន មេដាយមាសកីឡានិស្សិតអាស៊ាន តែសម្រាប់ស៊ីហ្គេមនេះវិញ ខ្ញុំអត់ធ្លាប់ចេញសោះ។ នេះជាលើកដំបូងបង្អស់ចូលប្រកួតស៊ីហ្គេម បានឈ្នះមេដាយប្រាក់មួយគ្រឿង ខ្ញុំសប្បាយ និងរំភើបចិត្តខ្លាំងណាស់ ដែលធ្វើបានលទ្ធផលបែបនេះ»។ សម្ដីរបស់ សៅ សុភារ៉ាន់

យ៉ាងណាក្ដី ភាពសោកស្ដាយនៅតែវិលវល់ក្នុងអារម្មណ៍កីឡាកររូបនេះ ដោយសាមីខ្លួនទទួលស្គាល់ថា សមត្ថភាពគូប្រជែងពិតជាមិនធម្មតា ហើយថាការភ្លាត់ស្នៀតវាយខុស២គ្រាប់ក្នុងសេវាចុងក្រោយ បណ្ដាលឱ្យថៃឆក់យកមេដាយមាសទៅបាត់។

«ពេលហ្នឹងពិន្ទុយើង៨ស្មើ យើង៨គេ៦គេស៊ី២តាមស្មើ។ គេបោះសឺវីសទៅ កូនគេឱបប៊ីជាប់ ខ្ញុំសម្រេចចិត្តវ៉ៃតែវ៉ៃអត់បានល្អ ផុតក្បាលប៊ូលគេ៣គ្រាប់ ហើយយើងចូលបិទគេកុំឱ្យស៊ីច្រើន តែចូលល្អបានតែ១គ្រាប់ គេសល់ប៊ូលច្រើន គេចូលស៊ី៥ គេឈ្នះតែម្ដង»។ សៅ សុភារ៉ាន់ បន្ថែម

គួរបញ្ជាក់ថា កីឡាករ សៅ សុភារ៉ាន់ និងកីឡាការិនី ឌួង ឌីណា ចាប់ដៃគ្នាយកបានមេដាយប្រាក់ទី១សម្រាប់កម្ពុជា ក្នុងវិញ្ញាសាវាយគូចម្រុះបុរសនារី ក្រោយចាញ់ការវាយបកពីក្រុមថៃ ដោយពិន្ទុ ១៣-៨ ដូចកាលកីឡាការិនី កែ ឡេង និង អ៊ុក ស្រីមុំ ដណ្ដើមបានមេដាយមាសពីថៃ វិញ្ញាសាវាយគូនារីដែរ៕

ស្រាបៀរអង្គរមានមោទនភាពគាំទ្រអត្តពលិកជាតិចូលរួមប្រកួតកីឡាស៊ីហ្គេម ២០១៧ #ឆន្ទៈយើងបេះដូងយើង៕