៥ ចំណុចនាំឲ្យ Arsenal ជួបវិបត្តិលេងវល់ៗនៅដើមរដូវកាល
- 2017-08-29 09:25:51
- ចំនួនមតិ 0 | ចំនួនចែករំលែក 0
៥ ចំណុចនាំឲ្យ Arsenal ជួបវិបត្តិលេងវល់ៗនៅដើមរដូវកាល
ចន្លោះមិនឃើញ
៣ប្រកួតដំបូងដើមរដូវកាល Premier League ក្រុមកាំភ្លើងធំ Arsenal លេងមិនបានល្អទេ ក្នុងនោះឈ្នោះ Leicester City ទាំងប្រផឹតប្រផើយ ចាញ់ Stoke City និង Liverpool ធ្ងន់ក ៤-០។ តើកត្តាអ្វីខ្លះនាំឲ្យ ក្រុមលោក Wenger ជួបវិបត្តិទាំងដើមទៅបែបនេះ។
១. អារម្មណ៍របស់កីឡាករចង់ចេញពីក្លឹប
កាលពីប្រកួតជាមួយ Liverpool កីឡាករមួយចំនួនធំរបស់កាំភ្លើងធំហាក់លេងមិនមានទំនុកចិត្តនិងស៊ីចង្វាក់គ្នាឡើយ។ Alexis Sanchez និង Alex-Oxlade Chamberlain សុទ្ធតែមានលេងជម្រើសដំបូងកាលពីចុងសប្ដាហ៍ ហើយពួកគេជាមុខសញ្ញាធុញទ្រាន់នឹងក្លឹបចង់ដើរចេញ ដូច្នេះជាហេតុផលមួយធ្វើឲ្យអារម្មណ៍របស់ពួកគេប្រមូលផ្ដុំមិនបានល្អ។ ជាក់ស្ដែងកាលពីយប់មិញ សារព័ត៌មានអង់គ្លេសបានចុះផ្សាយថា Chamberlain បានយល់ព្រមមកលេងឲ្យ Chelsea ហើយ បន្ទាប់ពីគេមិនព្រមតកុងត្រាជាមួយ Arsenal។ ខ្សែការពារ Shkodran Mustafi ក៏មានដំណឹងចង់ចេញពីក្លឹបទីកាន់ទៅដីអ៊ីតាលីដែរ។ អ្វីសំខាន់ Arsenal ឆ្នាំនេះមិនបានលេង Champions League ទៀត។
២. ឆ្នាំផុតកំណត់នៃកុងត្រារបស់កីឡាករសំខាន់ៗដូចគ្នាពេក
បញ្ហាទី២នៅតែជារឿងកីឡាករ ជាទូទៅរាល់កីឡាករទាំងអស់ដែលសមត្ថភាពនៅល្អ ហើយកុងត្រាជិតអស់ ពួកគេតែរំអុកជាមួយក្លឹបដើម្បីដំឡើងប្រាក់ខែសម្រាប់កុងត្រាថ្មី បើមិនដូច្នេះពួកគេនឹងចាកចេញរកទ្រនំថ្មី។ Alexis Sanchez, Alex Oxlade-Chamberlain និងMesut Ozil កីឡាករទាំងនេះកិច្ចសន្យារបស់ពួកគេនឹងអស់នៅឆ្នាំក្រោយដូចគ្នា ហើយបញ្ហាចរចាកុងត្រាថ្មីនៅតែជាចំណោទចោទសួរ ស្របពេល Chamberlain ចេញទៅមួយហើយ។ នេះក៏ជាកត្តាសំខាន់ធ្វើឲ្យកីឡាករលេងមិនអស់លើទីលាន ដើម្បីបង្ខំចិត្តក្លឹបដែរ។
៣. ពាក់នឹងយុទ្ធសាស្ត្រទម្រង់លេងថ្មី
យុទ្ធសាស្ត្រទម្រង់ចាស់ ៤-២-៣-១ ត្រូវបានលុបបាត់ ដោយលោក Wengerជំនួសទម្រង់ ៣-៤-២-១ វិញដែលលោក Antonio Conte ជោគជ័យកាលពីរដូវកាលមុន។ ព្រោះតែទម្រង់នេះកីឡាកររបស់ Arsenal មិនទាន់ស៊ាំ ហើយមិនស្ដាប់ការណែនាំពីអ្នកចាត់ការ។ ដូចលេងជាមួយ Liverpool កីឡាករ Granit Xhaka និង Aaron Ramsey មិនមានទំនួលខុសត្រូវការការពារ ស្របពេលខ្សែការពារទាំង៣នៅទន់ខ្សោយលេងមិនស៊ីគ្នា។
៤. រាល់ប្រកួតជាមួយក្រុមធំៗក្រៅដី Arsenal លេងមិនសូវឈ្នះគេ
យោងតាមលទ្ធផល ២៥ប្រកួតចុងក្រោយនៅក្រៅដីជាមួយ Manchester United, Manchester City, Chelsea, Liverpool និង Tottenham ក្រុម Arsenal ឈ្នះបានតែ៣ ស្មើ៧ ចាញ់១៦។
៥. អ្នកចាត់ការ
ជាយូរមកហើយ អ្នកគាំទ្រក្លឹបនៅឡុងដុងមួយនេះតែងចង់ឲ្យ Arsene Wenger ចេញ ដោយសារលោកដឹកនាំក្រុមមិនបានលេចធ្លោឲ្យខ្លាំងក្លា ដូចក្លឹបអង់គ្លេសដទៃឡើយ គឺត្រឹមមួយរស់ៗប៉ុណ្ណោះ។ ក្នុងរដូវកាលថ្មីក៏អាចជាសម្ពាធថ្មីរបស់ Wenger ព្រោះលោកទើបតែចុះកុងត្រា២ឆ្នាំ។ ស្របពេលមិនមានការនាំចូលកីឡាករល្អៗចូលច្រើន និង Wenger អារម្មណ៍មិនល្អតាំងពីចប់រដូវមុន វាអាចជាបញ្ហាធ្វើឲ្យលោកស្មុគស្មាញដឹកនាំក្រុមមិនល្អនៅដើមរដូវកាលនេះ៕
ចុចអាន៖
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
