តិចនិកទាំង ៥ អាចជួយឲ្យអ្នករើសជំនាញសិក្សាថ្នាក់មហាវិទ្យាល័យបានត្រឹមត្រូវ
- 2017-08-29 12:05:00
- ចំនួនមតិ 0 | ចំនួនចែករំលែក 0
តិចនិកទាំង ៥ អាចជួយឲ្យអ្នករើសជំនាញសិក្សាថ្នាក់មហាវិទ្យាល័យបានត្រឹមត្រូវ
ចន្លោះមិនឃើញ
ការរើសមុខជំនាញសិក្សាថ្នាក់មហាវិទ្យាល័យជារបត់ថ្មី និងសំខាន់មួយក្នុងជីវិត ជាពិសេសសម្រាប់សិស្សានុសិស្សដែលទើបតែរៀនចប់ថ្នាក់ទី ១២តែម្ដង ព្រោះការរើសនេះបានជះឥទ្ធិពលយ៉ាងខ្លាំងដល់ដំណាក់កាលក្រោយៗទៀតនៃជីវិតរបស់អ្នកទាក់ទងនឹងការរៀបចំផែនការជីវិតនាថ្ងៃអនាគត ក៏ដូចជាក្នុងផ្លូវមុខរបរ ឬជំនួញផ្សេងៗជាដើម។
ដូច្នេះការជ្រើសរើសមុខជំនាញឲ្យបានត្រឹមត្រូវគឺជារឿងសំខាន់ណាស់ សម្រាប់អ្នក ព្រោះបើរើសបានត្រឹមត្រូវ អ្នកនឹងប្រើមុខជំនាញអ្នកបានត្រឹមត្រូវសមស្របទៅនឹងគោលដៅរបស់អ្នក ហើយអ្នកបានសន្សំសំចៃពេលវេលារបស់អ្នកបានច្រើនទៀតផង។ ហេតុនេះហើយ អត្ថបទនេះនឹងលើកឡើងពីតិចនិកទាំង ៥ ដែលអាចជួយអ្នកក្នុងការរើសមុខជំនាញថ្នាក់សិក្សាថ្នាក់មហាវិទ្យាល័យឲ្យបានត្រឹមត្រូវ មានដូចតទៅ៖
១.ស្វែងរកព័ត៌មានទាក់ទងនឹងមុខជំនាញឲ្យបានច្រើន៖
ព័ត៌មានទាក់ទងនឹងមុខជំនាញគឺពិតជាសំខាន់ ព្រោះវាធ្វើឲ្យអ្នកយល់កាន់តែច្បាស់ពីមុខជំនាញទាំងនោះ។ ដូច្នេះអ្នកគួរទៅសួរព័ត៌មានទាំងនេះពីសាកលវិទ្យាល័យមួយចំនួនដែលមានជំនាញដែលអ្នកចាប់អារម្មណ៍ ឬចូលតាមគេហទំព័រផ្លូវការរបស់សាកលវិទ្យាល័យទាំងនោះ (បើមាន) ឬបើសិនជាអ្នកស្គាល់សិស្សច្បងជំនាន់មុន អ្នកអាចសួរពួកគាត់បានទាក់ទងជំនាញទាំងនោះ។
២.ពិគ្រោះជាមួយអ្នកជំនាញ អ្នកដែលមានបទពិសោធន៍ ឬអ្នកដែលស្គាល់អ្នកច្បាស់ឲ្យបានច្រើន៖
អ្នកគួរធ្វើការពិភាក្សាជាមួយអ្នកជំនាញនៅតាមសិក្ខាសាលាផ្សេងៗដែលទាក់ទងនឹងការរើសជំនាញសិក្សា។ អ្នកក៏គួរតែប្រឹក្សាជាមួយសិស្សច្បងមានបទពិសោធន៍ ហើយជាពិសេសអ្នកគួរតែពិគ្រោះជាមួយអ្នកដែលស្គាល់អ្នកច្បាស់ ដូចជាឪពុកម្ដាយអ្នកជាដើម ដើម្បីជាជំនួយដល់ការសម្រេចចិត្ត។
៣.ចាត់ទុកការរើសជំនាញសិក្សាជាការងារមួយដែលយើងត្រូវសម្រេច៖
ធម្មតារាល់ការបំពេញកិច្ចការងារអ្វីមួយ អ្នកត្រូវតែមានការប្រុងប្រយ័ត្ន ការគិតមុខគិតក្រោយ ការប្ដេជ្ញាចិត្ត និងការទទួលខុសត្រូវខ្ពស់ណាស់ ដើម្បីសម្រេចកិច្ចការបានផ្លែផ្កាគួរជាទីគាប់ចិត្ត។ ដូច្នេះ អ្នកត្រូវចាត់ទុកការរើសជំនាញសិក្សានេះ ឲ្យដូចទៅនឹងពេលបំពេញការងារសំខាន់អ៊ីចឹងដែរ ព្រោះការរើសនេះតម្រូវឲ្យអ្នកប្រើពេលវេលាគិតពិចារណាច្រើន ហើយមានទំនួលខុសត្រូវខ្ពស់ចំពោះលទ្ធផលដែលកើតឡើងក្រោយសេចក្ដីសម្រេចចិត្តរបស់អ្នកមួយនេះ។ ពេលដែលមានផ្នត់គំនិតបែបនេះ វាអាចធ្វើឲ្យអ្នកមានភាពយកចិត្តដាក់ក្នុងការរើស ដែលនេះអាចជួយឲ្យអ្នករើសមុខជំនាញត្រូវ។
៤.ស្វែងយល់ពីខ្លួនឯង៖
អ្នកគួរចំណាយពេលឲ្យបានច្រើនបន្តិចក្នុងការស្វែងយល់ពីខ្លួនអ្នកឲ្យបានច្រើន តាមរយៈការសួរខ្លួនឯងនូវសំណួរងាយតែពិបាកឆ្លើយមួយចំនួនដូចជា ខ្លួនចូលចិត្តអ្វីឲ្យពិតប្រាកដ ចង់រៀនមុខជំនាញរបៀបណា ចង់ប្រកបមុខរបរ ឬមុខជំនាញអ្វីនាពេលខាងមុខជាដើម។ សំណួរទាំងនេះមិនមែនតែមួយថ្ងៃឆ្លើយបាននោះទេ ពោលគឺត្រូវពេលចំណាយពេលច្រើនក្នុងការឆ្លើយ រហូតដល់អ្នកអាចរកឃើញពីអ្វីជាខ្លួនអ្នកពិតប្រាកដ រួចអ្នកអាចសន្និដ្ឋានបានថាត្រូវរៀនជំនាញអ្វីតាមរយៈចម្លើយនៃសំណួរទាំងនោះ។
៥.ដាក់គោលដៅឲ្យបានច្បាស់លាស់៖
ពេលដែលអ្នកព្យាយាមយល់ពីខ្លួនឯងហើយ អ្នកអាចដាក់ចេញនូវគោលដៅមួយចំនួនសម្រាប់ជាផែនការរបស់អ្នកទៅថ្ងៃខាងមុខទាក់ទងនឹងជំនាញដែលអ្នកបានរើស។ អ្នកគួរដាក់ផែនការរយៈពេលខ្លី ឬវែងដូចជា អ្នកត្រូវសម្រេចអ្វីបានខ្លះក្នុងរយៈពេល ១ខែ ៣ខែ ៦ខែ ឬ១ឆ្នាំដំបូងនៃការរៀនជំនាញដែលអ្នករើស ហើយអ្នកត្រូវអភិវឌ្ឍខ្លួនយ៉ាងណាដើម្បីឲ្យរៀនមុខជំនាញដែលអ្នករើសឲ្យបានលទ្ធផលល្អ ហើយអ្នករំពឹងអ្វីខ្លះពីមុខជំនាញនេះជាដើម។ ចូរចងចាំថា អ្នកគួរដាក់ផែនការណាដែលខ្លួនអ្នកអាចធ្វើបាន មិនមែនផែនការបែបស្រមើស្រមៃហួសហេតុដែលមិនអាចសម្រេចបាន ឬផែនការដែលធ្ងន់ធ្ងរពេកដែលដាក់សម្ពាធលើអ្នកខ្លាំងនោះទេ។ បើអ្នកអាចចេញគោលដៅច្បាស់លាស់បាន នោះមានន័យថាអ្នកពេញចិត្តជំនាញនោះហើយ។
សរុបមក ការជ្រើសរើសមុខជំនាញសិក្សាគឺពិតជាសំខាន់ខ្លាំងណាស់ ព្រោះវាមានទំនាក់ទំនងយ៉ាងជិតស្និទ្ធទៅនឹងដំណើរជីវិតរបស់អ្នកក្នុងពេលនេះ ក៏ដូចជាពេលអនាគត។ ដូច្នេះសូមពិចារណាឲ្យបានច្បាស់លាស់ ដើម្បីរើសឲ្យបានត្រឹមត្រូវ។ សូមជូនពរឲ្យមានសំណាងល្អក្នុងការជ្រើសរើសដ៏សំខាន់មួយនេះ៕
http://www.huffingtonpost.com/gianna-sengupta/7-tips-for-choosing-a-col_b_5993994.html https://www.washington.edu/uaa/advising/academic-planning/majors-and-minors/choosing-a-major/ https://admissions.carleton.ca/programs-of-study/how-to-choose-a-major/factors-to-consider/