Monaco ទិញ Jovetic ជាផ្លូវការហើយ

2017-08-30 01:37:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបជើងឯកលីគបារាំងកាលពីរដូវកាលមុន Monaco ទើបតែប្រកាសជាផ្លូវការនូវការទិញកីឡាករខ្សែបម្រើប្រយុទ្ធ Stevan Jovetic របស់ក្លឹបយក្សអ៊ីតាលី Inter Milan ដើម្បីមកជំនួសកន្លែងកីឡាករខ្សែប្រយុទ្ធវ័យក្មេង Kylian Mbappe ដែលបម្រុងនឹងចេញទៅក្លឹបមហាសេដ្ឋី PSG។

កីឡាករវ័យ ២៧ឆ្នាំរូបនេះបានចុះកុងត្រា ៤ឆ្នាំ ជាផ្លូវការជាមួយក្លឹប Monaco ដែលបានទិញខ្សែបម្រើប្រយុទ្ធសញ្ជាតិម៉ុងតេណេក្រូនេះពីក្លឹប Inter Milan ក្នុងតម្លៃ ១១លាន អឺរ៉ូ។

Jovetic

កីឡាកររូបនេះលេងមិនសូវបានល្អប៉ុន្មានទេនៅក្នុងក្លឹបយក្សអ៊ីតាលីមួយនេះកាលពីរដូវកាលមុន ហើយក៏ត្រូវបានក្លឹបអេស្ប៉ាញ Sevilla ខ្ចីជើងកាលពីខែមករា ដែលកីឡាកររូបនេះបានបង្ហាញខ្លួន ២៦ដង ហើយស៊ុតចូលបាន៥ គ្រាប់។ ការទិញកីឡាកររូបនេះ បានបញ្ជាក់ពីការជិតចាកចេញរបស់កីឡាករវ័យក្មេងឆ្នើមរបស់ក្លឹបជើងឯកលីគបារាំងមួយនេះ ទៅក្លឹបមហាសេដ្ឋី PSG ដែលទើបតែបំបែកកំណត់ត្រាពិភពបាល់ទាត់ក្នុងការទិញកីឡាករ Neymar ពីក្លឹបអ្នកមានបុណ្យ Barcelona ក្នុងតម្លៃថ្លៃបំផុត។

Mbappe

បើតាមពាក្យចចាមអារាម Jovetic នឹងពាក់អាវលេខ ១០ ដែលជាអាវដែល Mbappe ត្រូវពាក់នារដូវកាលនេះ។ កីឡាករ Mbappe ទើបឡើងជើងខ្លាំងកាលពីរដូវកាលមុន បន្ទាប់ពីបង្ហាញទម្រង់លេងបានយ៉ាងល្អ ដោយចំណុចនេះហើយបានទាក់ទាញក្លឹបនៅអឺរ៉ុបជាច្រើនដែលក្នុងនោះមានដូចជា ក្លឹបយក្សអេស្ប៉ាញ Real Madrid និងក្លឹបមហាសេដ្ឋី PSG នៅបារាំងផងដែរ។

លោក Didier Deschamps

បញ្ជាក់ផងដែរថា កាលពីថ្មីៗ គ្រូបង្វឹកក្រុមជម្រើសជាតិបារាំង លោក Didier Deschamps បានថ្លែងទៅអ្នកសារព័ត៌មានថា Mbappe បានដូរក្លឹបហើយ ហើយក្លឹបដែលខ្សែប្រយុទ្ធវ័យ ១៨ឆ្នាំរូបនេះដូរទៅគឺក្លឹបមួយក្នុងលីគកំពូលបារាំង (ដែលមិនមានក្លឹបណាក្រៅពី PSG នោះទេដែលហ៊ានបោះលុយរាប់រយលានលើការទិញកីឡាករ)៕

ចុចអាន៖

ប្រភព៖ Goal ប្រែសម្រួល៖ ហ៊ីម រស្មី