វ៉ាត់ ចំរើន៖ "កម្ពុជា សម្រេចគោលដៅឈរលេខ៨ តែភ័យអរច្រើនថ្ងៃចុងក្រោយ"

2017-08-30 08:18:41
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការនៃគណៈកម្មាធិការជាតិអូឡាំពិកកម្ពុជាឯកឧត្ដម វ៉ាត់ ចំរើន លើកឡើងថា ស៊ីហ្គេមឆ្នាំនេះ កម្ពុជាបានសម្រេចតាមគោលដៅរបស់ខ្លួនហើយ ពោលអាចរក្សាចំណាត់ថ្នាក់លេខ៨បានដូចឆ្នាំ២០១៥ តែហាក់បុកពោះបន្តិចដោយសារមេដាយមាសទាំង២រកបាននៅថ្ងៃបិទបញ្ចប់ការប្រកួតតែម្ដង។

«បេសកកម្មលើកនេះ យើងអាចនិយាយថា ជោគជ័យនៅក្នុងគោលដៅរំពឹងទុករបស់យើង បានន័យថា យើងត្រូវឈរនៅលេខ៨ក្នុងចំណោម១១ប្រទេសហ្នឹងដដែល។ ប៉ុន្តែវាមិនមែនជាការងាយស្រួលប៉ុន្មានទេ យើងជួបរឿងភ័យអរច្រើននៅក្នុងថ្ងៃចុងក្រោយ ដោយសារមេដាយមាសគុនខ្មែរ និង តេក្វាន់ដូ ទាំង២នេះ ជាអ្នកកំណត់ចំណាត់ថ្នាក់កម្ពុជា»។ សម្ដីឯកឧត្ដម វ៉ាត់ ចំរើន

ជាមួយគ្នានេះ ឯកឧត្ដមបានវាយតម្លៃជារួមថា កម្រិតបច្ចេកទេសរបស់អត្តពលិកកម្ពុជាមានភាពប្រសើរជាងមុន ខណៈប្រភេទកីឡាមួយចំនួន កាន់តែមានភាពស្វិតស្វាញក្នុងការប្រកួតប្រជែង។

«ក្នុងនាមខ្ញុំជានាយបេសកកម្ម ខ្ញុំអាចវាយតម្លៃខាងផ្នែកបច្ចេកទេសថា យើងមានកម្រិតបច្ចេកទេសលូតលាស់ល្អប្រសើរ ហើយការប្រកួតប្រជែងមានប្រភេទខ្លះស្វិតស្វាញគួរឱ្យកោតសរសើរ។ បើទោះជាប្រភេទកីឡាខ្លះ យើងឃើញថាចាញ់ តែចាញ់ក្នុងនាមគេកោតសរសើរលើកម្រិតបច្ចេកទេស ជាក់ស្ដែងកីឡាការិនីវាយកូនបាល់យើងតែម្ដង»។ ឯកឧត្ដមបន្ថែម

បេសកកម្មស៊ីហ្គេមលើកទី២៩របស់កម្ពុជាបានបិទបញ្ចប់ហើយ ដោយដណ្ដើមបានមេដាយមាស ៣ គ្រឿង ប្រាក់ ២ គ្រឿង និងសំរឹទ្ធ ១២ គ្រឿង ឈរចំណាត់ថ្នាក់លេខ៨ លើប្រទេសឡាវ ប្រ៊ុយណេ និងទីម័រខាងកើត ខណៈម្ចាស់ផ្ទះម៉ាឡេស៊ីឈរកំពូលតារាង ជាមួយមេដាយសរុប ៣១៥ គ្រឿង៕

តារងមេដាយក្នុងព្រឹត្តិការណ៍កីឡាស៊ីហ្គេមលើកទី២៩ ឆ្នាំ២០១៧ នៅប្រទេសម៉ាឡេស៊ី