ទឹកជំនន់អាក្រក់បំផុតនៅអាស៊ីខាងត្បូង ផ្ដាច់ជីវិតមនុស្ស ១២០០នាក់ហើយ

2017-08-31 02:57:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ះពាល់ខ្លាំង ឥណ្ឌា បង់ក្លាដេស និងនេប៉ាល់
ខូចខាតសាលា ១៨០០០
ប៉ះពាល់មនុស្ស ១៧លាននាក់ក្នុងប្រទេសឥណ្ឌា

យ៉ាងហោចណាស់ មនុស្ស ១២០០នាក់បានបាត់បង់ជីវិត និងរាប់លាននាក់ត្រូវចាកចោលផ្ទះសម្បែង បន្ទាប់ពីទឹកជំនន់ដ៏អាក្រក់ វាយប្រហារប្រទេសឥណ្ឌា បង់ក្លាដេស និងនេប៉ាល់ នៅអាស៊ីបែកត្បូង។

ភ្នាក់ងារផ្ដល់ជំនួយអន្តរជាតិ បាននិយាយថា អ្នកភូមិរាប់ពាន់នាក់ ត្រូវបានកាត់ផ្ដាច់ដោយទឹកជំនន់ ដោយគ្មានស្បៀងអាហារ និងទឹកស្អាតប្រើប្រាស់អស់ជាច្រើនថ្ងៃ។ អាស៊ីខាងត្បូង តែងរងគ្រោះដោយទឹកជំនន់ អំឡុងរដូវភ្លៀងធ្លាក់មូសុង ចាប់ពីខែមិថុនាដល់ខែកញ្ញា ប៉ុន្តែឆ្នាំនេះ ជាគ្រោះអាក្រក់បំផុតប្រចាំទសវត្ស។

តាមរបាយការណ៍បានបង្ហាញថា រហូតមកដល់ពេលនេះ ជំនន់បានប៉ះពាល់មនុស្ស ១៧លាននាក់ក្នុងប្រទេសឥណ្ឌា ហើយមនុស្សរាប់ពាន់នាក់ ត្រូវរស់នៅក្នុងតង់បណ្ដោះអាសន្ន។ មន្ត្រីឧតុនិយមបានព្យាករថា ភ្លៀងខ្លាំងនឹងបន្តធ្លាក់ក្នុងរយៈពេល ២៤ម៉ោងទៀត ដែលបង្ខំឲ្យប្រជាជនទាំងអស់ត្រូវស្នាក់ក្នុងផ្ទះ មិនអាចចេញទៅណារួច។

ក្រៅពីឆក់យកជីវិតមនុស្ស ជំនន់ដ៏អាក្រក់នេះ បានបំផ្លាញដំណាំកសិកម្មជាច្រើនទៀត។ រដ្ឋមន្ត្រីគ្រប់គ្រងគ្រោះមហន្តរាយរបស់ឥណ្ឌា បាននិយាយថា ដំណាំជាង ៦៩ម៉ឺនហិកតារ រងការខូចខាត ហើយក្នុងនោះមាន ១ម៉ឺនហិកតារ ត្រូវបំផ្លាញទាំងស្រុងតែម្ដង។

លើសពីនេះ ជំនន់នៅអាស៊ីខាងត្បូង ក៏បានបំផ្លាញ និងប៉ះពាល់ដល់សាលា ១៨០០០ ដែលធ្វើឲ្យក្មេង ១,៨លាននាក់ មិនអាចទៅសាលាបាន៕