ថ្មីបំផុត! ស្រ្តីមានរបររកស៊ី លែងពិបាកចុះបញ្ជីពាណិជ្ជកម្មទៀតហើយ
- 2017-08-31 07:37:02
- ចំនួនមតិ 0 | ចំនួនចែករំលែក 0
ថ្មីបំផុត! ស្រ្តីមានរបររកស៊ី លែងពិបាកចុះបញ្ជីពាណិជ្ជកម្មទៀតហើយ
ចន្លោះមិនឃើញ
ចាប់ពីថ្ងៃនេះទៅ សហគ្រិនជាស្ត្រីក្នុងប្រទេសកម្ពុជាទាំងអស់ ដែលមានរបររកស៊ី មិនថាជាលក្ខណៈគ្រួសារ លក្ខណៈខ្នាតតូច ខ្នាតមធ្យមនឹងលែងពិបាកទៀតហើយ នៅក្នុងការចុះបញ្ជីពាណិជ្ជកម្ម។ បច្ចុប្បន្ននេះក្រុមហ៊ុន SHE Investments រួមសហការជាមួយក្រសួងពាណិជ្ជកម្ម បានធ្វើការបង្កើតគេហទំព័រមួយឈ្មោះថា (ងាយៗ) ឫសរសេរជាភាសាអង់គ្លេស (NGEAY NGEAY) ដើម្បីជួយសម្របសម្រួលដល់សហគ្រិនជាស្ត្រី ក្នុងការចុះបញ្ជីពាណិជ្ជកម្ម ការគាំទ្រជំរុញលើកទឹក និងជាពិសេសនោះប្រមូលផ្ដុំព័ត៌មានល្អៗជុំវិញការប្រកបអាជីវកម្មដល់ស្ត្រី។
បើតាមការលើកឡើងរបស់អ្នកស្រី Celia Boyd ម្ចាស់ក្រុមហ៊ុនSHE Investments បានឱ្យដឹងថា គេហទំព័រងាយៗនឹងផ្ដល់អត្ថប្រយោជន៍ជាច្រើនដល់សហគ្រិនជាស្ត្រីដូចជា៖ ម្ចាស់អាជីវកម្មទាំងអស់ អាចស្វែងរកព័ត៌មានជុំវិញការចុះបញ្ជីពាណិជ្ជកម្ម ក្នុងនោះរួមមាន ដំណាក់កាល និងព័ត៌មានលម្អិតទាក់ទងនឹងការចុះបញ្ជីអាជីវកម្ម។ កាន់តែពិសេសនៅក្នុងគេហទំព័រនេះ ប្រមូលផ្ដុំវិធីសាស្ត្រល្អៗ នៅក្នុងការអភិវឌ្ឍអាជីវកម្មឱ្យកាន់តែរីកចម្រើនទៀតផង។ មិនត្រឹមតែប៉ុណ្ណោះសហគ្រិនជាស្ត្រីទាំងអស់ អាចមានការឱកាសក្នុងការធ្វើអាជីវកម្មធំៗ ការការពារស្លាកយីហោរបស់ខ្លួន ក៏ដូចជាងាយស្រួលក្នុងការស្វែងរកទុន ដើម្បីពង្រីកអាជីវកម្ម។
អ្នកស្រីក៏បានឱ្យដឹងដែរថា បច្ចុប្បន្ននេះក្នុងប្រទេសកម្ពុជា មិនខ្វះទេសហគ្រិនជាស្ត្រី ប៉ុន្តែអ្វីដែលជាខ្វះខាតនោះគឺការជំរុញលើកទឹកចិត្ត។ ដូចនេះគេហទំព័រងាយៗ បង្កើតឡើងដើម្បីជួយគាំទ្រដល់សហគ្រិនជាស្ត្រីទាំងអស់ ក្នុងការប្រឡូកឱ្យស៊ីជម្រៅនៅក្នុងការធ្វើអាជីវកម្ម ដើម្បីចូលរួមអភិវឌ្ឍសេដ្ឋកិច្ចជាតិ។
គួរជម្រាបជូនថា គេហទំព័រ (ងាយៗ) ទើបតែដាក់សម្ពោធកាលពីព្រឹកថ្ងៃទី ៣១ ខែសីហា នៅសណ្ឋាគារ Le Royal នេះត្រូវបានគាំទ្រដោយ ក្រសួងពាណិជ្ជកម្ម នៃព្រះរាជាណាចក្រកម្ពុជា អង្គការ USAID និងក្រុមហ៊ុន Ezecom។
ដើម្បីចូលទៅកាន់គេហទំព័រ(ងាយៗ) សហគ្រិនជាស្ត្រី ឬអ្នកធ្វើអាជីវកម្មទាំងអស់គ្រាន់តែវាយពាក្យ WWW.ngeayngeay.co ជាការស្រេច៕